ՀՀԿ-ն դուրս է եկել ռազմաճակատ
«ՀՀ պաշտպանության ժամանակ զինծառայողների առողջությանը կամ կյանքի վնասի փոխհատուցման մասին» կամ 1000 դրամների անվանումը ստացած նախագծի քննարկումը ԱԺ դահլիճը վերածել էր ռազմաճակատի: Ասպարեզ էր դուրս եկել ծանր ՀՀԿ-ի ծանր հրետանին, որի առաջ հայրենասիրական պոպուլիզմի պարարտ հող էր փռվել, որտեղ կարելի էր թավալ տալ սրտի ուզածի չափ, ձեռքի հետ էլ ինքնանվիրվել նորանշանակ նախարար Վիգեն Սարգսյանին: Տարբեր առիթներով գրել ենք, որ ասֆալտային գեներալիտետի կարկառուն ներկայացուցիչ Սեյրան Սարոյանը կարող է հազար տիրոջ ծառայել, եթե դա է պահանջում անձնական երջանկությունն ու բարեկեցությունը, կարող է ժողովրդական գեներալի բան ու բասով պալատական ծաղրածուի դերակատարում ստանձնել, ու ահա չուշացավ մի առիթ ևս, որը գալիս է ապացուցելու ասվածը: Սարոյանը, որը մինչեւ վերջին խազը ծառայում էր նախկին նախարար Սեյրան Օհանյանին ու բոլոր առիթներով զբաղվում իր մարտական ընկերոջ պաշտպանությամբ, հիմա իր ծառայություններն է մատուցում Վիգեն Սարգսյանին: Գեներալ պատգամավորը ԱԺ-ում ստանձնել է նախարարի փաստաբանության գործը ու թուք ու մուր տվել նրա նախաձեռնությունը քննադատողներին <<Հմի կասեք քու ձենտ տաք տեղից է գալիս, քո համար հազար դրամն ինչ փող է, հա իրոք փող չէ: Բայց հազար դրամը հաշվեք, որ ամեն հայ մտել է եկեղեցի, ու երկու հատ մոմ է վառել իր երեխայի համար: Չկա երկրում մի մարդ, ով բանակում երեխա չունի, եթե երեխան չէ ուրեմն մորքուրի տղեն է, քուրն է: Ծեմբոլե մենք էն ազգն ենք, որ քեռու երեխու մասին էլ ենք մտածում: Ինչի մասին է խոսքը, հլը փողը չհավաքած փողերի մասին ենք խոսում: Սարգսյան Վիգենը էդ փողերը իրանց տուն չի տանելու: Ամենահեշտ բանը մարդու վրա ցեխ շպրտելն է>,- ասել է Սարոյանը, ամոթանք տալով գործընկերներին, քանի որ այս քննարկումները իր խոսքով ազրբեջանցիք էլ են տեսնում: Իհարկե, կուշտը չի հասկանա սովածին, Սեյրան Սարոյանը իր հազարավոր մարտական ընկերների բախտակիցը չէ, որոնք հանապազօրյա հացի խնդիր ու դեղորայքի խնդիր ունեն, որոնց մեծ մասն ապրում է վագոն տնակներում, ոմանք էլ գտնվում են բանտախցում, ինչպես Վոլոդյա Ավետիսյանը, որը չէր կիսում իշխանության տեսակետը: Նրա բան ու գործը հիմա միայն Աստծուն փառք տալն ու մոմ վառելն է իր ցոփ ու շվայտ կյանքի ու անծայրածիր հարստության պահպանման համար, որին նա տիրացել է իշխանությանը մատուցած ծառայությունների համար: Հիմա էլ նա հավատում է Վիգեն Սարգսյանին ու նեղվում, որ քննադատում են նախարարին. <<Նույն հարցը մեկ դեմից են ասում, մեկ ետեւից, դե արի նախարար կռուտիտ եղի, որ պատասխանես>>: Պատերազմի դաշտ էր դուրս եկել նաեւ Համլետ Հարությունյանը: Նա մինչեւ հոգու խորքը վրդովվել էր ու անակնկալի եկել, ասում էր, թե չէր սպասում բանակի վերաբերյալ նման ելույթների, չէր պատկերացնում, որ այս <<համաժողովրդական, համազգային օրենքը քաղաքական ռազբորկաների առիթ կհանդիսանա>>: Պատգամավորը սուրբ համարեց նախարարի գաղափարը.<<Սա համազգային տուրքի գաղափարն է, ճանաչելով պաշտպանության նախարարին, կարծում եմ, որ սա ռաջին էտապն է>>: Իրեն չխնայեց նույնիսկ երգչուհի Շուշան Պետրոսյանը, նրա համար հազար դրամի շուրջ ստեղծված աղմուկն անհասկանալի է: Պատգամավորի համոզմամբ` աղմուկ հանողը աղմուկ է հանում, ծառայողն էլ լուռ ծառայում է: «Ես չգիտեմ ավելի կարևոր բան, քան բանակի, զինվորի կողքին լինելն է»,- ասաց Շուշան Պետորսյանը: Նրա խոսքով` այս նախագիծը երկարաժամկետ լուծումներ է ապահովում զինվորի համար, իսկ անվստահության խնդիրը կարելի է լուծել հասարակական վերահսկողությամբ ու թափանցիկությամբ: «Սոցիալապես ավելի անապահովները միշտ ավելի պատրաստակամ են իրենց հնարավորության չափով մասնակից լինել նմանատիպ նախաձեռնությունների։ Ես չգիտեմ ավելի կարևոր բան, քան բանակի, հայ զինվորի կողքին լինելն է։ Նախկին տարիների փորձը ցույց է տալիս, որ հաշմանդամ, զոհված զինծառայողների խնդիրներն ամբողջությամբ լուծում չեն ստացել այն պատճառով, որ դեռևս առկա մեխանիզմները կարճաժամկետ ծրագրեր են առաջարկել։ Այս նախագծի դեպքում խոսքը գնում է երկարաժամկետ ծրագրի մասին, իսկ զինծառայողներն ունեն այս ծրագրի անհրաժեշտությունը»,- ասաց երգչուհի պատգամավորը։ Եվ անգամ ԲՀԿ-ից դարձան Վիգեն Սարգսյանին պաշտպան, Ռուբեն Գեւորգյանը՝ Ծաղիկ Ռուբոն ևս սուրբ գործ հռչակեց հանգանակության գաղափարը: «Եկեք չօգտագործենք մուրացկանություն բառը, հարգանքով վերաբերվենք տարածաշրջանում միակ հաղթանակած բանակի վերաբերյալ». ելույթ ունեցավ նաեւ Նաիրա Կարապետյանը: Անի Սահակյան