Դինքի մարդասպանը սպառնացել է այլևս ցուցմունք չտալ

Թուրքական «Ջումհուրիյեթ» պարբերականը հայտնում է,որ  դատարանը մերժել է պոլսահայ հայտնի լրագրող, «Ակօս» թերթի հիմնադիր և գլխավոր խմբագիր Հրանտ Դինքին սպանած Օգյուն Սամասթի`Ստամբուլի թիվ 14 ծանր հանցագործությունների դատարան ուղարկած և իրեն Սիլիվրիի փակ ռեժիմի բանտից բաց ռեժիմի բանտ տեղափոխելու պահանջով խնդրագիրը: Սամասթը, պնդելով իր` պատիժը բաց ռեժիմի բանտում կրելու իրավունքի մասին, նամակում հայտնել էր, որ իր խնդրանքը մերժելու պարագայում նա կհրաժարվի ցուցմունքներ տալուց: Թուրքիայում գործում է փակ ռեժիմի 293 (որոնցից 3-ը մանկական), բաց ռեժիմի 59 քրեակատարողական հիմնարկ, ինչպես նաև կանանց բաց և փակ ռեժիմի 9 քրեակատարողական հիմնարկ: Ստամբուլի թիվ 14 ծանր հանցագործությունների դատարանը, մերժելով Սամասթի պահանջը, նշել է, որ բաց ռեժիմի բանտ տեղափոխվելու գործընթացին իրենք ընթացք տալ չեն կարող, քանի որ բաց ռեժիմի բանտում չեն կարող ապահովել Սամասթի անվտանգությունը։