Մոսուլի մերձակայքում հայտնաբերվել են եզդիների զանգվածային գերեզմանոցներ

Իրաքյան Մոսուլ քաղաքի մերձակայքում հայտնաբերվել է եզդիների 2 զանգվածային գեերեզմանոց, որում եղել է մոտ 20 դի, հայտնում է Al Arabiya-ն՝ նկատելով, որ եզդի փոքրամասնության հազարավոր ներկայացուցիչներ սպանվել և առևանգվել են «Իսլամական պետություն» ահաբեկչական խմբավորման կողմից: Նշվում է, որ զանգվածային գերեզմանոցները հայտնաբերվել են քրդական զորամիավորումների՝ փեշմերգայի կողմից: Աղբյուրը հավելում է, որ առայսօր ԻՊ վերահսկողության տակ եղած տարածքներում հայտնաբերվել է  եզդիների 29 զանգվածային գերեզմանոց: Հայտնի է, որ իսլամիստ ահաբեկիչները 2014թ. ամռանը իրաքյան Սինջար շրջանում սպանել, առևանգել և գերեվարել են հազարավոր եզդիների: ՄԱԿ-ը տեղի ունեցածը որակել է ցեղասպանություն: Նշվում է, որ ներկայում ԻՊ հսկողության տակ գտնվող տարածքներում ապրում  է մոտ 3.500 եզդի՝ մեծամասամբ կանայք ու երեխաներ: