Կարեն Կարապետյանը բացում է խաղաքարտերը

ՀՀԿ-ում կենացները քաղցրանում են։ Վարչապետ Կարեն Կարապետյանը երեկ դիմում է ներկայացրել ՀՀԿ-ին անդամակցելու համար եւ ընդամենը մեկ օր հետո պարզվում է, որ Կարապետյանի այդ քայլին հետեւել են ավելի քան 7000 քաղաքացի։ «ՀՀԿ-ին անդամակցելու վարչապետի որոշումից հետո դիմում գրողների շատ մեծ հոսք է նկատվում կուսակցություն: Միայն երեկ երեկոյից մինչև այս պահը 7 հազարից ավելի քաղաքացիներ դիմում են ներկայացրել անդամակցելու ՀՀԿ-ին»,- հայտարարել է կուսակցության մամլո խոսնակ Էդուարդ Շարմազանովը։ Ամենակրեատիվ երեւակայությամբ անգամ դժվար է պատկերացնել, որ երեկ ողջ օրը ՀՀԿ կուսակցական գրասենյակների առջեւ հերթեր են գոյացել, մարդիկ բան ու գործները թողած լսել են, որ Կարեն Կարապետյանը անդամագրվում է ՀՀԿ-ին, շտապել են հետեւել կուռքի արարքին եւ խնդրել են իրենց էլ ընդգրկել այն կուսակցության շարքերում, որին քիչ առաջ անդամագրվեց Կարեն Կարապետյանը: Անշուշտ, խոսքը պարզ հավաքագրման մասին է, Կարեն Կարապետյանն ամենայն հավանականությամբ հորդորել է այսպես կոչված «գազավիկներին» քաղցրացնել նոմենկլատուրայի շքերթը ու ավելի հանդիսավոր դարձնել կուսակցության նոյեմբերի 26-ին սպասվող համագումարը, որը նախընտրական մարաթոնի մեկնարկ է դառնալու։ Սա նշանակում է, որ Կարեն Կարապետյանը վեց ամիս հետո չի հեռանալու ու եկել է, որ երկար մնա։ Թեպետ վարչապետ նշանակելու առաջին օրերին բոլորը նրան «ժամանակավոր» վարչապետ էին կոչում՝ կանխագուշակելով, որ 2017-ի խորհրդարանական ընտրություններից հետո նա ու իր թիմը կհեռանան՝ կատարելով իրենց առաքելությունը եւ ընտրություններից առաջ բարձրացնելով ՀՀԿ-ի վարկանիշը։ Այնինչ ոչ միայն Կարապետյանն ու իր բերած անկուսակցական նախարարներն են դառնալու ՀՀԿ-ական, այլ հազարավոր քաղաքացիներ։ Կարապետյանի հանրապետականացումը հանդիսանում է նույն այն գործընթացի տրամաբանական շարունակությունը, որը սկիզբ էր առել դեռևս ամիսներ առաջ. տնտեսական լծակներին տիրապետելուց հետո Կարապետյանն իր տրամադրության տակ է առնում քաղաքական լծակները: Կարապետյանի հետ տեղի է ունենում այն, ինչ տարիներ առաջ Սերժ Սարգսյանի։ Հատկանշական է նաեւ վաղվա համագումարին հրավիրյալ կուսակցությունների ցանկը, ապագա իշխանության գործելաոճն ըստ ամենայնի չի տարբերվելու ներկայից։ Հրավիրյալների թվում են ոչ միայն ՀՀԿ-ի հաճախորդ կուսակցությունները՝ Վազգեն Մանուկյանի , Խոսրով Հարությունյանի, Արտաշես Մամիկոնիչի, Բաբուխանյանի եւ այլոց, այլեւ պոտենցիալ հաճախորդացուների՝ «Հայաստանի ռամկավար-ազատական» կուսակցություն, Վահան Բաբայանի «Ռեֆորմիստներ» -ը, նախկին վարչապետ Տիգրան Սարգսյանի հովանավորյալ Նարեկ Գալստյանի ՍԴՀ-ն եւ ուրիշ երիտասարդ կարիերիստներ։ Անի Սահակյան