Ջունգլի հովանավորները
Երևանի կենտրոնի փողոցներից մեկում օրեր առաջ իր կնոջը դաժանաբար ծեծի ենթարկած Ջունգլ մականունով Գեւորգ Սարգսյանի նկատմամբ իրավապահներն, ինչպես սպասելի էր, խափանման միջոց են ընտրել ստորագրությամբ քաղաքից չբացակայելը: Իրավապահների որոշման վրա չի ազդել անգամ կնոջ նկատմամբ դաժան բռնությանը հետեւած խուլիգանական պատմությունն ու դանակահարության փաստը: Այսօր հայտնի դարձավ, որ Ջունգլը ծեծի գիշերը ծեծկռտուք է սարքել գիշերային ակումբներից մեկում իր անպարկեշտ պահվածքով: Դեպքը տեղի է ունեցել Աբովյան քաղաքի «Քրեյզի» գիշերային ակումբում: Տերյան փողոցում կնոջը ծեծելուց հետո Ջունգլը շտապել է նշված ակումբ, որտեղ իրեն կորցրած բարձրացել է ակումբի բեմահարթակին եւ զվարճացել: Ապա վեճի է բռնվել ակումբում գտնվողներից մեկի հետ, որի ընթացքում էլ դանակի վնասվածք ստացել ու տեղափոխվել Երեւանի հիվանդանոցներից մեկը: «Ջունգլը» հանրությանը հայտնի էր դարձել դեռեւս երկու տարի առաջ՝ ազատամարտիկ Վարդան Թումանյանին ծեծի ենթարկելու դեպքից, ինչի հետևանքով ազատամարտիկը մահացել էր: Որոշ ժամանակ անազատության մեջ մնալուց հետո «Ջունգլը» ազատ էր արձակվել, քանի որ դատաբժշկական երկրորդ եզրակացությամբ պարզվել էր, որ Վարդան Թումանյանը ծեծի հետեւանքով չի մահացել, նա ի ծնե իբր հիվանդ է եղել և այդ օրը պետք է մահանար, և ծեծը պարզապես համընկել է այդ օրվա հետ: Իսկական աբսուրդ: Որքան էլ սպանված ազատամարտիկի այրին ու հարազատները թակեցին բարձրագույն ղեկավարության դռները, բաց նամակներով նրանց ուշադրությունը հրավիրեցին այդ ոճրագործությանը, երբ փողոցային մեկը կենցաղային վեճի պատճառով խլել էր հայրենիքի համար կռիվ տված մարդու կյանքը, ապարդյուն: Բոլորն անտարբեր մնացին այս ընտանիքի ողբերգությանը: Ահա մեր դատաիրավական համակարգի պատկերը և անպատժելիությունը, որը ծնում է նոր հանցագործություններ: Քանի կոպեկ արժե Սերժ Սարգսյանի ՀՀԿ համագումարում հնչած ճռճռան ելույթը, որով նա դրվատում էր իր թիմի կատարած ահռելի աշխատանքը, թվարկում ոլորտներ, ինչ-որ աճերի մասին խոսում, այնինչ գրեթե նույն ժամին փողոցում այդ իշխանության իրական պատկերն էր հառնում: Ինչու անպատասխան մնաց մարդ սպանած Ջունգլը, մնում է միայն ենթադրել։ Մամուլը գրեց նրա ու ԵԿՄ-ի կապի ու բարձրաստիճան այրերի հովանավորչության մասին: Եթե ժամանակին Ջունգլը արժանի պատիժ կրեր, ապա դժվար է ասել, թե այսօր այնքան կլկտիանար, որ օրը ցերեկով փողոցում ծեծկռտուք կբեմադրեր: Սերժ Սարգսյանը խոսում էր բարեփոխումներին իրենց հավատարմության մասին, այնինչ բռնության նկատմամբ իրենց հավատարմության արդյունքում է, որ հանցավորներն արժանի պատժի չե արժանանում ու որպես կանոն արդարադատությունը գործում է ծանոթ-բարեկամ, խնամի շղթայի տիրույթում: Տարածաշրջանում ամենաբազմամարդ ոստիկանությունը, որը տարբեր հաշվարկներով գերազանցում է սահմանված նորմայից բնակչության թվին ընկնող ոստիկանների թվուվ, փաստացի մատնվել է անգործության ու հանցավոր անգործության հետեւանքով է, որ հող է պարարտացվում նոր հանցագործությունների համար: Նույն օրը մամուլը ահազանգեց նաեւ մեկ ուրիշ բռնությանը, տխրահռչակ Լիսկայի փոքր որդին դանակահարել էր Կոտայքի նախկին մարզպետ Կովալենկո Շահգալդյանի թոռը, տղաները միասին խրախճանքի էին մասնակցել, բայց ընթացքում ինչ-ինչ անհամաձայնություններ էին առաջ եկել ու լեզվակռիվն ավարտվել էր ծեծկռտուքով: Դե, իհարկե, մեր իրավապահներն էլ առաջնորդվեցին լիսկաների շահերով, որոնք որպես կանոն միշտ կարողանում են իրենց լծակների կիրառմամբ ծառից փորձանքից հեռու մնալ:
Անի Սահակյան