Մանուկ հասակում հարևանի սամակատ քշողները, կամ ովքեր են գողացել բանակի փողերը.Վարդան Բոստանջյան
«Երկրի վիճակը վիճակ չէ, և հերթական անգամ հասարակությանն ապակողմնորոշելու համար բոլոր հնարավոր ու անհնար տեղերում քննարկում են 1000 դրամների հարցը: Իսկ սա իրեն հարգող երկրի համար շատ ամոթալի բան է: Ես կարծում եմ, որ սա ցանկացած իրեն հարգող երկրի համար ամոթ բան է: Ինչ հազար դրամի մասին է խոսքը»: Այս մասին, այսօր Հայելի ակումբում հրավիրված մամլո ասուլիսի ժամանակ նշեց տնտեսագետ Վարդան Բոստանջյանն անդրադառնալով հազար դրամների նախագծին: «Երկրում բազմաթիվ խնդիրներ ունենք, իսկ իշխանությունները ժողովրդին ասում են՝ փող տվեք զինվորին պահելու համար: Սա արված է ժողովրդին հիմարացնելու համար, սա փուչ խոսակցություն է: Եթե իշխանությունն այդքան հուզված էր, նախևառաջ ՊՆ-ի 100 հազար դոլարանոց մեքենաները պետք էր վերացնել: Մարդիկ կային մանուկ հասակում երազում էին հարեւանի սամակատը քշել, հիմա հարյուր հազար դոլարանոց մեքենա են վարում: Ես չեմ ասում հաշվեհարդար տեսնել, որոշ պաշտոնայների դնել ու գնդակահարել, ուղղակի միջոցներ յուրացրած մարդկանց մենք ասում ենք՝ ձեր վերցրածը բերեք, տեղը դրեք»,- ասաց տնտեսագետը: Նա նշեց, որ մտացված ձեւով է այս ամենը արված, որպեսզի մոլորեցնեն հասարակությանը: Վարդան Բոստանջյանն ասուլիսին ներկա ԱԺ ՀՀԿ խմբակցության պատգամավոր Վարդան Այվազյանից հետաքրքրվեց՝ էս տիեզերական գաղափարն ո՞ւմ մոտ ծագեց, սա հարաբերականության տեսությանը հավասար տեսություն է: Ի պատասխան՝ պատգամավորը նշեց՝ հաստատ ոչ Էյնշտեյնի: Բոստանջյանը կարծիք հայտնեց, որ պետք է բանակի փողերը թալանողները պատժվեն: «Ով, որ գողացել է, թող ետ բերի, միանշանակ այդ կարծիքի եմ»,- արձագանքեց Այվազյանը: «Կան վեհ գաղափարներ, Արցախի հետ կապված խնդիրը, ցեղասպանության խնդիրն է, բանակ, պետություն: Խոսքը գնում է պետական տուրքի մասին, դրանում յուրաքանչյուր քաղաքացու մասնակցության մասին:Կարող է ժամանակի ընթացքում մտցնեն դրույթ, որ ով չի ցանկանում վճարել, թող դիմում գրի ու հրաժարվի, դե տեսնեմ քանի հոգի դիմում կգրի:Սա ազգ-բանակ գաղափարախոսության իրականացման կողմերից մեկն է»,- ասաց Այվազյանը: Լրագրողների դիտարկմանը որ ժողովուրդը չի վստահում իշխանություններին, քանի որ բոլորը գողանում են, Վարդան Այվազյանը պատասխանեց. «Եթե անգամ ես գողացել եմ, համենայն դեպս ստեղ ներկայացնողների շատերի պապաներից ավելի քիչ եմ գողացել: Ես էլի եմ ասել, պետք է ստուգել, ով գողացել է պետական բյուջեից, պետք է ձեռքերը քոքից կտրել, ես դրան կողմնակից եմ»- ասաց նա: Փայլակ Ֆահրադյան
Հետևեք մեզ Viber-ում
