Սերժ Սարգսյանը ոնց կասի... և վեր՛ջ
Այլեւս իրողություն է Հանրապետական կուսակցության 16-րդ համագումարը, որը խոստանում էին պատմական դարձնել, բայց ոչնչով չտարբերվեց նախորդներից: Նույն պաթոսախեղդ ելույթները, նույն պլպլան հագուստներով ու միանման սանրվածքով տիկնայք ու նույն ճռճռան խոստումները, որոնք ականջ պայթեցրեցին: Ու եւս մեկ անգամ պարզ դարձավ, որ ՀՀԿ-ում ոչ թե առաջնորդվում են գաղափարների ու սկզբունքների գերակայությամբ, այլեւ գործում է անձի պաշտամունք: Բոլոր առիթներով ՀՀԿ-ականները թմբկահարում են, թե ՀՀԿ-ն միահեծան կուսակցություն չէ, որ այստեղ որոշումներն ընդունվում են կոլեգիալ, այդ մեսիջն էր պարունակում նաեւ Սերժ Սարգսյանի այսօրվա ելույթը: Մինչդեռ իրականությունը տրամագծորեն այլ էր: Համագումարին ժամանել էին հին ու նոր, պաշտոնյա ու գործազուրկ ՀՀԿ-ականներ, ու հատկապես վերջինները, որոնք տարբեր ժամանակներում ու պատճառներով այսօր անգործ ու անպաշտոն են մնացել, լիակատար անորոշության մեջ էին իրենց ապագայի մասին: Ավելին, նրանք անկեղծորեն չէին թաքցնում, որ այդ ապագան պետք է որոշի Սերժ Սարգսյանը ու ինչպես որոշի, իրենք հլու-հնազանդ պատրաստ են համակերպվել պարտադրված ճակատագրի հետ:
Օրինակ՝ ՀՀ նախկին ոստիկանապետ Ալիկ Սարգսյանը համառորեն ընդդիմանում էր շփվել լրագրողների հետ, թեեւ նախկինում դա Ալիկ Սարգսյանի ամենասիրելի զբաղմունքներից մեկն էր: Նա չէր պատասխանում հարցերին, բայց մի հարցում լռել չկարողացավ: Հնարավո՞ր է նորից համակարգ վերադառնա կամ խորհրդարանական ընտրություններին մասնակցի ՀՀԿ-ի ցուցակով, նա պատասխանեց. «Ոչ մի բան այս պահին չեմ կարող ասել, դա իմ ցանկությունը չէ, Հանրապետության նախագահի որոշելիքն է, ինչպես կորոշի, այդպես էլ կշարունակեմ իմ գործունեությունը»:
Համագումարից առաջ լրագրողները նաեւ Տրանսպորտի և կապի նախկին նախարար Գագիկ Բեգլարյանի առաջիկա պլանների մասին փորձեցին տեղեկանալ, հետաքրքրվեցին` նույն եռանդո՞վ է մասնակցելու առաջիկա ընտրություններին: «Ժողովուրդ ջան, մենք բոլորս քաղաքականության մեջ ենք: Եթե նույն եռանդով չպիտի աշխատենք, ի՞նչ է նշանակում, որ մենք ամեն անգամ աշխատում ենք` աշխատանքի տեղավորվելու համա՞ր»,- ասաց Բեգլարյանը: Նոր պաշտոնի առաջարկի մասին էլ բացասական պատասխանեց «Եթե լինեն առաջարկներ, խոստանում եմ առաջինը լրագրողներին տեղյակ պահել»,- ասաց նա ու չմոռացավ ավելացնել, որ կուսակցությունն ու նախագահը ոնց որոշեն, ինքը կընդունի ի գիտություն: Նույնիսկ զսպվածություն էր իջել նախկինում անբռնազբոս պաշտոնյաների վրա: Սյունիքի նախկին մարզպետ Սուրիկ Խաչատրյանը, ով պաշտոնանկությունից հետո պարծենում էր, թե նորից հետո է գալու, այսօր պապանձվել էր իր ապագայի մասին հարցերից: Մի փոքր հստակություն կար միայն Սերժ Սարգսյանի մտերիմ ԴԱՀԿ նախկին պետ Միհրան Պողոսյանի մոտ, նա ասաց, որ ամենայն հավանականությամբ, կառաջադրվի խորհրդարանական ընտրություններին:
Այս խմբակային ստրկական կեցվածքը մի բանի մասին է խոսում, կամ ՀՀԿ-ում ստում են ասելով, որ այստեղ դիկտատուրա չկա ու հարգում են բազմակարծությունը, որի հիման վրա են ընդունվում որոշումները: Կամ էլ մարդիկ ինքնակամ ընտրել են ստրկանալու, ծառայելու ճանապարհը: Նրանք չեն պատրաստվում սպանել իրենց մեջի ստրուկին, չեն համարձակվում խոսել անգամ սեփական ցանկությունների մասին՝ համարելով, որ մեծ մեղք են անում, քանզի Սերժ Սարգսյանը իրենց չի լիազորել նման ցանկություն ունենալ: Ամենուր է խրախուսվում անձի անկախությունն ու սկզբունքայնությունը, մինչդեռ այս մարդիկ իրենց վարքագծով ամրագրում են այն կարծիքը, որ ՀՀԿ-ն ստրուկների բուծարան է:
Անի Սահակյան