ՀՀԿ-ից «տղամարդ» ՄԻՊ են պահանջում

ԱԺ-ն երեկ քննարկում էր «ՄԻՊ ընտրության կարգի» մասին ԱԺ որոշման մեջ փոփոխություն կատարելու մասին նախագիծը: Նոր Սահմանադրությամբ կա նոր կարգ ՄԻՊ ընտրության՝ եթե նախկինում պատգամավորների 1/5-ն էր առաջադրում ՄԻՊ թեկնածություն, ապա հիմա կառաջադրի Պետաիրավական հարցերի հանձնաժողովը, որը կընտրի մեկ թեկնածուի, այն էլ կներկայացվի ԱԺ փակ քվեարկությանը, փոխվել է նաեւ համամասնությունը, նոր ՄԻՊ կունենանք ԱԺ պատգամավորների 3/5-րդի ընտրությամբ: Այս փոփոխությունները գործընկերներին ներկայացրեց հանձնաժողովի նախագահ Հովհաննես Սահակյանը: Հիշեցնենք, որ հունվարի 18-ին նախկին ՄԻՊ Կարեն Անդրեասյանը կրկնեց իր հրաժարականի դիմումը: ՀԱԿ պատգամավոր Նիկոլ Փաշինյանը նկատեց, որ ՀՀԿ-ականները սխալ ձեւակերպումներ են անում, երբ ասում են, թե աննախադեպ էր նախկին օմբուդսմեն Կարեն Անդրեասյանի թեկնածությունը. «Նախորդ օմբուդսմենն էլ է հրաժարական տվել, իսկ առաջինը սկանդալային ֆոնով է հեռացել: Ես ուզում եմ հասկանալ՝ ինչո՞ւ թեկնածուին չպետք է առաջադրի ԱԺ Մարդու իրավունքների եւ հանրային հարցերի մշտական հանձնաժողովը: Դա մոտավորապես նույնն է, թե ՏՄՊՊՀ նախագահի թեկնածություն առաջադրելու լիազորություն ունենա ԱԺ-ն ու նրան առաջադրի ԱԺ Գիտության, կրթության հանձնաժողովը: Այստեղ որեւէ տրամաբանություն գոյություն չունի»: Նիկոլ Փաշինյանը նաեւ ճշտեց՝ արդյոք իշխանությունները հետաքրքրվե՞լ են, թե ինչ տեղի ունեցավ Կարեն Անդրեասյանի հետ, քանի որ շատ լավ աշխատում էր. «Խոսակցություններ կան, որ նրան ստիպել են, հարկադրել են, շանտաժի հետ կապված լուրեր կան, անուններ են նշվում, խոսքը գնում է Վատիկանում ՀՀ արտակարգ եւ լիազոր դեսպան Միքայել Մինասյանի մասին: Եթե այս լուրերը իրականությանը համապատասխանում են, ապա ՄԻՊ-ը անձեռնմխելի ինստիտուտ է, ինչ է նշանակում՝ հարկադրել բեմի հետեւում: Այստեղ հանցակազմ չկա՞, չե՞ք կարծում, որ իրավապահ մարմինները պետք է քննեն այդ գործը»: Լեւոն Զուրաբյանը գիտի, թե ինչու ՄԻՊ-ը հրաժարական տվեց. «Նրա վրա եղան անթաքույց ճնշումներ, նախ՝ պատգամավորի կողմից, հետո ԿԳ նախարարի կողմից»: ԲՀԿ խմբակցության նախագահ Նաիրա Զոհրաբյանի համար էլ էր անհասկանալի՝ ինչպես են Հայաստանում պաշտոնյաները հրաժարական տալիս. «Մեկը գնում է Հունաստան հանգստանալու, հետո իմանում է, որ նախարար չի, մյուսը կառավարության նիստ է անում, մարդկանց հետ հանդիպում է նշանակում, հետո պարզվում է, որ էլ վարչապետ չի: Հիմա էս մեկն էլ ռուբիկ-կուբիկական ռեբուսներով է ուզում հասկացնել, թե ինչու հրաժարական տվեց, դե չենք հասկանում, արի՛ ամբիոնի մոտ կանգնի բացատրի»,- ԲՀԿ-ն առաջարկություն է ներկայացնելու, որ այսուհետ ՄԻՊ-ը հաշվետու լինի ԱԺ-ում: Նաիրա Զոհրաբյանը հիշեցրեց, որ մենք արդեն 20 օր է՝ օմբուդսմեն չունենք եւ հարց է տալիս. «Մի բան փոխվե՞լ է, չէ՛, ես ուզում եմ մենք այնպիսի ՄԻՊ ունենանք, որ նրա բացակայության մեկ օրն էլ ազդի իմ երկրի վրա»: Տարեվերջին ՄԻՊ-ը հաստափոր ու գրագետ զեկույց ներկայացրեց, ինչն էլ պատճառ դարձավ նրա հրաժարականի համար. համոզված է ԱԺ ՕԵԿ խմբակցության պատգամավոր Հեղինե Բիշարյանը: Ըստ նրա՝ Մարդու իրավունքների պաշտպանը խոսեց բոլոր խնդիրների մասին, ինչից հետո էլ սկսեց պատերազմը: Ռուբեն Հակոբյանն էլ հարկ համարեց կարծիք հայտնել՝ ՄԻՊ-ը պետք է հասկանա, որ իր գործը դժվար է եւ չպետք է ոչ մի դեպքում հրաժարական տա. «Այնպիսի մարդ բերեք, որ ոչ մեկից չվախենա, թե չէ՝ խփել են, ծեծել են, վախեցրել են, ես լուրջ չեմ վերաբերվում դրանց: Ծեծում, կաշառում են նրան, ով թույլ է տալիս դա: Այնպիսի մարդ բերեք, որ կարողանա տղամարդավարի ասի՝ օրենք կա»: Ռուբիկ Հակոբյանը առաջարկեց, որ ՄԻՊ-ի երդման մեջ ավելացնեն՝ «երդվում եմ՝ հրաժարական չեմ տալու արտահայտությունը»: ՀՀ Աժ պատգամավոր, Ազատ դեմոկրատներ կուսակցության նախագահ Խաչատուր Քոքոբելյանն էլ իր մտահոգությունը հայտնեց.«Իմ գործընկերների այն տեսակետը, որ միայն պետաիրավական հանձնաժողովի քվեարկության արդյունքում մեկ թեկնածու է քվեարկվելու ԱԺ-ում, իրոք մտահոգիչ է, քանզի եթե դա դիտարկենք զուտ տեխնիկական խնդիր անգամ, միևնույն է հանրապետական մեծամասնությունը հանձնաժողովում քվեարկելու է և պատկերը պարզ է լինելու, իսկ եթե երկու հոգի լինեն, պատկերը լրիվ այլ կլինի: Իհարկե, դրական եմ համարում այն մոտեցումը, որ որդեգրել է հանձնաժողովը, որ յուրաքանչյուր պատգամավոր կարող է առաջադրում անել, բայց ես կարծում եմ և առաջարկում, որպեսզի հանձնաժողովում առավելագույն ձայներ հավաքած առնվազն երկու թեկնածուներին ներկայացնեն Ազգային ժողովի լիագումար նիստի քննարկմանն ու քվեարկմանը»,- իր առաջարկը հիմնավորեց Խաչատուր Քոքոբելյանը: Անի Սահակյան