Այս երկիրը ղեկավարում է ոչ թե Եվրոպական խորհրդարանը, այլ՝ Թուրքիայի կառավարությունը. Էրդողան
Թուրքական Anadolu լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը, ելույթ ունենալով Ստամբուլում, հայտարարել է, որ ներկայումս երկրի մղած պայքարը կարելի է որակել որպես «Ազատագրական պատերազմի նոր փուլ»։ Նրա խոսքերով՝ այդ պատերազմը միաժամանակ տարվում է մի շարք ճակատներով՝ ռազմական, քաղաքական, դիվանագիտական, տնտեսական ու սոցիալական ոլորտներում։ Էրդողանն ընդգծել է, որ հուլիսի 15-ին իրականացված ռազմական հեղաշրջման փորձի ժամանակ զոհվել է Թուրքիայի 248 քաղաքացի, որոնցից 36-ը՝ Բոսֆորի կամրջի վրա, վիրավորվել է ևս 2193-ը. «Նման պայմաններում Թուրքիայից պահանջում են չպայքարել ահաբեկչական կառույցների դեմ, ինչը համարժեք է երկիրն ահաբեկիչների գթասրտության հանձնելու կոչ հնչեցնելուն։ Դիմում եմ Եվրոպական խորհրդարանին, դուք աջակցում եք ահաբեկիչներին։ Եվրոպական խորհրդարա՛ն, իմացի՛ր քո տեղը։ Այս երկիրը ղեկավարում է ոչ թե Եվրոպական խորհրդարանը, այլ՝ Թուրքիայի կառավարությունը»։
Հետևեք մեզ Viber-ում
