Երիտասարդները չպիտի անընդհատ մտածեն լուրջ խնդիրների մասին

Ներկայացնում ենք «Առավոտ» թերթի խմբագրականից մի հատված. «Վերջերս համացանցում հուզմունքով կարդացի, որ ոմն Մերի (ազգանունն արդեն չեմ հիշում) ներկել է իր մազերը: Քանի որ այդ լուրը «վերարտադրվել է» մի քանի կայքերում, ենթադրում եմ, որ Մերին ունի հազարավոր երկրպագուներ, որոնք անտարբեր չեն իր մազերի գույնի հանդեպ և ամեն անգամ ցնցվում են, երբ այդ գույնը փոխվում է: Դա է վկայում նաև «like»-երի և քննարկումների քանակը: Դա նորմալ է՝ մարդիկ, հատկապես երիտասարդները, չպիտի անընդհատ մտածեն լուրջ խնդիրների մասին, նրանք պիտի ունենան ժամանցի, զվարճանալու հնարավորություն: Ով ինչպես է զվարճանում՝ դա կախված է ճաշակից և մտահորիզոնից: Բայց նորմալ չէ, երբ ժամանցի, զվարճանքի համար նախատեսված լուրերը մատուցվում են որպես լուրջ, ազգի համար բեկումնային նշանակություն ունեցող և շաբաթներով ու ամիսներով «ծամծմվում են», այսպես ասած, տատանվում են «այո»-ի և «ոչ»-ի արանքում:   Կարծում եմ, որ մեր հասարակության և լրատվամիջոցների առնվազն մի մասը պետք է կատարի հաջորդ քայլը դեպի հասունություն և խոսի ոչ միայն այն մասին, թե ինչ կա, այլև այն մասին, թե ինչպես պետք է լինի: Այսինքն՝ ոչ թե անձերի, այլ սկզբունքների, ինստիտուտների, մեխանիզմների մասին: Այդ պարագայում «բարձրաշխարհիկ» լուրերն, ըստ երևույթին, կնահանջեն երկրորդ պլան»,–գրում է թերթի խմբագիրը։   Ամբողջությամբ՝ թերթի այսօրվա համարում։