Երաշխիք Կրեմլին՝ 17 թվականի ընտրություններին ընդառաջ
Սերժ Սարգսյանը «Ռոսիա սեգոդնյա» միջազգային լրատվական գործակալության գլխավոր տնօրեն Դմիտրի Կիսելյովին՝ Sputnik Արմենիայի համար տված բացառիկ հարցազրույցում, անդրադառնալով ապրիլյան պատերազմին և Ռուսաստանի դերակատարությանը, ուշագրավ հայտարարություն է արել: Ապրիլյան պատերազմի ժամանակ Ռուսաստանի միջնորդության վերաբերյալ Կիսելյովի հարցին Սարգսյանը պատասխանել է այսպես. «Համենայն դեպս, Հայաստանի գլխավոր շտաբի պետը և Ադրբեջանի գլխավոր շտաբի պետը հանդիպեցին Մոսկվայում և հենց այնտեղ պայմանավորվեցին դադարեցնել մարտական գործողությունները և վերադառնալ 1994թ-ի հրադադարի մասին պայմանագրին։ Անկեղծ ասած` ես մանրամասները չգիտեմ, տեղյակ չեմ, թե ինչի մասին են խոսել, եղե՞լ է արդյոք զրույց Ռուսաստանի և Ադրբեջանի նախագահների, պաշտպանության նախարարների միջև։ Բայց ես հստակ գիտեմ, որ եղել է զրույց իմ և Վլադիմիր Պուտինի միջև, և նրա խոսքերն ուղղված են եղել հարցի խաղաղ կարգավորմանը, դա շատ կարևոր է»։ Սերժ Սարգսյանի այս հայտարարությունը չափազանց տարօրինակ է. ինչպե՞ս կարող էր գերագույն գլխավոր հրամանատարը տեղյալ չլինել, թե Հայաստանի գլխավոր շտաբի պետը ի նչ է խոսել Ադրբեջանի գլխավոր շտաբի պետի հետ: Սերժ Սարգսյանի ապշեցուցիչ «անտեղյակությունը» լրացուցիչ հարցեր է առաջացնում: Ըստ էության՝ գլխավոր շտաբի պետը պետք է որ Մոսկվա գործուղված լիներ Սերժ Սարգսյանի կողմից: Հասկանալի է, որ ռազմական գործողություններն, ընդ որում, այն փուլում, երբ մեր բանակն արդեն անցնում էր հակահարձակման, կանգնեցրել է Պուտինը: Հետապրիլյան հրադադարն այսօր ավելի խարխուլ և անվստահելի է, քան կար 1994 թվականից ի վեր: Սերժ Սարգսյանը նորից վերահաստատել է, որ Հայաստանը ինչպես նախկինում այնպես էլ այսօր, պատրաստ է վերադարձնել Արցախի ազատագրված տարածքները՝ Ղարաբաղի կարգավիճակի դիմաց. «Այսինքն` հայկական կողմերը` Լեռնային Ղարաբաղն ու Հայաստանը, թողնում են այն տարածքները, որոնք վերցված են որպես անվտանգության գոտի, այն տարածքները, որոնք ադրբեջանցիներն անվանում են բռնազավթված։ Թողնում ենք տարածքները, հեռանում: Բայց այնտեղ առաջին կետում հստակ գրված էր, որ Լեռնային Ղարաբաղի վերջնական իրավական կարգավիճակը որոշվելու է Լեռնային Ղարաբաղի ժողովրդի ազատ կամարտահայտման միջոցով։ Այդ ազատ կամարտահայտումը պարտադիր իրավաբանական ուժ ունի, այնուհետև գրված էր, թե ով է մասնակցում, որն է օրակարգը։ Այսինքն` հանրաքվե։ Դա ինքնորոշման սկզբունքի մարմնավորումն էր, բայց ամեն անգամ ադրբեջանական կողմը նոր պահանջներ էր առաջադրում»,- ասել է Սերժ Սարգսյանը։ Նրա խոսքով` հայկական կողմը մինչև հիմա էլ պատրաստ է վերադառնալ այդ փաստաթղթին։ «Բայց մեր պատրաստակամությունը ոչինչ չի նշանակում, որովհետև նման դեպքերում պետք է պատրաստ լինեն կողմերը, այլ ոչ թե մեկ կողմը։ Բացի այդ, ապրիլյան իրադարձությունները ցույց տվեցին, որ առկա է զրոյական վստահություն, ընդհանրապես չկա վստահություն»,- հայտարարել է Սերժ Սարգսյանը: Այս կարգի հայտարարություն Հայաստանի նախագահը առաջին անգամը չէ, որ անում է: Ընդ որում՝ կարգավիճակի դիմաց ազատագրված տարածքների վերադարձի մասին նա, որպես կանոն, խոսում է արտաքին լսարաններին ուղված հրապարակումներում: Կիսիլյովին տված հարցազրույցի դեպքում խնդիրը, կարծես թե, փոխվում է, որովհետև Sputnik Արմենիայից սփռված հարցազրույցը ուղղված է նաև հայաստանյան լսարանին: Խորհրդարանական ընտրություններից առաջ սա Սերժ Սարգսյանի կողմից Կրեմլին տված ապահովության և ազատ գործելու երաշխիք է: Սերժ Սարգսյանը շատ բաց տեքստով հայտարարում է, որ Պուտինն ազատ է միջամտել խնդրի լուծմանը՝ վստահ լինելով, որ առավելագույն զիջումը՝ ազատարգրված տարածքների վերադարձը, իր՝ իշխանության ղեկին լինելու դեպքում, երաշխավորված է: Հայ հասարակությունը կարող է Սերժ Սարգսյանի այս հայտարարությունն ընդունել անկեղծ խոստովանութուն՝ Արցախի խնդրի լուծման հարցում: Տարածքները, որոնց համար մեր զինվորներն այսօր զոհվում են, վերադարձվելու են՝ եթե մի գեղեցիկ օր Բաքուն համաձայնվի կարգավիճակի պահանջին: Հայ ժողովրդի որոշելիքն է՝ իսկ ինքն ընդունու՞մ է այդպիսի լուծումը: Կարինե Սարիբեկյան