Մինչև ե՞րբ հանդուրժել սպառնալիքներն ու շանտաժը

Նախօրեին Ադրբեջանի նախագահը ծանոթացել է շփման գծում տիրող իրավիճակին: «Ադրբեջանի նախագահ, զինված ուժերի գերագույն գլխավոր հրամանատար Իլհամ Ալիևը շաբաթ օրը ծանոթացել է Ֆիզուլիի շրջանի շփման գծի օպերատիվ իրադրությանը: Պաշտպանության նախարար, գեներալ-գնդապետ Զաքիր Հասանովը զեկուցել է Ալիևին։ Ադրբեջանի նախագահն իրազեկվել է առաջնագծում ընդհանուր իրավիճակի մասին», ասվում է  պաշտոնական հաղորդագրությունում: Նա հանդես է եկել ելույթով, համապատասխան հանձնարարականներ է տվել։ Խիստ ուշագրավ է Ալիևի ելույթը: Նա, ըստ էության սպառնացել է հայկական կողմին, իսկ սա իսկական բաց մեսիջ է` ուղղված միջազգային հանրությանը, որ ապրիլյան պատերազմը դեռ միայն սկիզբ է: «Եթե հայերը եզրակացություն չանեն ապրիլյան մարտերից, ապա իրենց սպասում է բազմաթիվ շատ հաջող գործողություններ՝ Լելե Թեփեի օրինակով: Վերջին տարիներին մենք գնել ենք ամենաժամանակակից ռազմական տեխնիկան: Ապրիլյան մարտերը ևս մեկ անգամ ապացուցեցին դա»: Նա հավելել է՝ սպառազինությանը համարժեք, բարձր է նաև բանակի հայրենասիրության մակարդակը: «Մենք մեր հողի վրա ենք, սա Ադրբեջանն է: Լելե Թեփեն նույնպես Ադրբեջան է, Շուշին նույնպես Ադրբեջան է, Խանքենդին նույնպես Ադրբեջան է: Մենք չենք հավակնում ոչ մեկի հողին, սակայն մեր հողերի վրա մենք երբեք թույլ չենք տա երկրորդ հայկական պետություն: Ապրիլյան մարտերը ևս մեկ անգամ ապացուցեցին դա», ասել է Ալիևը, կրկնելով՝ ապրիլյան պատերազմը «Ադրբեջանի համար հերթական պատմական հաղթանակն էր»: Այնուհետև նա կրկին խոսել է տարածքային ամբողջականության վերականգնման մասին՝ վստահեցնելով, որ «վերադարձվելու են բոլոր այն տարածքները, որոնք դեռ օկուպացված են»: Եթե հայերը եզրահանգումներ չանեն ապրիլյան մարտերից, իրենց կսպասեն դեռ բազմաթիվ շատ հաջող գործողություններ՝ Լելե Թեփեի օրինակով»,- հավելելով՝ «Հայաստանի քաղաքական ղեկավարությունը վերջապես պետք է գիտակցի, որ իրենց բռնազավթիչ գործողություններն անդունդ են տանում: Ադրբեջանն օրեցօր ուժեղանում, հզորանում է: Մենք հսկա ներուժ և հզոր բանակ ունենք»: Պաշտոնական Երևանն ու Ստեփանակերտն արձագանքել է Ադրբեջանի վերջին օրերի  պահվածքին ու կոշտ հայտարարություններին: ԼՂՀ արտգործնախարարությունը նշում էր. «Լուրջ մտահոգություն է առաջացնում այն փաստը, որ իրավիճակի սրումը տեղի է ունենում ԼՂՀ սահմանագլխին Ադրբեջանի կողմից մեծաթիվ ռազմական տեխնիկայի և կենդանի ուժի ներգրավմամբ լայնամասշտաբ ռազմական զորավարժությունների նախապատրաստման ֆոնին։ Նման գործողությունները կոպտորեն խախտում են շփման գծում լարվածության սրման անթույլատրելիության վերաբերյալ Վիեննայի և Սանկտ Պետերբուրգի գագաթնաժողովներին ձեռք բերված պայմանավորվածությունները և վկայում են Ադրբեջանի մտադրության մասին՝ խոչընդոտել բանակցային