Ֆլեշը լուծե՞լ է հարցերը
Կառավարության դեկտեմբերի 1-ի նիստի օրակարգում ընդգրկված է «ՀՀ գյուղատնտեսության սուբսիդավորման ուղղությունների հայեցակարգը»: Բավականին ծավալուն այս փաստաթուղթը նպատակ ունի գյուղատնտեսության սուբսիդավորման գործընթացում ձևավորել միասնական մոտեցումներ ու այդ բնագավառում համակարգված քաղաքականություն իրականացնելու համար ստեղծել նախադրյալներ: 37-էջանոց հայեցակարգի գլուխներից մեկը վերաբերում է դիզելային վառելանյութի սուբսիդավորմանը:Հայեցակարգի այս գլխում նշվում է, որ «Հողօգտագործողներին գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցություն» ծրագրի շրջանակներում 2012 թվականից սկսած շուկայականից 25-26% ցածր գնով, ներառյալ տեղափոխման ծախսերը, մարզերի համայնքներում պահանջարկին համարժեք գյուղատնտեսությունում տնտեսավարողներին հատկացվել է դիզելային վառելանյութ: «Ծրագրի շրջանակներում դիզելային վառելանյութի նկատմամբ հանրապետության մարզերի վճարունակ պահանջարկն ամբողջությամբ բավարարվել է։ Ծրագրի իրականացման համար 2017-2019 թվականներին յուրաքանչյուր տարի նախատեսվում է հատկացնել 330.0 մլն դրամ»,- նշվում է հայեցակարգում: Սա փաստացի նշանակում է, որ գործող սուբսիդավորման համակարգում գոնե դիզելային վառելիքի մասով որևէ փոփոխություն չի արվել: Դիզվառելիքի սուբսիդավորման ծրագիրը ի սկզբանե՝ 2012 թվականից սկսած իրականացնում է «Ֆլեշ» ընկերությունը: Ամեն տարի դիզվառելիք ներկրելու և գյուղացիական տնտեսություններին շուկայականից, այսպես կոչված, էժան գնով դիզվառելքի մատակարարելու նպատակով կառավարությունը, առանց մրցույթի, հայտնի օլիգարխ Բարսեղ Բեգլարյանին պատկանող «Ֆլեշ» ընկերությանը հատկացնում էր սուբսիդիա, մոտավորապես 330 մլն դրամի չափով: Դրա դիմաց «Ֆլեշը» լիտրը 280 դրամով դիզվառելիք էր հատկացնում գյուղացիներին: Մոտ մեկ ամիս առաջ, երբ նորանշանակ վարչապետ Կարեն Կարապետյանի ղեկավարությամբ տեղի ունեցած կառավարության նիստի ժամանակ հերթական 330 մլն դրամի հատկացումը կատարվեց «Ֆլեշ» ընկերությանը, գյուղատնտեսության նախարար Իգնատի Առաքելյանը կառավարության նիստից հետո հայտարարեց, թե պարարտանյութի ու դիզվառելիքի սուբսիդավորման ծրագիրն անարդյունավետ ու աննպատակահարմար է. «Դա օգուտ չի տալիս գյուղատնտեսության զարգացմանը, ինքը պահում է գյուղատնտեսությունն այն վիճակում, որտեղ մենք կանք, իսկ մենք պետք է մտածենք զարգացման ուղղությամբ: Այսօր մենք ստացել ենք պարտքերի անվանական ցուցակներ՝ ով է ստացել, ով գումար չի վճարել, որովհետև մեծ գումարի պարտք է գոյացել, և մենք չենք հասկանում՝ դա սոցիալակա՞ն, կարկտահարությա՞ն, թե չարաշահումների հարց է: Մենք դրա պարզաբանումը պետք է անենք, չարաշահումներով կզբաղվեն իրավապահները»,- կառավարության նիստից հետո հայտարարել էր նախարարը և ավելացրել, որ այժմ ուսումնասիրություններ են կատարվում՝ սուբսիդավորման համակարգի բարելավման նպատակով: Փաստորեն, ուսումնասիրություններն ավարտվել են, և որոշվել է դիզվառելիքի սուբսիդավորման համակարգը և հատկացվող գումարը պահպանել, այն հիմնավորմամբ, որ դա արդյունավետ է: Եթե առաջիկա 2 տարիներին նույնությամբ պահպանվի նաև մատակարարը, և դիզվառելիքի սուբսիդիան, ինչպես նախկինում, հատկացվի առանց մրցույթի, կնշանակի «Ֆլեշը» լուծել է իր հարցերը: Դավիթ Մանուկյան