Գլխավոր դատախազը բացթողումներ է նկատել Վալերիկ Մուրադյանի քրգործում

Ի թիվս այլ քաղաքացիների, այսօր կառավարության շենքի առջև էին հավաքվել բանակում խաղաղ պայմաններում զոհված զինծառայողների մայրերը։ «Ա1+»-ի հետ զրույցում 2010 թվականին Արցախի զորամասերից մեկում մահացած Վալերիկ Մուրադյանի մայրը՝ Նանա Մուրադյանը, ասաց, որ գլխավոր դատախազ Արթուր Դավթյանն օրերս ընդունել է հինգ մայրերի։ Անձամբ տիկին Մուրադյանին Արթուր Դավթյանը խոստացել է հանել քրեական գործը կասեցված վիճակից։ «Որդուս մահվան քրգործը կասեցրել են, մենք բողոք էինք ներկայացրել կասեցման դեմ, որը նոյեմբերի 7-ին մերժեցին։ Մենք այս հինգ մայրերով պահանջել էինք հանդիպում նորանշանակ գլխավոր դատախազի հետ, օրեր առաջ նա մեզ ընդունեց։ Ես մտա նրա մոտ, ներկայացրեցի այն նյութերը, ինչ որ կա իմ ձեռքին, բոլոր հակասությունները, եւ գլխավոր դատախազն ասաց, որ, այո, բացթողումներ եւ հակասություններ տեսնում եմ, խոստացավ գործը կասեցումից հանել ու վերսկսել քննությունը»։ Բայց սա Նանա Մուրադյանի միակ պահանջը չէ։ Նա պահանջում է պատժել իր որդու մահվան բոլոր մեղավորներին, քանի որ համոզված է՝ որդին ինքնասպան չի եղել։ «Քննիչը ոչնչացրել է կարևոր իրեղեն ապացույցը՝ որդուս կոշիկները։ Եթե նա նման բան է արել, նշանակում է՝ դիտավորություն ունի, որ գործը մտնի փակուղի»։