Կարապետյանը նկատողություն արեց Շաբոյանին
ՀՀ Կառավարության այսօրվա նիստի ժամանակ վարչապետ Կարեն Կարապետյանը նատողություն արեց Տնտեսական Մրցակցության Պաշտպանության պետական հանձնաժողովի նախագահ Արտակ Շաբոյանին: Կարապետյանն անդրադարձավ ՏՄՊՊՀ-ի կողմից 110 միլիոն դրամով տուգանված «Երևան գարեջուր» ընկերությանը: Կառավարության ղեկավարը նշեց, թե չնայած Տնտեսական մրցակցության պաշտպանության պետական հանձնաժողովն անկախ մարմին է, սակայն դա չի խանգարում իրեն կարծիք արտահայտել: Վարչապետը ՏՄՊՊՀ նախագահ Արտակ Շաբոյանին հորդորեց հանձնաժողովի ջանքերն ուղղել առաջնային սպառում ունեցող ապրանքների շուկա, որտեղ քաղաքացիների դժգոհություններն ավելի շատ են: «Հորդորում ենք ջանքերն ուղղել առաջնային սպառման շուկա, որի վերաբերյալ հասարակությունից հնչող դժգոհությունները շատ են: Դա ավելի կարևոր է, քան գարեջրի շուկան, որտեղ կա լուրջ մրցակցություն»,- նշեց Կարապետյանը: Հիշեցնենք, որ «Երևան գարեջուր» ընկերությունը պատկանում է ԱԺ ՀՀԿ խմբակցության գործարար պատգամավոր Հակոբ Հակոբյանին՝ Պիվի Հակոբին: Վերջինս երեկ ԱԺ-ում լրագրողների հետ զրույցում դժգոհել էր Շաբոյանի որոշումից, եւ հայտնել, որ պատրաստվում է դիմել դատարան, ինչպես նաեւ Սերժ Սարգսյանին: Փայլակ Ֆահրադյան
Հետևեք մեզ Viber-ում
