Պողոսյանը պատգամավոր դառնալու ցանկություն չունի

ԱԺ պատգամավոր Թեւան Պողոսյանը կրկին պատգամավոր դառնալու ցանկություն չունեմ: Այս մասին խորհրդարանում լրագրողների հետ զրույցում հայտարարեց պատգամավոր Թևան Պողոսյանը: Նա նշեց, որ այս պահին համագործակցության առաջարկ որևէ կուսակցությունից չունի, եւ ինքն էլ որեւէ մեկին առաջարկ չի արել: Անդրադառնալով ՀՀԿ համագումարին՝ Պողոսյանը նշեց, որ միգուցե սովետը չէի հիշի, եթե չլիներ քվեարկությունը: «Այ, հենց քվեարկությունը գալիս էր ու միաձայն, լա՜վ է, ուռա՜, բնականաբար, սա հիշեցնում էր, թե որտեղ ենք այդ ամենը տեսել, դա կլիներ խորհրդային անցյալը, թե կլինեին երկրներ, որտեղ միակուսակցական իրավիճակ է: Մի կողմից ներկայացվում է, որ մենք պետք է մրցակցային քաղաքական դաշտ ունենանք, պետք է փոխվենք ու փոփոխությունը պետք է սկսվի մեզանից և միգուցե պետք էր, որ այդ փոփոխության մեջ տեսնեինք, որ ՀՀԿ-ից մեկը կգա ու կասի, որ մի փոքր այլ գաղափար ունի, այլ տեսլական ունի, միգուցե ասի, որ ձեռնպահ է և այդ դեպքում գոնե կտեսնեինք, որ ներքին քննարկում կա»,- նշեց Պողոսյանը՝ հավելելով, որ երբ որոշում ընդունվեց, համագումարի ընթացքում լավ կլիներ, որ մի քանի հոգի, գոնե ձևական դեմ լինեին: «Թող լիներ 300 հոգի կողմ, 10-ը ձեռնպահ, մեկը դեմ, գոնե թող այդպես լիներ»,- ասաց նա: Հարցին՝ Սերժ Սարգսյանի ելույթի քաղաքական մեսիջները որո՞նք էին, Պողոսյանը տվեց հեեւյալ պատասխանը. «Ընդհանրապես, Սերժ Սարգսյանի բոլոր ելույթները շատ լավն են, ինչը մենք նայել ենք, շատ լավ տեքստ է, այդ իմաստով, յուրահատուկ ձևով տարբերվում է մյուսներից, բայց ինձ թվում է, որ մենք բոլորս սովորել ենք, որ ելույթը, տեքստը և մեր կյանքում իրականությունը կամ գործողությունները տարբեր բաներ են»: Խոսելով 7000 հոգու՝ մեկ գիշերում ՀՀԿ-ին անդամակցելու մասին՝ Պողոսյանը կարծիք հայտնեց, որ նրանք ստիպողաբար են անդամակցել այդ կուսակցությանը: «Սա մեսիջ էր, թե նայեք, ես այս մարդն եմ, որ միայն իմ անունի հետ կարելի է 7000 անդամ ունենալ մեկ գիշերում»,- եզրափակեց պատգամավորը: Փայլակ Ֆահրադյան