Սերժ Սարգսյանը չասաց ամենակարևորը
ՀՀԿ 16-րդ համագումարում Սերժ Սարգսյանը հերթական անգամ կուսակցության նախագահ վերընտրվելուց հետո հայտարարել է, որ եթե կուսակցությունը հաջողություններ արձանագրի 2017 թվականի պառլամենտական ընտրություններում, ապա ՀՀԿ վարչապետի թեկնածուն լինելու է Կարեն Կարապետյանը. «Ասեմ նաև, որ գալիք ընտրություններում վստահության քվե ստանալու պարագայում մեր կառավարությունը կգլխավորի Կարեն Կարապետյանը՝ շարունակելով իրագործել արդեն նախանշված ծրագիրը»,- հայտարարել է Սերժ Սարգսյանը՝ շեշտելով, որ Կարեն Կարապետյանին ևս մեկ անգամ հայտնում է իրենց անվերապահ աջակցությունը, ողջունում ՀՀԿ շարքերը համալրելու Կարապետյանի և կառավարության մյուս գործընկերների որոշումը։ Նախագահը նաև վստահություն է հայտնել, որ Կարապետյանի խանդավառ ոճն ու կառավարչի տաղանդը լիովին կբացահայտվեն այդ պաշտոնում և կոգևորեն կուսակցությանը։ Այսպիսով՝ Սերժ Սարգսյանն ուղղակիորեն պատասխանել է քաղաքական-հասարակական շրջանակներում շրջանառվող այն վարկածին, թե Կարեն Կարապետյանը ընդամենը 6 ամսվա վարչապետ է: Առաջին հայացքից Սերժ Սարգսյանը գոնե ՀՀԿ-ի համար հստակեցրել է քաղաքական իրավիճակը՝ փաստելով, որ ինքը 2017-ի խորհրդարանական ընտրություններից հետո հաստատապես վարչապետ դառնալու ցանկություն չունի: Այնուամենայնիվ, երկու կարևոր հարց այստեղ շարունակում է մնալ անպատասխան՝ Սերժ Սարգսյանը վարչապետ դառնալու մտադրությունից կհրաժարվի՞ նաև 2018 թվականին՝ իր՝ նախագահական ժամկետի ապառումից հետո: Ինչպես հայտնի է, ՀՀ սահմանադրության մի շարք գլուխներ, այդ թվում նաև 6-րդ գլուխը, որտեղ սահմանված են կառավարության և նրա ղեկավարի պարտականություններն ու իրավասությունները, ուժի մեջ են մտնում նորընտիր ՀՀ նախագահի կողմից իր պաշտոնի ստանձնման օրը, այսինքն՝ 2018 թվականի փետրվարից հետո, երբ Սերժ Սարգսյանի նախագահական ընթացիկ ժամկետը կավարտվի: Մինչ այդ, համաձայն նոր սահմանադրության <<Եզրափակիչ և անցումային դրույթների>>, շարունակում են գործել 2005 թվականին ընդունված սահմանադրության պահանջները: Հետևաբար 2017 թվականի ընտրություններից հետո, թեպետ Հայաստանը տեսականորեն անցնում է նոր սահմանադրությանը և կառավարման խորհրդարանական համակարգին, սակայն իրականում մինչև 2018 թվականի փետրվարը մենք գործ ենք ունենալու անցումային դրույթների հետ, և երկրի թիվ մեկ քաղաքական և պետական պաշտոնյան դեռևս լինելու է նախագահը: Իսկ թե դրանից հետո ով կլինի վարչապետը այն դեպքում, եթե ՀՀԿ-ն հաջողությամբ պահպանի խորհրդարանական մեծամասնություն ունեցող քաղքական ուժի իր կարգավիճակը, Սերժ Սարգսյանը չի մանրամասնել: Այս հարցին թերևս Սերժ Սարգսյանը կպատասխանի 2017 թվականի ընտրություններից տևական ժամանակ հետո միայն: Ներքաղաքական և ներկուսակցական մյուս ինտրիգը ևս կարծես թե պահպանելու է իր արդիականությունը. Սերժ Սարգսյանի անվերապահ աջակցությունը վարչապետ Կարեն Կարապետյանին և հայտարարությունը, թե ՀՀԿ-ի հաջողության հասնելու դեպքում վարչապետի թեկնածուն Կարեն Կարպետյանն է լինելու, արդյոք նշանակո՞ւմ է՝ խորհրդարանական ընտրությունների համամասնական ցուցակը գլխավորելու է Կարեն Կարապետյանը: Քանի որ Սերժ Սարգսյանն այս փուլում գերադասել է մնալ հանրապետության նախագահ և ՀՀԿ-ի վարչապետ է հռչակել Կարեն Կարապետյանին, խորհրդարանական ընտրությունների ժամանակ նա կարող է հանգիստ հայտարարել, որ ինքն այս անգամ ձեռնպահ է մնում ՀՀԿ ցուցակը գլխավորելուց: Այսպես թե անպես՝ Սերժ Սարգսյանը գլխավորում է ՀՀԿ-ն: Նոր սահմանադրությամբ՝ 2017 թվականի ընտրություններից հետո, ինչպես ինքը՝ Սարգսյանն է նշել, էապես բարձրանում է կուսակցությունների դերը մեր հասարակական-քաղաքական կյանքում, և ՀՀԿ-ն գալիք ընտրություններում ներկայանալու է հասարակության մեջ լայն վստահություն վայելող և հեղինակություն ունեցող անհատների, գաղափարներով մրցելու և հաղթել կարողացող գործիչների կուռ թիմով: Համագումարը ցույց տվեց, որ Սերժ Սարգսյանի ներկուսակցական վստահությունն ու իշխանությունը անսասան է, հետևաբար քաղաքական գործընթացները նա կարող է ղեկավարել՝ առանց ցուցակում լինելու: Կարինե Սարիբեկյան