Տարոն Մարգարյանը կատարել է Սերժ Սարգսյանի հանձնարարականը, իսկ ո՞ւր մնաց սեփականության իրավունքը
Երևանի քաղաքապետարանում տեղի ունեցած աշխատանքային խորհրդակցության ժամանակ քաղաքապետ Տարոն Մարգարյանը հայտարարել է, որ արդեն ավարտվել են «Փարքինգ Սիթի Սերվիս» և «Լոկատոր» ընկերությունների հետ բանակցությունները: Բանակցություններրի արդյուքնում սեփականության ձևով պայմանավորված հիշյալ ընկերությունների գործառույթները, այդ թվում՝ ֆինանսական հոսքերի տնօրինումն ու կառավարումը պետք է անցնեն համայնքային կառույցներին: Ըստ այդմ, քաղաքապետի տեղակալ Վահե Նիկոյանին հանձնարարվել է առաջիկայում հանրությանը ներկայացնել այդ մասով Երևանի քաղաքապետարանի քայլերի հաջորդականությունը: «Մեր կողմից կատարվող բոլոր քայլերը պետք է լինեն թափանցիկ: Բացի այդ, մեր բնակչությունը պետք է հստակ իմանա, թե ինչ կարող է ակնկալել կատարվող փոփոխությունից», - ասել է քաղաքապետը: Հիշեցնենք, որ երկու շաբաթ առաջ նախագահ Սերժ Սարգսյանը խորհրդակցություն է հրավիրել ճանապարհային երթևեկության կանոնների նկատմամբ վերահսկողական համակարգերի և վճարովի ավտոկայանատեղերի կազմակերպման հարցերի վերաբերյալ: Խորհրդակցության ժամանակ նախագահը Երևանի քաղաքապետին և ոստիկանապետին հանձնարակական էր տվել՝ 10-օրյա ժամկետում «Սեքյուրիթի դրիմ», «Փարկինգ Սիթի Սերվիս» ու «Լոկատոր» ընկերությունների կոնսորցիումի հետ բանակցությունների արդյունքում համապատասխան իրավական մեխանիզմներ մշակել, որպեսզի սեփականության ձևով պայմանավորված նրանց գործառույթները, այդ թվում՝ ֆինանսական հոսքերի տնօրինումն ու կառավարումն անցնեն պետական և համայնքային կառույցներին : Միաժամանակ հանձնարարկվել էր քննարկել այդ համակարգերում մարդկային գործոնի ազդեցության նվազեցմանն ու կողմնակի միջամտությունները բացառող բոլոր վերահսկողական կառուցակարգերի լիարժեք պահպանման ու շարունակական կատարելագործման հնարավորությունները՝ համապատասխան առաջարկությունները ներկայացնելով կառավարության քննարկմանը: Փաստորեն Տարոն Մարգարյանը կատարել է Սերժ Սարգսյանի հանձնարարականի իր մասնաբաժինը: «Փարկինգ Սիթի Սերվիսն» ու «Լոկատորը» հենց այն ընկերություններն են, որոնց հետ Երևանի քաղաքապետարանը ավտոկայանատեղիների կազմակերպման ծառայությունների գնման պայմանագիր էր կնքել: Պայմանագրերով այս ընկերություններին իրավունք էր վերապահվել տնօրինել այսպես կոչված «կարմիր գծերի» բիզնեսը: Ժամանակին ԶԼՄ-ներում հրապարկվեցին որոշ մանրամասներ այդ երկու ՓԲԸ-ների հետ կնքված պայմանագրերի առնչությամբ: Պայմանագրերը կնքվել էին 10-ը տարով, ընդ որում` յուրաքանչյուր տարի պետք է կնքվեր առանձին ծառայությունների մատուցման համաձայնագիր` հաշվի առնելով ՓԲԸ-ների ֆինանսական միջոցները: Ի դեպ, Երևանի քաղաքապետրանը կարող էր միակողմանի լուծել պայմանագիրը, եթե կատարողն էականորեն խախտել էր պայմանագիրը: Իրավաբան.net- կայքը, հղում անելով Էլեկտրոնային ռեգիստրի տվյալներին, հրապարակել էր նաև սեփականտերերի անունները: Ըստ այդմ՝ «Լոկատոր»-ը գրանցված է 2007 թվականից և ունի 4 բաժնետեր` Արման Խաչատրյանը, Անի Եղիազարյանը, Վլադիմիր Սոֆյանը, Էդիտա Ղարագյոզյանը: «Փարկինգ Սիթի Սերվիսի» բաժնետերերի հետ կապված տարբեր տեղեկություններ են շրջանառվում: Ըստ մամուլում տեղ գտած հրապարակումների՝ ընկերությունը փաստացի պատկանում է Սերժ Սարգսյանի մանկության ընկեր, «Միկմետալ» ընկերության սեփականատեր Միխայիլ Հարությունյանին: Վերջինս ԴԱՀԿ նախկին պետ Միհրան Պողոսյանի քեռին է : Ինչևէ՝ Երևանի քաղաքապետարանի և այս երկու ընկերությունների միջև կնքված 10 տարվա ժամկետը ավարտվում է 2022 թվականին: Մինչ այդ պայմանագիրը կարող է խզվել, այն դեպքում, եթե կատարողն էականորեն խախտել է պայմանագիրը: Թե ինչ իրավական հիմքերի շուրջ է ընթացել քաղաքապետարանի և ընկերությունների սեփականատերերի բանակցությունները, իհարկե, դժվար է ասել: Սակայն, զուտ իրավական տեսանկյունից, նախագահի հանձանարարությամբ սեփականատիրոջ հետ բանակցելն ու ֆինանսական հոսքերի կառավարումը նրանից ետ վերցնելը, սեփականության իրավունքի ոտնահարում է: Տվյալ պարագայում՝ էական չէ, թե ով է սեփականտերը և ժամանակին որքանով է իրավաչափ եղել պայմանագրի կնքումը: Ժամանակին շատ գրվեց, որ կարմիր գծերի պայմանագրերը հակասում են մի շարք օրենքների և այդ ձևաչափով ավտոկայանատեղիների կազմակերպումը ոտնահարում է մարդու անձնական տվյալների գաղտնիության իրավունքը:Բայց ամբողջ խնդիրն է այն է, որ այդ չարաբաստիկ պայմանագրերը այժմ լուծարվում կամ վերանայվում են ոչ թե օրենքներին հակասելու հիմքով, այլ նախագահի հանձնարարությամբ: Դավիթ Մանուկյան