Նախընտրական խայծ, թե՞ հետախուզություն

Եթե Gallup International association-ի վերջին հարցումը հետախուզական նպատակ է հետապնդում, ապա արձանագրած ցուցանիշներն ընդունելի են, եթե հետազոտական, ուրեմն՝ ոչ։ Այս մասին մեզ հետ զրույցում անդրադառնալով Գելափի-ի երեկ հրապարակած հարցումների արդյունքներին նշեց «Սոցիոմետր» անկախ սոցիոլոգիական կենտրոնի տնօրեն , Հայաստանում սոցիոլոգիայի կնքահայր Ահարոն Ադիբեկյանը։ Ադիբեկյանը նշեց, որ անցկացած հարցումներում «սիստեմատիկ» սխալ կա. «Առաջադրանքը սխալ է կատարված, 6 հարյուր մարդկանց շրջանակում անցկացված արդյունքով եթե փորձում են ամբողջական պատկեր ցուցադրել, ապա սխալ է։ Դա չի կարող իրականությանը համապատասխանել», -ասաց Ադիբեկյանը՝ հավելելով, որ դա կարող է ընդամենը կողմնորոշիչ պատկեր տալ։ Հարցումների կիզակետում, բնականաբար, առաջիկա խորհրդարանական ընտրություններն են ու դաշտում ակտիվ քաղաքական ուժերի վարկանիշը։ Գելափը, կարելի է ասել, աննախադեպ ցուցանիշներ է հրապարակել, օրինակ հարցվածների 19,5 տոկոսն է հայտնել, որ 2017-ի խորհրդարանական ընտրություններին իր ձայնը կտա Հայաստանի հանրապետական կուսակցությանը։ Որպես կանոն նման հարցումների պատվիրատուն հենց ՀՀԿ-ն է ու նրան են վերագրում ամենաբարձր ցուցանիշները։ Ահարոն Ադիբեկյանը չի կարող կանխագուշակել, թե ով է այս անգամ պատվիրատուն, կարծում է նաեւ, որ հնարավոր է պատվիրատու էլ չլինի, որովհետեւ առանձնապես մեծ պատվեր չէ։Այդուհանդերձ նկատում է, որ ՀՀԿ-ն ցածր ձայներ է ստացել: «Ես չեմ կարող ենթադրել, թե պատվերն ում կողմից կարող է լինի, ես շատ գիտեմ՝ ում կողմից կարող է լինի, Նավասարդյանին հարցրեք». նեղսրտած պատասխանեց Ադիբեկյանը։ Նա կարծում է, որ ընտրությունների համար շուտ է հարցում անցկացնելը, հիմա պետք է ընդհանուր բարոյահոգեբանական ու սոցիալ-տնտեսական գործոնները բացահայտել։ Զրույցի ընթացքում պարզվեց, թե ինչու է Ադիբեկյանը խանդով վերաբերում Գելափի հարցումներին։ Ադիբեկյանը սոցհարցումներ անցկացնելու հայտեր է ներկայացրել մի քանի կազմակերպությունների, որպեսզի ֆինանսավորեն ու ինքն էլ անցնի գործի, սակայն դեռեւս պատասխան չի ստացել։ Թե որ կազմակերպություններն են դրանք, Ադիբեկյանը չգաղտնազերծեց։ Նշենք, որ ըստ վերջին հարցումների ` եթե Ազգային ժողովի ընտրությունները անցկացվեին մոտակա կիրակի օրը, ո՞ւմ կտային իրենց ձայնը, քաղաքացիների 18,23 տոկոս պատասխանել է՝ ոչ մեկին, 2,4 տոկոսը՝ «Քաղաքացիական պայմանագիր» կուսակցությանը, 1,9 տոկոսը՝ «Նոր Հայաստանին», 0,1 տոկոսը՝ «Համախմբում» կուսակցությանը, 19,5 տոկոսը` Հայաստանի հանրապետական կուսակցությանը, 1,2տոկոսը` «Հայկական վերածնունդ» կուսակցությանը, 0,5 տոկոսը` «Հայաստանի ժողովրդական կուսակցությանը», 3,4 տոկոսը` Հայ հեղափոխական դաշնակցությանը, 1,4 տոկոսը՝ «Հայ ազգային կոնգրեսին», 0,8 տոկոսը` «Լուսավոր Հայաստանին», 3,0-ը` «Ժառանգությանը», 18,4 տոկոսը՝ «Բարգավաճ Հայաստանին», 0,5 տոկոսը՝ «Ալյանսին», 0,3 տոկոսը՝ «Ազատ դեմոկրատներին»: Մեր դիտարկմանը, որ հասարակական կարծիքի ուսումնասիրության այս կենտրոնը, որի նախասիրությունների մեջ է նախընտրական կրքեր հրահրել, ուղղորդել, խայծ գցել եւ այլն, գուցե հիմա էլ հարազատ ոճով փորձում է ուղղորդե՞լ դաշտը, Ահարոն Ադիբեկյանը կտրուկ արձագանքեց, որ ոչինչ ասել չի կարող, եթե իրեն շանս տրվի հարցումներ անցկացնել, կցուցադրի իրականությունը։ Կասկած չկա, որ այս հարցումները որոշները առաջիկայում հաղթաթուղթ են դարձնելու ու ճոճելու ամեն առիթով՝ ցուցադրելով իրենց ընդդիմության տոկոսը։ Անի Սահակյան