գործընթացի վերսկսման համար պայմանների ձևավորմանն ուղղված միջոցառումների իրականացմանը։ Ավելին, Ադրբեջանը ոչ միայն հրաժարվում է միջադեպերի հետաքննության մեխանիզմների ստեղծումից և ԵԱՀԿ գործող նախագահի անձնական ներկայացուցչի գրասենյակի ընդլայնումից, այլև ձգտում է խափանել հրադադարի ռեժիմի պահպանումը դիտարկող միակ միջազգային մեխանիզմը՝ արկակոծելով այն շրջանը, որտեղ նախօրեին ԵԱՀԿ առաքելությունը պլանային դիտարկում է իրականացրել։ Ստեղծված իրավիճակում կոչ ենք անում ԵԱՀԿ Մինսկի խմբի համանախագահներին, ԵԱՀԿ գործող նախագահին և ողջ միջազգային հանրությանը՝ խստագույնս դատապարտել Ադրբեջանի իշխանությունների ապակառուցողական քաղաքականությունը և գործուն միջոցներ ձեռնարկել լարվածության հետագա սրացում թույլ չտալու համար։ Իր հերթին ԼՂՀ-ն կանխելու է Ադրբեջանի ցանկացած գործողություն, որը սպառնում է հանրապետության անվտանգությանը, տարածաշրջանում խաղաղությանը և կայունությանը»։ Իսկ ՀՀ ԱԳՆ խոսնակ Տիգրան Բալայանն այսօր «Ազատության» հետ զրույցում սադրանք է որակել վերջին օրերին ղարաբաղյան հակամարտության գոտում ադրբեջանական զինուժի գործողությունները: Բալայանը պատահական չի համարում այն, որ դրանք տեղի են ունենում ԵԱՀԿ անդամ երկրների արտգործնախարարների՝ Համբուրգում կայանալիք խորհրդի նիստից առաջ։ «Կարծում եմ՝ Ադրբեջանը հավատարիմ է մնում իր գործելաոճին ու կարևոր միջազգային հանդիպումներից առաջ միտումնավոր սրում է իրավիճակը շփման գծում։ Կարևոր միջազգային հանդիպում է սպասվում Համբուրգում, մեկ ամսից էլ քիչ ժամանակ է մնացել, և նրանք միտումնավոր սրում են իրավիճակը օր-օրի։ Նույն սադրիչ տրամաբանության մեջ է նաև այսօր մեկնարկող զորավարժությունները, որոնք անց են կացվում սպառազինությունների վերահսկման միջազգային պարտավորությունների կոպտագույն խախտումներով»,- ասաց Բալայանը։ Լեռնային Ղարաբաղի նախագահի աշխատակազմի ղեկավարի տեղակալ Դավիթ Բաբայանն «Ազատության» հետ զրույցում նշել է, որ Ղարաբաղի պաշտպանության բանակը, այդ զորավարժությունների մեկնարկով պայմանավորված՝ «մարտունակության, զգոնության բարձրացման հատուկ քայլեր է արել» և իրավիճակը վերահսկելի է։ «Իրենց զորավարժությունները մեկնարկել են, մենք էլ իհարկե համապատասխան քայլերն ենք կատարում, ինչը բնական է։ Ընդհանուր առմամբ, իրավիճակը վերահսկելի է և նորմալ»,- ասաց Դավիթ Բաբայանը։ Ալիևն, ինչպես ասում են, բաց տեքստով «թքում» է միջազգային հանրության երեսին: Նա հստակ հասկանել է տալիս, որ բանակցությունները հակասում են Ադրբեջանի իշխանությունների շահերին: Նա հստակ հասկացնում է, որ դեմ է խաղաղ բանակցություններին և սպառնում է պատերազմով: Սա հերթական շանտաժն է նախ ԵԱՀԿ Մինսկի խմբի միջնորդներին և ողջ միջազգային հանրությանը: Մինչև ե՞րբ է քաղաքակիրթ աշխարհը հանդուրժելու ալիևյան շանտաժը... Թամար Բագրատունի