ԱՄՆ-ում կալանավորվել է երկու մարդ Ադրբեջան զենքի ապօրինի մատակարարումների համար

Turan լրատվական գործակալության փոխանցմամբ՝ ամերիկյան Sun-sentinel.com առցանց պարբերականը հայտնել է զենքի ապօրինի առևտրի համար Իսրայելի քաղաքացու ու Բելառուսից ժամանածի ձերբակալման մասին։ Հենրի Շուշանն ու Վենիամին Գոլինկինը մեղադրվում են մի շարք երկրներ, այդ թվում նաև Ադրբեջան, Իրաք, Սուդան, Կոլումբիա և այլ երկրներ զենքի ապօրինի մատակարարումներ կազմակերպելու համար։ Հետաքննությունների դաշնային բյուրոն (FBI) նրանց սկսել էր հետևել դեռ երկու տարի առաջ։ FBI-ի աշխատակիցները ներկայացել են որպես Սիրիայից ու Իրաքից գնորդներ և պատվիրել են հրետանային փոքր համակարգեր։ Շուշանը վերջին երկու տարում այցելել է մի շարք երկրներ՝ ներառյալ Ադրբեջան, ուր ստացել է տարբեր տիպի զենքերի պատվերներ։ Օրինակ, նոյեմբերի սկզբին Ադրբեջանից նրան փոխանցվել է 170.000 դոլար, 5000 հատ M4 ավտոմատ հրացան գնելու համար։ Գոլինկինի դերը կայացել է ապրանքի որակի հստակեցումը և փողի փոխանցման հարցերի լուծումը, քանի որ ավելի վաղ ամերիկյան բանկն արգելափակել է Շուշանի համար 800.000 դոլար փոխանցելը։ FBI-ի աշխատակիցները մի քանի ամիս վերահսկել են Շուշանի բանակցություններն ու շփումները պոտենցիալ գնորդների հետ, նրան նոյեմբերի 15-ին կալանավորել են Գոլինկինի հետ։