«Քաղաքաշինությունը Երևանում որոշում են միայն փողատեր մարդիկ». Կարինե Դանիելյան

«Երևանի քաղաքապետարանն ունի քաղաքաշինական խորհուրդ, որի անդամն եմ վերջին տարիներին, բայց Երևանի պուրակների խնդիրների մասին այնտեղ քննարկումներ չեն եղել: Այսինքն՝ նախագծերը չեն ներկայացվել, ու շատ դեպքերում առանց դրանք ներկայացնելու պուրակներում սկսում են շինարարություն անել: Եթե ներկայացնում են, այնտեղ բավականին էկոլոգիական ՀԿ-ներ կան, որոնք ասում են, որ էկոլոգիային վնաս չպետք է լինի: Ի վերջո, ստացվում է այնպես, որ քաղաքաշինությունը Երևանում որոշում են միայն փողատեր մարդիկ»,- այսօր լրագրողների հետ հանդիպմանը ասաց բնապահպան Կարինե Դանիելյանը: «Օպերայում կուզենան, Հանրապետության հրապարակում կուզենան՝ կիրականացնեն շինարարություն: Դրանով շատ մեծ վնաս է հասցվել քաղաքին, որովհետև հակաէկոլոգիական քաղաքաշինություն է իրականացվել: Նաև սեյսմիկ անվտանգությունն է վնասվել: Հյուսիսային պողոտան կարող է օրինակ ծառայել, թե ինչպես չի կարելի կառուցել»: Դանիելյանի խոսքով՝ մի ձեռքով ստորագրում են կոնվենցիաներ, որ պետք է ադապտացվենք կլիմայի փոփոխությանը, իսկ մյուս ձեռքով՝ քարե անապատ սարքում, քաղաքի վնասներն ու վտանգները մեծացնում: Նրա խոսքով՝ Երևանը պաշտպանված չէ նաև սելավներից. «Կլիմայի փոփոխության պայմաններում սելավների վտանգները խիստ աճել են: Մենք փակեցինք սելավատարը, հիմա այն չի մաքրվում այնպես, ինչպես պետք է, լցվում է աղբով, և այն, ինչ եղավ Թբիլիսիում, կարող է մեզ մոտ էլ լինել: Ուժեղ անձրևների պարագայում ստորգետնյա անցումներն անցնում են ջրի տակ. դա արդեն ահազանգ է քաղաքի համար, որ հասկանան՝ վտանգված է»: