«Ուլյուկաևի ձերբակալությունը չի հանգեցնի կառավարության հրաժարականին». Կրեմլ
Ռուսաստանի տնտեսական զարգացման նախարար Ալեքսեյ Ուլյուկաևի ձերբակալությունը առիթ չէ խոսելու նախարարների կաբինետի հրաժարականի մասին, հայտարարել է ՌԴ նախագահի մամուլի քարտուղար Դմիտրի Պեսկովը։ Այս մասին հայտնում է BBC-ի ռուսական ծառայությունը։ Այսօր լրագրողների հետ հանդիպմանը նա տեղեկացրել էր, որ նախարարի «օպերատիվ մշակման» մասին տեղյակ է եղել ոչ միայն ՌԴ նախագահը, այլև վարչապետ Դմիտրի Մեդվեդևը։ Նրա խոսքով՝ մտավախություններ, որ նախարարի ձերբակալությունը բացասաբար կազդի ներդրումային միջավայրի վրա, Կրեմլը չունի։ «Կոռուպցիայի դեմ պայքարը կատարվում է մշտական հիմունքով, դա դրական երևույթ է ցանկացած երկրի ներդրումային գրավչության համար»,- վստահ է Պեսկովը։ Միևնույն ժամանակ, ըստ նրա, Ուլյուկաևին որպես կոռուպցիայի դեմ պայքարի օրինակ ներկայացնելը դեռ անհնար է, քանի որ դատարանը նրան մեղավոր չի ճանաչել։
Հետևեք մեզ Viber-ում
