Գյումրի-Մոսկվա ավիատոմսը՝ 7189 դրամով. Հայաստանի ավիացիոն հեղափոխության սկիզբը

   Ռուսական «Պոբեդա» բյուջետային ավիաընկերության Գյումրի-Մոսկվա և հակառակ ուղղությամբ առաջին չվերթը կկատարվի դեկտեմբերի 15-ին: Այս մասին կարելի է տեղեկանալ ավիաընկերության պաշտոնական կայքում առկա տվյալներից: Հիշեցնենք, որ մոտ մեկ ամիս առաջ՝ հոկտեմբեր ամսին, հայտարարվեց, որ ռուսական «Պոբեդա» ավիաընկերության հետ պայմանավորվածություն է ձեռք բերվել 2016 թվականի նոյեմբեր ամսվա վերջից սկսած Գյումրու «Շիրակ» օդանավակայանից դեպի Մոսկվայի «Վնուկովո» օդանավակայան, ինչպես նաև հետադարձ ուղղությամբ թռիչքներ իրականացնել: Նշվում էր, որ ավիաընկերության ավիատոմսերի սակագները լինելու են սկսած 10 հազար դրամից: Թռիչքները կատարվելու են ցերեկային ժամերին: Համաձայն ավիաընկերության պաշտոնական կայքում հրապարակված տվյալների՝ Գյումրու «Շիրակ» օդանավակայանից դեպի Մոսկվայի «Վնուկովո» օդանավակայան չվերթերի ավիատոմսերն արդեն վաճառքում են: Ըստ այդմ՝ «Պոբեդան» ուղևորներին առաջարկում է երեք կատեգորիայի ավիատոմսեր՝ Ստանդարդ, Պլյուս և Պրեմիում: Դեկտեմբերի 15-ին, 20-ին և 22-ին «Ստանդարդ» ավիատոմսը կարժենա 7189 դրամ (998.86 ռուբլի), որի դեպքում ուղևորը կարող է իր հետ ինքնաթիռ բարձրացնել մինչև 10 կգ կշռող ձեռքի ուղեբեռ, սակայն ուղևորի նստատեղը նախապես որոշված կլինի ավիաընկերության կողմից: «Պլյուս» ավիատոմսը կարժենա 15425 դրամ (2097.86 ռուբլի), նույն պայմաններով, պարզապես այս դեպքում ուղևորը ինքը կարող է ընտրել, թե որտեղ նստի, իսկ արդեն «Պրեմիում» ավիատոմսը կարժենա 44660 դրամ (5998.86 ռուբլի), որի դեպքում ուղևորը կարող է նաև մինչև 20 կգ-անոց ուղեբեռ ունենալ: Նշենք նաև, որ մինչև 12 տարեկան երեխաների համար ավիափոխադրումն անվճար է լինելու: Դեկտեմբերի 18-ին «Ստանդարդ» ավիատոմսը կարժենա 18010 դրամ (2502.50 ռուբլի), «Պլյուսը»՝ 26426 դրամ (3601.50 ռուբլի), իսկ «Պրեմիումը»՝ 55481 դրամ (7502.50 ռուբլի), իսկ արդեն հետագա օրերին՝ մինչև դեկտեմբերի վերջ, տոմսերն աստիճանաբար կթանկանան՝ «Ստանդարդ» ավիատոմսի դեպքում հասնելով 25-32 հազար դրամի, «Պլյուսի» դեպքում 33-ից 41 հազար դրամի, իսկ«Պրեմիում» ավիատոմսը կարժենա 63-70 հազար դրամ: Ընդ որում, Մոսկվայից Գյումրի թռիչքներն ավելի թանկ կլինեն, քան Գյումրիից Մոսկվա թռիչքները: Դեկտեմբերի 15-ին և 18-ին «Ստանդարդ» ավիատոմսը կարժենա 2502.50 ռուբլի (18010 դրամ), «Պլյուսը»՝ 3601.50 ռուբլի (26426 դրամ), իսկ «Պրեմիումը»՝ 7502.50 ռուբլի (55481 դրամ), իսկ հետագա օրերին աստիճանաբար կթանկանա: «Պոբեդա»-ի թռիչքները կիրականացվեն շաբաթական երեք օրվա կտրվածքով` երեքշաբթի, հինգշաբթի և կիրակի օրերին: Քաղավիացիայի գլխավոր վարչության մամուլի քարտուղարը ԶԼՄ-ներին հայտնել էր, որ «Զվարթնոց» օդանավակայանում «Պոբեդա» բյուջետային ավիաընկերության չվերթերն ի սկզբանե նախատեսված չեն եղել, քանի որ «Զվարթնոցը» բյուջետային ավիաընկերություններ սպասարկող օդանավակայան չէ: Այդ է պատճառը, որ «Պոբեդա» ավիաընկերությունը նախընտրել է Գյումրիի «Շիրակ» օդանավակայանը։ Եթե նախանշված սակագներով թռիչքներն իսկապես սկսվեն իրականացվել, ապա դա կնշանակի, որ կոնկրետ ավիացիայի ոլորտում իսկապես ինչ-որ բան փոխվում է: Իհարկե դեռ պարզ չէ, թե յուրաքանչյուր չվերթում էժան գնով քանի տոմս կարող է լինել, բայց ամեն դեպքում Գյումրի-Մոսկվա 7000-դրամանոց  ավիատոմսը կարող է ազդարարել Հայաստանի ավիացիոն հեղափոխության սկիզբը: Սպասենք առաջին թռիչքին: Դավիթ  Մանուկյան