Լուծարումների և կրճատումների հերթը հասավ մարզադպրոցներին
ՀՀ կառավարությունը սկսում է ՊՈԱԿ-ների լուծարման և միավորման գործընթացը: Ընդ որում, այս անգամ լուծարման ալիքը, պետական կառավարման գործառույթներով օժտված ՊՈԱԿ-ներից բացի, հասել է նաև մարզական դպրոցներին: Կառավարության նոյեմբերի 18-ի նիստի օրակարգում ընդգրկված են մի քանի մարզադպրոցների վերամիավորման և լուծարման հարցեր: Մասնավորապես նախատեսվում է, որ «Գեղարվեստական մարմնամարզության և ակրոբատիկայի օլիմպիական մանկապատանեկան մարզադպրոցը» վերակազմակերպել՝ այն միացնելով «Հրանտ Շահինյանի անվան մարմնամարզության օլիմպիական մանկապատանեկան մարզադպրոցին»: Մեկ այլ որոշմամբ՝ կվերամիավորվեն «Աթլետիկայի օլիմպիական մանկապատանեկան № 2 մարզադպրոց»-ն ու «Աթլետիկայի օլիմպիական մանկապատանեկան № 1 մարզադպրոց»-ը, որոնց հենքով կստեղծվի «Աթլետիկայի օլիմպիական մանկապատանեկան մարզադպրոց» ՊՈԱԿ-ը: Իսկ Ջրվեժի մենապայքարային մարզաձևերի մանկապատանեկան մարզադպրոց»-ը նախատեսվում է միացման ձևով վերակազմակերպել` միացնելով «Գառնիի Ռազմիկ Կարապետյանի անվան մենապայքարային մարզաձևերի օլիմպիական մանկապատանեկան մարզադպրոց»-ին, որն այսուհետ կկոչվի «Ռազմիկ Կարապետյանի անվան մենապայքարային մարզաձևերի օլիմպիական մանկապատանեկան մարզադպրոց»: Թե որքան գումար է տնտեսվելու այս միավորումների արդյունքում, և քանի աշխատող է կրճատվելու, կառավարության նիստի օրակարգում ընդգրկված նախագծերի հիմնավորումների մեջ ներկայացված չէ: Բացի այս առաջիկա նիստի օրակարգում ներառված են 3 ՊՈԱԿ-ների լուծարման մասին նախագծեր: Ըստ այդմ՝ առաջիկա օրերին կդադարեցվի նախկին քաղաքաշինության նախարարության կազմում գործող «Քաղաքաշինական ծրագրերի իրականացման գրասենյակ» ՊՈԱԿ-ը և ֆինանսների նախարարության «Գնագոյացման վերլուծական ինֆորմացիոն կենտրոնի» գործունեությունը: Նախատեսվում է նաև լուծարել տնտեսական զարգացման և ներդրումների նախարարության «Էկոնոմիկա հանդես» ՓԲԸ-ն: «Էկոնոմիկա հանդեսը» 12 աշխատակից ունի, պետական բյուջեից տարեկան ստանում է 99 մլն 312 հազար դրամ ֆինանսավորում, որի մոտ 46 տոկոսը կազմում են աշխպատավարձերը, իսկ 54 տոկոսը՝ այլ ծախսերը: Ֆինանսների նախարարության «Գնագոյացման վերլուծական ինֆորմացիոն կենտրոն» ՊՈԱԿ-ը 36 աշխատակից ունի, բյուջեից տարեկան հատկացումը 80 մլն 315 հազար դրամ է: Ֆինանսների նախարարությունն առաջարկում է, ՊՈԱԿ-ի փոխարեն, ստեղծել «Գների ուսումնասիրության և վերլուծության գործակալություն»՝ 15 հաստիքով և տարեկան 30 մլն ՀՀ դրամ բյուջեով: Լրագրողների հետ զրույցում ֆինանսների նախարար Վարդան Արամյանը հայտարարել է, որ ֆինանսների նախարարության ենթակայության տակ գտնվող այս երկու ՊՈԱԿ-ների լուծարման արդյունքում 150-200 մլն դրամ գումար, փոխարենը գործազուրկ կդառնա շուրջ 50 մարդ: Իսկ թե քանի մարդ գործազուրկ կմնա, և որքան գումար կխնայվի «Քաղաքաշինական ծրագրերի իրականացման գրասենյակի» լուծարման արդյունքում, հայտնի չէ, քանի որ այս գրասենյակի ֆինանսավորման մասին տեղեկություններ կառավարության կայքում չկան: «Մարդկանց կրճատելը շատ բարդ բան է, որովհետև մենք շատ լավ գիտակցում ենք, որ այդ մարդիկ ընտանիք ունեն: Բայց երկու երնեկ մի տեղ չի լինում: Հնարավոր չէ ունենալ արդյունավետ տնտեսություն, արդյունավետ տնտեսական, ծախսային քաղաքականություն՝ առանց ցավոտ քայլերի: Պետք է որոշակի քայլեր անել, որոնք կլինեն ցավոտ, բայց կարևոր,- հայտարարել է ֆինասների նախարար Վարդան Արամյանը և շարունակել:- Եթե մարդը նստած իր աթոռին ստանում է եկամուտ ու ոչ մի արժեք դրա դիմաց չի ստեղծում, ես՝ որպես ֆինանսների նախարար, դրա նկատմամբ անտարբեր չպետք է լինեմ :Ես ներողություն եմ խնդրում փողոցում հայտնված բոլոր այն մարդկանցից, որոնց մենք ստիպված ենք ազատել աշխատանքից: Բայց խնդրում եմ ըմբռնումով մոտենալ, որովհետև մենք որևէ անձնական բան չունենք նրանց դեմ»: Ի տարբերություն մարզադպրոցների՝ վերջին երեք ՊՈԱԿ-ների լուծարման անհրաժեշտությունը թերևս հասկանալի է, այնուամենայնիվ, կառավարությունն ի՞նչ է առաջարկում գործազուրկ դարձած քաղաքացիներին՝ արտագա՞ղթ: Ինչ վերաբերում է մարզադպրոցներին, ապա դրանք վստահաբար փակվում եմ երեխաների սակավության պատճառով: Իսկ դա հայրենի իշխանությունների վերջին տանսամյակում վարած «փայլուն» քաղաքականության հետևանքն է: Դավիթ Մանուկյան