Ինչո՞ւ է 6 տարում 3-4 տնօրեն փոխվել, ո՞վ է «Փոքր Մհեր» կրթահամալիրի խորհրդի նախագահը

Կրթության և գիտության նախարարությունում հրավիրված մամուլի ասուլիսի ժամանակ նախարար Լևոն Մկրտչյանն անդրադարձել է «Փոքր Մհեր» կրթահամալիրում ստեղծված իրավիճակին: Նախարարի գնահատմամբ՝ «ՓոքրՄհեր» կրթահամալիրում տեղի ունեցող իրադարձությունները մտահոգիչ են. «Եթե հարյուր երեխա նույն բանն են պնդում, ուրեմն ուսումնական հաստատությունում լուրջ խնդիր կա, և այստեղ անելիք ունի և՛ կառավարման խորհուրդը, և՛ տնօրենը, և՛ պետական լիազոր մարմինը: Ինձ համար, որպես կրթության և գիտության նախարարի, առաջնահերթ են երեխաների դժգոհությունները, որովհետև ես գիտեմ` ինչ է նշանակում կազմակերպել, ուսումնական հաստատությունում խմբեր ձևավորել, նաև հասկանում եմ՝ ինչ է նշանակում ընդհանուր դժգոհություն: Հնարավոր չէ, որ մի կոլեկտիվի բոլոր երեխաները միանգամից կազմակերպվեն և նույն բանի մասին սկսեն դժգոհել»,- նշել է նախարարը: Լևոն Մկրտչյանի խոսքով` այս ուսումնական հաստատությունում խնդիրները կուտակվել են տարիներով. «Փաստը, որ վեց տարում 3-4  տնօրեն է փոխվել, նշանակում է, որ ինչ-որ բան ճիշտ չէ, և մենք այստեղ խորքային լուծում պիտի տանք: Խոսքը մեր երեխաների մասին է. որքան էլ որ գործ ունենք ռազմական կրթահամալիրի հետ, պարտավոր ենք նրանց նկատմամբ ավելի ուշադիր լինել, ավելի նուրբ և ճիշտ վերաբերմունք դրսևորել: Կան մասնագիտական հարցեր, որոնք կրթահամալիրի կառավարման խորհուրդը պետք է քննարկի և լուծումներ առաջարկի»: Հիշեցնենք, որ մի քանի օր առաջ կրթահամալիրի սաները  հրապարակային բողոքի ակցիա էին կազմակերպել և պահանջել ու շարունակում են պահանջել նորանշանակ տնօրեն Վահագն Յաղմուրյանի հրաժարականը: Կրթահամալիրի սաները պնդում են, որ նոր տնօրենը ոչ մանկավարժական վերաբերմունք է դրսևորում, սպառնում է իրենց, վիրավորական և անհարգալից վերաբերմունք  է դրսևորում, անպարկեշտ արտահայտություններ է հնչեցնում կրթահամալիրի սաների և սպաների հասցեին, հաստատությունում տիրում է անառողջ մթնոլորտ: «Տնօրենը հայտնի հերոսի՝ Կապույտ Մորուքի չար մարդու կերպար է մեզ մոտ ընկալվում. անհարգալից վերաբերմունք է ցուցաբերում ոչ միայն սաների, այլև սպաների նկատմամբ ու անհարկի դիտողական արտահայտություններ է անում բոլորիս հասցեին՝ մեզ ասում է «հորթեր, դիշովկաներ, կտամ կծեփռտվեք պատերին»,- լրագրողներին պատմել էին սաները: Նրանց խոսքով՝ նոր տնօրենը պատժի անընդունելի ձևեր է կիրառում, իրենց զրկում է հանգստյան օրերին տուն գնալու իրավունիքց: Սաների պնդմամբ՝ մեկ ամիս առաջ նշանակված տնօրեն  Վ. Յաղմուրյանին նման քայլերի դրդում է կառավարման խորհրդի նախագահ Գևորգ Մալխասյանը, և իրենք առավելապես դժգոհ են Մալխասյանից: Կրթահամալիրի տնօրեն  Վ. Յաղմուրյանն իր հերթին ԶԼՄ-ներին ասել էր, թե  սաների