Սամվել Խուդոյան. «Ո՞ր կինը կամ ամուսինը կների, եթե նրան նստացնեն մեկ ապտակի համար»

Հոգեբան Սամվել Խուդոյանը հոգեբանական տեսանկյունից սխալ է համարում «Ընտանեկան բռնության մասին» օրենքի որոշ կետերը: Այդ մասին նա այսօր խոսեց «Հայելի» մամուլի ակումբում հրավիրված ասուլիսում: «Ընտանիքը հոգեբանական կառույց է, որտեղ միշտ էլ լինում են փոքր կամ մեծ կոնֆլիկներ: Այսպիսի օրենքները երբեմն բացասական են ազդում ընտանիքի կայունության վրա: Օրենքը չպետք է ընտանիքի անդամների միջև տարաձայնություն առաջացնի, բայց այս օրենքի որոշ կետեր այդպիսի հետևանքների կարող են բերել»,- ասաց բանախոսը: Ըստ նրա՝ շատ խնդիրներ կարելի է լուծել դիմելով հոգեբանին, ոչ թե ոստիկանություն, քանի որ խնդիրը իրավական դաշտ տանելու դեպքում մեծ է հավանականությունը, որ տվյալ ընտանիքը կքանդվի: Լրագրողների  այն հարցին, թե ինչպես պետք է ընտանեկան խնդիրները լուծվեն հոգեբանի միջամտությամբ այն դեպքում, երբ մեր երկրում հակված չեն դիմելու հոգեբանի օգնությանը, Սամվել Խուդոյանը պատասխանեց, որ հիմա աստիճանաբար հոգեբաններին դիմողների թիվը շատանում է: Ընդ որում՝ նախկինում ավելի շատ դիմել են կանայք, իսկ հիմա նաև տղամարդիկ: «Ո՞ր կինը կամ ամուսինը կների, եթե նրան նստացնեն մեկ ապտակի համար: Եթե ընտանիքը «հիվանդ է» և բուժման կարիք ունի, պետք է բուժել, իսկ եթե ամուսինները շատ անհամատեղելի են, թող բաժանվեն»,- ասաց հոգեբանը և ավելացրեց, որ օրենքի առկայությունը նա ողջունում է, սակայն համաձայն չէ մի շարք կետերի հետ: Տաթևիկ Թահմազյան