Հայաստանի և Ռուսաստանի միջև ռազմական հարաբերությունները երկկողմանի շահեր են հետապնդում

Այսօր «Հայելի» մամուլի ակումբում ԱԺ ՀՀԿ խմբակցության պատգամավոր Մկրտիչ Մինասյանի և Երևանի մամուլի ակումբի նախագահ Բորիս Նավասարդյանի հետ քննարկվեց ՀՀ նախագահ Սերժ Սարգսյանի հարցազրույցը «Ռոսիա սեգոդնյա» միջազգային լրատվական գործակալության գլխավոր տնօրեն Դմիտրի Կիսելյովի հետ: Ըստ Մկրտիչ Մինասյանի՝ նախագահի պատասխանները Դմիտրի Կիսելյովի հարցերին բավականին արժանապատիվ էին և հստակորեն ներկայացրել են մեր երկրի դիրքորոշումը: Անդրադառնալով եղած ռազմաբազայի և երկրորդի ստեղծման մասին հարցադրմանը՝ Մկրտիչ Մինասյանն ասաց, որ նման հարցադրումները որոշակի նպատակ են հետապնդում: «Նախագահ Սերժ Սարգսյանը հստակ նշեց, որ Հայաստանի պես փոքր երկրում երկրորդ ռազմաբազայի կարիքը չկա: Փոխարենը կարելի է Գյումրիի ռազմաբազան համալրել նոր զինատեսակներով և դրանով հարցին ամբողջական լուծում տալ» - ասաց Մկրտիչ Մինասյանը: Բորիս Նավասարդյանը կարևորեց, այն որ մեր երկրի նախագահը ցույց է տվել, որ Հայաստանը բավականին հետևողական քաղաքականություն է վարում Ադրբեջանի և Թուրքիայի հետ՝ Ղարաբաղի հարցի հանգուցալուծման և Թուրքիայի հետ հարաբերությունների բարելավման համար, սակայն նա կցանկանար ավելի բաց մեկնաբանություններ լսել Ռուսաստանի շահերի մասին: «Ռուսաստանի պես հզոր երկիրը չի կարող մտնել ռազմական համագորակցության մեջ Հայաստանի պես փոքր երկրի հետ՝ միայն ելնելով վերջինիս շահերից: Կարծում եմ, որ Ռուսաստանի շահն այս պարագայում Մերձավոր Արևելքում և Հարավկովկասյան տարածաշրջանում մեծ դեր խաղալն է: Դա հնարավոր է իրականացնել եթե ունես ռազմական լավ ներկայացվածություն, հետևաբար Հայաստանը համարվում է այն վայրը, որտեղ կարելի է լուրջ ռազմական ուժային բռունքց ստեղծել և դրանով ազդել նաև այլ պետությունների վրա» - ասաց Բորիս Նավասարդյանը: Ըստ նրա՝ նման քաղաքականությունը թույլ չի տալիս Հայաստանին արտաքին քաղաքականություն վարել և դրանով իսկ տարածաշրջանի երկրների հետ հարաբերությունները դրվում են ռիսկի տակ: Անդրադառնալով երկրորդ ռազմաբազայի մասին հարցադրմանը՝ Բորիս Նավասարդյանը չբացառեց, որ հնարավոր է երկրորդ ռազմաբազայի առկայությունը Հայաստանում, մասնավորապես՝ Ղարաբաղում, եթե Ռուսաստանն այդպես ցանկանա ելնելով աշխարհագրական իրավիճակից: Լրագրողների այն հարցին, թե արդյոք հարցազրույցի հատկապես Սիրիային վերաբերող հատվածը ռուսական լսարանի համար չէր, Բորիս Նավասարդյանը պատասխանեց այսպես. «Ռուսական լսարանի համար կարևոր էր լսել, որ կան երկրներ, որոնք լիովին պաշտպանում և ընդունում են Ռուսաստանի քաղաքականությունը և ռազմական միջամտությունը Սիրիայում, քանի որ կարող էին կասկածներ լինել, որ Հայաստանը միանշանակ կողմ դիրքորոշում չունի»: Հանդիպման ընթացքում հիմնականում խոսվում էր երկու կողմերի շահերի մասին: Եթե Բորիս Նավասարդյանն ավելի շատ նկատեց Ռուսաստանի շահերը, ապա Մկրտիչ Մինասյանի կարծիքով այս ռազմական հարաբերություններում առաջին հերթին հաշվի են առնվում Հայաստանի շահերը, ապա՝ երկու կողմերի շահերի համադրությունը: Բորիս Նավասարդյանը համաձայնվեց սակայն ասաց, որ որևէ երաշխիք չկա, որ այդ շահերը միշտ համընկնելու են: Մեկ կարծիք թերևս ընդհանուր էր՝ ռազմական ոլորտում որքան սերտ լինի համագործակցությունը Ռուսաստանի հետ, այդքան կամրապնդվի Հայաստանի անվտանգությունը Ադրբեջանի հետ հարաբերություններում: Անդրադառնալով Սերժ Սարգսյանի հարցազրույցի ընդհանուր բովանդակությանը և նպատակին՝ Բորիս Նավասարդյանն ասաց, որ երկու կողմերն էլ իրենց խոսքը տեղ հասցնելու շահագրգռվածություն ունեին: Նախագահ Սերժ Սարգսյանը ներկայացրեց, թե ինչպիսի վիճակում են Թուրքիայի հետ հարաբերությունները և Ղարաբաղի խնդիրը, իսկ Ռուսաստանը ստացավ իրեն հետաքրքրող աշխարհաքաղաքական հարցերի պատասխանները: Տաթևիկ Թահմազյան