Իշխանափոխության հո՞ղ , թե առաջ կգա պլան Բ-ն
ՀՀ վարչապետ Կարեն Կարապետյանի հանրապետականացումը թերեւս այլընտրանք չունի, նրա հետ ՀՀԿ-ի մկրտությունը կստանան նաեւ իր թիմը, նոր ու տեխնոկրատ նախարարները։ Կառավարության այսօրվա նիստում Կարեն Կարապետյանը հայտարարել է, որ ՀՀԿ-ին անդամակցելու դիմում է ներկայացրել: «Այսօր ես դիմում եմ ներկայացրել ՀՀԿ-ին անդամագրվելու համար, ինչը տրամաբանական է»,- ասել է նա ու հիմնավորել այդ տրամաբանությունը, ասել, որ վարչապետի պաշտոնին իրեն հրավիրել է ՀՀԿ նախագահ Սերժ Սարգսյանը, և, բացի այդ, այդ որոշումը կայացնելու համար մի շարք պատճառներ կան: Մինչ դեռեւս անկուսակցական վարչապետի բերած պատճառները քննելը, պետք է ասել, որ ՀՀԿ դառնալու Կարապետյանի որոշումը, անկասկած, հանրության ստվար զանգվածներում հիաստաթության ալիք է բարձրացնելու։ Երբ Կարեն Կարապետյանին վարչապետ նշանակեցին, հայտարարում էին, որ նա եկել է արմատական բարեփոխումներ անելու նպատակով, դրանով էր պայմանավորված նաեւ կառավարության հին կազմը արմատապես փոխելու վարչապետի որոշումը, որի արդյունքում պաշտոնանկ արվեցին անգամ ազդեցիկ նախարարներ, Սերժ Սարգսյանի սիրելիներ, որոնք, հարկ է նշել, բոլոր ընտրություններին գործող նախագահի ու նրա թիմի վերարտադրության երաշխավորներն են եղել։ Հիմա Կարապետյանը համալրելու է այն կուսակցության շարքերը, որը տարիներ շարունակ երկիրն այն աստիճանի է հասցրել, որ արմատական բարեփոխումների հրամայական է կախվել։ Հանրության ստվար զանգվածների մոտ սին հույսեր կային, թե Կարապետյանը ՀՀԿ-ի հետ չի ասոցացվում ու դեռ ավելին՝ եկել է ՀՀԿ-ի ավերածությունները նորոգելու առաքելությամբ։ Թեպետ իրականում Կառավարությունն իրագործում է ՀՀԿ-ի ծրագիրը եւ առանց կուսակցական մանդատի էլ հասկանալի է, որ մեծ տարբերություն չկա ՀՀԿ-ի ու Կարապետյանի միջեւ։ Գալով ՀՀԿ-ական դառնալու մյուս պատճառներին, անշուշտ, վարչապետն իրատեսորեն ընդունել է, որ «յուրաքանչյուր Կառավարություն պետք է ունենա քաղաքական հենարան, եւ իրենց Կառավարությունը եղել է ՀՀԿ-ի Կառավարությունը»: «Երրորդ, եթե հաշվի չառնենք առաջին երկու կետերը իմ կողմից նշված, ոմանց մոտ կարող է լինել տեսական հարցադրում, թե ինչու չենք կարող ստեղծել, կամ հիմնադրել մեկ այլ կուսակցություն, որը կարող էր լինել մեր հենարանը, ամենեւին դա արդարացված չէր լինի: Ունենալով Արցախի հիմնախնդիրը, մեր երկրի անվտանգությանն ուղղված սպառնալիքներ, մենք պետք է բոլորս զերծ մնանք հնարավոր բոլոր նմանատիպ զարգացումներից»,- ուշագրավ մեկնաբանություն է արել նա՝ շահարկելով Արցախի խնդիրը։ Լինելով արցախցի՝ Կարեն Կարապետյանը պետք է, որ լավ իմանա, թե որն է Արցախի խնդրի հաջողության բանալին, գրավականը, եւ հատկապես ապրիլյան պատերազմից հետո այդ համատեքստում սրի պես կախված է մեր գլխին ուժեղ տնտեսություն ունենալու հարցը, իսկ ուժեղ տնտեսության նախապայմանը լեգիտիմ իշխանություններն են, արդար ընտրություններն ու առողջ ընդդիմության գոյության փաստը։ Հայաստանում վերջին առնվազն 15 տարիներին արդար ընտրությունների ու լեգիտիմ իշխանությունների հարցը մնացել է չլուծված, «իշխանափոխություն» եղել է ոչ թե ընտրությունների միջոցով, այլ այսպես կոչված ներսից, ՀՀԿ-ում, կամ իշխանական հիերարխիայում փոխվել են դերակատարներ։ Չի բացառվում, որ Կարեն Կարապետյանի մուտքը ՀՀԿ-ն հենց իշխանափոխության համար է հող պատրաստում ։ Նկատենք, որ Կարապետյանը ընդգծել է իր վերաբերմունքը ՀՀԿ-ի վերաբերյալ ասելով. «Ըստ իս ՀՀԿ-ն այն կուսակցությունն է, որը հաշվի առնելով առկա մարտահրավերները, որոշել է փոխվել, եւ ունի իր մեջ այդ ներուժը»։ Թեպետ իսկզբանե էլ պարզ էր Կարապետյանի ու ՀՀԿ-ի սերտ կապը, որ Կարապետյանը սերտ կապերի մեջ է ինչպես քաղաքական, այնպես էլ օլիգարխիկ շրջանակների հետ։ Մյուս կողմից՝ Սերժ Սարգսյանի պաշտոնավարման ժամկետին դեռ 2 տարի կա ու միայն բարձրյալին է հայտնի, թե այս ընթացքում ինքան ջրեր կհոսեն ու Սերժ Սարգսյանը ինչ պլաններ կմշակի ապագայի համար։ Այսքանով հանդերձ Կարապետյանի եւ թիմակիցների անդամակցության հարցն ու դրա մասին հիմնավորումները մեկ անգամ էլ ցցուն են դարձնում ՀՀԿ-ի՝ իբրեւ արժեզրկված կուսակցության իրողությունը ու, որ այդ կուսակցություն անդամագրվում են՝ չիմանալով կուսակցության գաղափարախոսության մասին, ու առհասարակ՝ չունենալով բացատրություն, թե ինչու են անդամագրվում։ Բացի վարչապետից, ՀՀԿ-ի շարքերը համալրելու դիմում ներկայացրած նախարարները ասել են, թե ծանոթ չեն կուսակցության գաղափարախոսությանը, իսկ վարչապետը վստահեցրել է, որ այն իրեն «հոգեհարազատ» է։ Անի Սահակյան
Հետևեք մեզ Viber-ում
