Պարզվեց, որ լոլիկն էլ է թարս աճում

2016 թվականի հունվար-սեպտեմբեր ամիսներին Հայաստանից ԵԱՏՄ երկրներ արտահանման ծավալով լոլիկը երկրորդն է` թունդ ալկոհոլային խմիչքներից հետո: 2016 թվականի հունվար-սեպտեմբերին Հայաստանից ԵԱՏՄ որոշ երկրներ արտահանվել է 19 մլն 783 հազար 954 ԱՄՆ դոլարի լոլիկ: Ինչպես տեղեկացնում է «Արմենպրես»-ը՝ վկայակոչելով Եվրասիական տնտեսական հանձնաժողովի տվյալների բազան, ընդհանուր առմամբ այն կազմել է 30 հազար 369 տոննա, որից շուրջ 30 հազար 169 տոննան արտահանվել է ՌԴ` կազմելով 19 մլն 726 հազար 714 ԱՄՆ դոլար: Սրան զուգահեռ՝ հայկական ԶԼՄ-ներում արդեն տևական ժամանակ է, ինչ ջերմատներ ունեցող ֆերմերներն ահազանգում են Հայաստան ներկրվող թուրքական լոլիկի մասին: Լոլիկագործները բողոքում են, որ թուրքական լոլիկը «խփում է» հայ արտադրողների գործին: Մասնավորապես օրերս «Ջերմատնային ասոցիացիա» ՀԿ նախագահ Պողոս Գևորգյանը հայտարարել էր, որ մեկ կիլոգրամ թուրքական լոլիկն, ըստ օրենքի, պետք է մաքսազերծվի 507 դրամով, բայց այն հայաստանյան շուկայում վաճառվում է 500 դրամով, այսինքն՝ ինքնարժեքից էլ ցածր գնով: Մինչդեռ հայկական լոլիկը խանութներում վաճառվում է 600 դրամով, ողջամիտ եկամուտի հաշվարկով՝ նվազագույն գինն է: Հետևաբար ստացվում է, որ թուրքական լոլիկը տեղական շուկայում հաղթում է հայկական արտադրանքին: Կառավարության նիստից հետո գյուղատնտեսության նախարար Իգնատի Առաքելյանը, անդրադառնալով լոլիկի շուկայում ստեղծված իրավիճակին, հայտարարել է, որ եթե լոլիկն ու վարունգը Թուրքիայից օրինական ճանապարհով է ներմուծվում Հայաստան, ապա ոչինչ անել չեն կարող: Ըստ նախարարի՝ քայլերը, որ ձեռնարկվում են, պետք է լինեն օրենքի սահմաններում: «Բոլոր պետական մարմիններն այսօր աշխատում են, որ այդ հարցը պարզաբանեն: Եթե դա օրենքից դուրս է, պետք է կարգավորվի օրենքի սահմաններում: ՊԵԿ-ի ղեկավարի հետ խոսել եմ, հանձնարարություն է տվել մաքսանենգության հարցով վարչության պետին, որպեսզի հատուկ ուշադրություն դարձնի, թե կա՞ այդպիսի բան»,- նշել է  Իգնատի Առաքելյանը: Դրան հաջորդեց գյուղատնտեսության նախարարության տարածած պաշտոնական հաղորդագրությունն այն մասին, որ նախարար Իգնատի Առաքելյանը լոլիկի իրացման հարցով խորհրդակցություն է անցկացրել, որին մասնակցել են   Հայաստանի ջերմատնային ասոցիացիայի նախագահ Պողոս Գևորգյանը և ոլորտի մի շարք այլ ներկայացուցիչներ: Ագրոարդյունաբերական համակարգի սննդամթերքի անվտանգության պետական ծառայության պետ Իշխան Կարապետյանը և ՍԱՊԾ պետի տեղակալ Հովհաննես Հայրապետյանը: Խորհրդակցության մասնակիցները արձանագրել են, որ թուրքական լոլիկի ներկրումները դադարել են, մայրաքաղաքի Մալաթիայի գյուղմթերքների շուկայում ներկրված լոլիկ այլևս չկա, առկա է պահեստավորված լոլիկ և վարունգ, որը պարբերաբար որոշակի քանակով շուկայահանվում է: Նախարար Առաքելյանը նշել է, որ ահազանգը ստանալուց հետո խնդիրը մշտապես գտնվել է պատկան մարմիների  ուշադրության կենտրոնում, սակայն հարցին արմատական լուծումներ տալու համար միայն պետական մարմինների աշխատանքը բավարար չէ, և շատ կարևոր է հասարակական կազմակերպությունների ակտիվ մասնակցությունը: Թե ինչ մեխանիզմներով է հնարավոր թուրքական լոլիկի ներմուծման դեմն առնել, իհարկե դժվար է ասել: Իրականում այստեղ 2 խնդիր կա՝ եթե իսկապես ներմուծված լոլիկը վաճառվում է ինքնարժեքից ավելի ցածր գնով, ուրեմն սա պետք է որակել անբարեխիղճ մրցակցություն և կիրառել համապատասխան տույժեր: Երկրորդ խնդիրն ուղղակիորեն առնչվում է լոլիկի արտահանմանը՝ Հայաստանից դեպի Ռուսաստան արտահանված 30 հազար տոննա լոլիկը հայկական, թե՞ թուրքական լոլիկ է: Եվ վերջապես. եթե մեր երկիրն ունի սեփական լոլիկը, ապա ինչո՞ւ ենք այն ներմուծում Թուրքիայից, և այս տարվա կտրվածքով որքա՞ն թուրքական լոլիկ է մտել Հայաստան:     Դավիթ  Մանուկյան