Ապագա սպաների աչքի առաջ դաժանաբար սպանել են, իսկ նրանք՝լռել, արտոնյալները սպառնալիք են դարձել
Անցած տարի հունվարի 29-ին, Վազգեն Սարգսյանի անվան ռազմական ինստիտում սպանվածը մեկն էր, բայց ոճրագործությունն աննկարագրել էր, անհավատալի եւ բառերով անպատմելի: Ինստիտուտի 4 ուսանողներ գազանաբար սպանեցին ծառայակից Հայկազ Բարսեղյանին:Առանձնակի դաժանությամբ կատարված սպանություն, առաջադրված մեղադրանքն էլ այսպիսին էր՝ Հայոց բանակի ապագա սպաները ծեծել էին, ջարդել, երկրորդ հարկից գցել, կոկորդը կտրել, վերջում միայն տղայի խոշտանգված մարմինը պարանով կախել բակի պտտաձողից։ Մեղադրյալներից մեկը եւ այսպես ասած գլխավոր դերակատարը ինստիտուտի ղեկավարներից փոխհրամանատարի որդի է: Դեպքը խոսուն ապացույց, թե ինչպիսին են բանակի ապագա սպաները: Գործով դատական քննությունը շարունակվում է մինչ օրս ու ամեն դատական նիստին ի տես է դրվում բանակում տիրող բարձիթողի վճակը: Կուրսանտներ Գնել Թևոսյանին, Նորիկ Սահակյանին, Վաչե Սահակյանին ու Մովսես Ազարյանին մեղադրանք է առաջադրված այն բանի համար, որ 2015 թվականի հունվարի 29-ի գիշերը՝ ժամը 2-ից 3-ի սահմաններում, գումարտակի թիվ 408 ննջարանում առանձին դաժանությամբ, խուլիգանական դրդումներով սպանել են կուրսանտ Հայկազ Բարսեղյանին: Սպանությունից հետո տուժողի մարմինը կախվել է մարզահրապարակի պտտաձողից՝ ինքնասպանության տպավորություն ստեղծելու համար… Դատարանը երեկ հարցաքննեց գործով վերջին տուժող կուրսանտին՝ Հարություն Ալեքսանյանին, ում չորս ամբաստանյալներից երկուսը՝ Վաչե Սահակյանն ու Մովսես Ազարյանը ըստ մեղադրանքի ծեծի են ենթարկել Հայկազի սպանությունից երեք օր առաջ: Հարությունը դատարանում ուշագրավ հայտարարություն է արել՝ ըստ ամենայնի պատռելով սպաների դարբնոց հանդիսացող ինստիտուտում տիրող անառողջ մթնոլորտը: Նա ասել է, որ այն պահին, երբ համար 408 ննջարանում, անկողնու մեջ սպանում էին Հայկազին, ննջարանում գտնվող մյուս կուրսանտները արթուն են եղել, բայց ոչ մեկը ռիսկ չի արել գլուխը բարձրացնել ու ձայն հանել: Վախից՝ քնած են ձևացել: Ավելին, ասել է, որ սպանողները հայհոյանք են դրել նրա վրա, ով կատարվածի մասին կհամարձակվի բարձրաձայնել… Հարությունը չորս ամբաստանյալներին անվանել է Հայկազին «սպանողներ»: Դատական այդ նիստի ընթացքում Հայկազի հայրն էլ ասել է, թե ինքը խոսել է ինստիտուտի սպաների հետ, նրանք ասել են. «18 տարեկան թուլեքը թուրքից դաժան են եղել…»: Վազգեն Սարգսյանի ռազմական ինստիտուտը, ինչպես նշեցինք, բանակի սպաների դարբնոց է հանդիսանում, ու եթե այստեղ արատավոր բարքերը հասել են այն աստիճանի, որ ապագա սպաների ու բանակի հրամանատարների աչքի առջեւ խոշտանգելով սպանում են իրենց ծառայակցին, իսկ նրանցից որեւէ մեկը չի ընդվզում բարբարոսների դեմ, ապա ինչ պետք է սպասել այդ սպաներից, որոնք վաղը մտնլու են բանակ ու զբաղվելու 18 տարեկան զինծառայողների դաստիարակությամբ: Անշուշտ, այս ամենում ոչ թե կուրսանտների մեղքի բաժինն է մեծ, այլ այն հրամանատարական կազմի, ովքեր նման բարքեր ու մթնոլորտ են հաստատել, որոնց արտոնյալ զավակներն ու բարեկամները փաստորեն սպառնալիք են դարձել մեր բանակի, մեր անվտանգության համար: Ու այժմ ազգ-բանակ կոնցեպտն իրագործելուց ու հասարակությանը բանակաշինության խնդիրներին լուծմանը ներքաշելուց օր առաջ հրամայական է դարձել ազատվել այս արատավոր խոցերից , հղփացած գեներալիտետից, սպայական կազմից, ու դրանից հետո հանրությունն ինքնաբուխ կնետվի բանակում ներդրում անելու գործին: Անի Սահակյան