Իշխանությունը անորոշության մեջ է պահում թաղային հեղինակություններին

Այսպիսով՝ Շիրակի եւ Սյունիքի մարզի ՀՀԿ կառույցի ղեկավարները վերընտրվել են իրենց պաշտոնում։ Ըստ կարգի հերթական համագումարից առաջ պետք է կառույցներում նախ ընտրություններ անցկացվեն ու պարզ դառնա՝ փոխվում է ղեկավարը, թե ոչ։ Հատկանշականն, անշուշտ, Սուրիկ Խաչատրյանի վերընտրությունն էր, շաբաթներ առաջ, երբ նրան հեռացրել էին մարզպետի պաշտոնից այն պատճառաբանությամբ, թե իբր երկրում փոփոխությունների նոր ալիք են բարձրացնում, նպատակ կա ազատվել վարկաբեկված, քրեական տարրերից, ՀՀԿ-ն նույնպես ռեսթարտի կարիք ունի, Սուրիկ Խաչատրյանը հոկտեմբերի 27-ին լրագրողներին ավետեց, որ ինքը վերադառնալու է ու հենց իր վրա է դրված ընտրություններն անցկացնելու սուրբ գործը։ Լիսկան չսխալվեց, ՀՀԿ-ն հերթական անգամ էլ ապավինեց նրա զորությանը ու մարզային կառույցի ղեկավար վերընտրեց հենց Խաչատրյանին։ Շիրակում էլ կշարունակի ՀՀԿ-ի կառույցը ղեկավարել Սահակ Մինասյանը, նա էլ վստահություն էր հայտնել, որ մարզի ՀՀԿ խորհրդի ղեկավարի ընտրություններին վերընտրվելու է: Սակայն մամուլում տեղեկություններ կային, որ ըստ շրջանառվող լուրերի, Սահակ Մինասյանից իշխանությունները դժգոհ են, դժգոհությունը պայմանավորված է Գյումրիի՝ համապետական ու ՏԻՄ ընտրություններին իր բերած ձայներով: Տեղեկություններ կային, թե նրան փոխարինելու է ԱԺ պատգամավոր Սուքիաս Ավետիսյանը: Գյումրեցի ՀՀԿ-ական պատգամավոր, երկու տարի առաջ Գյումրի-2 շրջանային կառույցի ղեկավար ընտրված Սուքիաս Ավետիսյանը Tert.am-ի հետ զրույցում չէր թաքցրել, որ շրջանային կառույցները Սահակ Մինասյանի աշխատանքից դժգոհ են, «Ակտիվը դժգոհ է»,-ասել էր նա: Բայց ահա, Սերժ Սարգսյանը հերթական ընտրություններից, ու ընդ որում՝ կարեւորագույն ընտրություններից առաջ ռիսկի չի գնում ու որեւէ կուսակցականի չի նեղացնում։ Ավելին, մեր տեղեկություններով քրեական եւ օլիգարխիկ շրջանակներում մինչ այս պահը անորոշ է, թե ինչ դերակատարում են իրենք ստանձնելու 2017-ի ընտրություններին։ Բոլորին է հայտնի, որ ՀՀԿ-ի հույսը բոլոր ընտրություններին եղել են հենց այս շրջանակները, որոնք «թաղի խուժան» բնորոշումն են ստացել։ Ամենայն հավանականությամբ Սերժ Սարգսյանը նրանց էլ չի վանի իշխանությունից, նրանք այս ընտրություններին էլ կմատուցեն իրենց ծառայությունները, որից հետո նոր Սերժ Սարգսյանը որոշում կկայացնի՝ ազատվում է այդ շրջանակներից՝ ներկայացնելով հետընտրական ռեֆորմ, թե շարունակելու է հենվել նրանց վրա։ Մի բան հիմա պարզ է, որ ՀՀԿ-ը, հակառակ խոստումների, չունի վերափոխվելու ոչ մտադրություն, ոչ ռեսուրս, քանզի դա է պահանջում նաեւ նոր ընդունված Ընտրական օրենսգիրքը, որի ռեյտինգային քվեարկությունը եւ ձայներ հավաքելու փիլիսոփայությունը հիմնվելու է տվյալ տարածքի «հեղինակության» վրա։ Անի Սահակյան