Ծանր լռություն

Մինչ Ռուսաստանի շարունակաբար հնչում են հայտարարություններ, իսկ ավելի ճիշտ հույս են հայտնում, որ ԱՄՆ նորընտիր նախագահ Դոնալդ Թրամփը կմնա իր դիրքորոշումներում և կյանքի կկոչի այն հայտարարությունները, որոնք անում էր նախընտրական շրջանում, մասնավորապես Ռուսաստանի վերաբերյալ, ավելի հաճախակիացել են կանխատեսումները, որ ԱՄՆ հանրապետական նախագահը հազիվ թե շեշտակի փոխի Մոսկվայի հանդեպ քաղաքականությունը և մեղմացնի դիրքորոշումը: Ամերիկյան քաղաքականության փոփոխության անհնարինության հետ միասին առանձնապես Մոսկվայի ջերմության մասին էլ շատ չեն մեծ հույսերը... «Կրեմլում կարծում են, որ հնարավոր չի լինի փոխել Միացյալ Նահանգների հակառուսական քաղաքականությունը: Բացի այդ, Ռուսաստանի իշխանությունները չգիտեն, թե ինչ կարելի է սպասել Թրամփից: Նա անկանխատեսելի է», - նման եզրահանգման է եկել Bloomberg-ը: «Ռուսները հիշում են, որ բոլորովին վերջերս Թրամփը կոչ էր արել խոցել ամերիկյան ռազմանավերին մոտեցած ռուսական օդանավերը: Պետք չէ սպասել, որ Պուտինն ու նրա թիմը միանգամից ոգևորված ընդունելու են Թրամփին: Գոնե սկզբնական շրջանում Մոսկվան սպասողական դիրքորոշում կորդեգրի՝ հասկանալու, թե ինչ քաղաքականություն է մտադիր վարել Միացյալ Նահանգների ընտրված նախագահը», - գրում է Bloomberg-ը: Ամերիկյան լրատվական գործակալությունը նկատում է, որ Թրամփն «այնքան անկանխատեսելի է, որ կարող են իսկապես լայն հնարավորություններ բացվել ռուս-ամերիկյան հարաբերությունները վերականգնելու համար»: Մյուս կողմից, ինչպես գրում է «Կարնեգի» հիմնադրամի մոսկովյան գրասենյակի ղեկավար Դմիտրի Տրենինը, Թրամփի անկանխատեսելիությունը «լի է վտանգներով»: Դաշնային խորհրդի անդամ, Միացյալ Նահանգներում Ռուսաստանի նախկին դեսպան Վլադիմիր Լուկինի կարծիքով, Մոսկվան պետք է օգտվի Վաշինգտոնի հետ հարաբերությունները կարգավորելու համար ընձեռված այս հնարավորությունից, և «հարաբերությունները նոր էջից սկսելու առաջարկ անի Վաշինգտոնին»: Իսկ ռուսաստանցի հայտնի փորձագետ Ստանիսլավ Բելկովսկին ասում է, թե Կրեմլը «փոքր-ինչ շփոթված է», քանի որ բոլորի պես սպասում էր, որ ընտրություններում հաղթելու էր Հիլարի Քլինթոնը, և արդեն ուներ մշակված սցենար․ «Իսկ Թրամփն այնքան անկանխատեսելի է, որ Մոսկվան չգիտի ինչ սպասել նրանից, և չի պատկերացնում, թե ինչպես կզարգանան հարաբերությունները Վաշինգտոնի հետ», հայտնում է «Ազատություն» ռադիոկայանը: Ընդդիմադիր քաղաքական գործիչ Իլյա Յաշինի պատկերացմամբ՝ Թրամփն այսօր հայտնվել է բարդ իրավիճակում և շատ զգույշ արտաքին քաղաքականություն կվարի, որպեսզի իրեն չմեղադրեն Պուտինին աջակցելու մեջ, քանի որ Պուտին - Թրամփ կապի մասին, գուցե և անտեղի, բայց շատ է խոսվել ընտրարշավի ժամանակ: Այդուամենայնիվ, Իլյա Յաշինը նույնպես համարում է, որ կանխատեսումներ անել հնարավոր չէ, և այսօր Մոսկվայում բոլորին հետաքրքրում է, թե «ո՞վ է պարոն Թրամփը և ի՞նչ է նա անելու»: Դոլանդ Թրամփն իր նախընտրական արշավի ժամանակ հայտարարում էր, որ Պուտինը «ուժեղ առաջնորդ է»: Մի անգամ նույնիսկ (2014 թվականին) ասել էր, թե կճանաչի Ղրիմը Ռուսաստանի կազմում: Իսկ բոլորովին վերջերս, արձագանքելով Ռուսաստանի գործողություններին Սիրիայում, Թրամփը հայտարարել էր, թե պետք է խոցել ռուսական օդանավերը: Այպիսով, Մոսկվայի համար ծանր սպասողական վիճակ է, մի իրադրություն, երբ հայտնի չէ, թե անկանխատեսելի Թրամփից ինչ սպասել` հարվա՞ծ, թե՞ գրկաբաց ընդունելություն... Մետաքսյա Շալունց