բողքները անհիմն են, քանի որ ինքն ընդամենը ուզում է հետևել կարգապահությանը և չի հասկանում, թե ինչից են դժգոհ երեխաները: Հիշեցնենք, որ ԿԳ նախարարի հանձնարարականով՝ ստեղծվել է աշխատանքային խումբ, որն արդեն մի քանի օր է ուսումնասիրում է իրավիճակը, ԿԳՆ աշխատակիցներն անգամ հերթապահում և գիշերում են կրթահամալիրում: Ավելի ուշ ԿԳՆ-ն հանդես եկավ պաշտոնական հաղորդագրությամբ, ըստ որի՝ կրթության և գիտության նախարար Լևոն Մկրտչյանի նախաձեռնությամբ  հրավիրվել է «Փոքր Մհեր» կրթահամալիրի կառավարման խորհրդի արտահերթ նիստ, որտեղ որոշվել է կրթահամալիրում արմատական փոփոխություններ կատարել: Նիստին մասնակցել են նաև ՀՀ մարդու իրավունքի պաշտպանի գրասենյակի ներկայացուցիչը, կառավարման խորհրդի անդամներն ու ԿԳՆ համապատասխան ոլորտի պատասխանատուները և կրթահամալիրի տնօրենը: «Փոքր Մհեր» կրթահամալիրի կառավարման խորհրդի նախագահը ՀՀ վարչապետի խորհրդական Գևորգ Մալխասյանն է, խորհրդի կազմում ընդգրկված են ՀՀ պաշտպանության, ՀՀ ԿԳՆ, ՀՀ արդարադատության, ՀՀ աշխատանքի և սոցիալական հարցերի նախարարների տեղակալները, ՀՀ ոստիկանապետի տեղակալը, կրթահամալիրի ծնողական խորհրդի նախագահը: Քննարկելով «Փոքր Մհեր» կրթահամալիրում ստեղծված իրավիճակն ու առաջացած խնդիրները՝ խորհուրդը որոշել է դիմել ՀՀ ԿԳՆ-ին՝ «Փոքր Մհեր» կրթահամալիրում ծառայողական քննություն նշանակելու առաջարկով: Արտահերթ նիստում որոշվել է ՀՀ ԿԳՆ և ՀՀ ՊՆ ներկայացուցիչներից կազմված հանձնախումբ ձևավորել, որը կրթահամալիրում մշտական դիտարկում և վերահսկողություն կիրականցնի: ՀՀ ԿԳՆ-ի կողմից այդ աշխատանքերը կհամակարգի աշխատակազմի մարզառազմական և արտաուսումնական դաստիարակության վարչության պետ Արկադի Պետրոսյանը: «Փոքր Մհեր» կրթահամալիրում իրավիճակը կայունացնելու և կրթական գործընթացը վերականգնելու նպատակով վերահսկման պարտականությունը ժամանակավորապես դրվել է ՀՀ ԿԳՆ աշխատակազմի մարզառազմական և արտաուսումնական դաստիարակության վարչության գլխավոր մասնագետ Արթուր Կարապետյանի վրա: Արտահերթ նիստի ժամանակ որոշվել է նաև փոխել «Փոքր Մհեր» կրթահամալիրի կանոնադրությունը, խորհրդի կազմը և կառավարման ձևը: Ավելի վաղ «Փոքր Մհեր» կրթահամալիր էր այցելել նաև ՄԻՊ խումբը  և այնտեղ իրավիճակի առնչությամբ հայտնել իր մտահոգությունը: «Այցի ընթացքում բացահայտել են մտահոգիչ և անհետաձգելի միջամտություն պահանջող խնդիրներ: Կրթահամալիրի սաները առանձնազրույցների ընթացքում պնդել են իրենց նկատմամբ վատ վերաբերմունքը, որ հնչել է նաև հրապարակայնորեն: Բացահայտվել են նաև խնդիրներ, որոնք վերաբերում են կրթահամալիրի գործունեությունը կարգավորող ակտերին, ինչպես նաև այդ հաստատությունում սովորողների նկատմամբ ներգործության միջոցներին ու դրանց կիրառության պրակտիկային»,- նշված էր պաշտպանի հայտարարության մեջ: Կարինե  Սարիբեկյան