Նոր «սերիալի» սպասելիս

ՀՀ վարչապետ Կարեն Կարապետյանի որոշմամբ՝ Կոռուպցիայի դեմ պայքարի խորհրդի կազմում կատարվել են փոփոխություններ: Մասնավորապես, խորհրդի կազմում նախկին վարչապետ Հովիկ Աբրահամյանին փոխարինելու է կառավարության գործող ղեկավար Կարեն Կարապետյանը, Ֆինանսների նախկին նախարար Գագիկ Խաչատրյանին՝ գործող նախարար Վարդան Արամյանը, ՀՀ նախկին գլխավոր դատախազ Գևորգ Կոստանյանին՝ ներկայիս դատախազ Արթուր Դավթյանը: Հիշեցնենք, որ այս խորհուրդը ստեղծվել է նախկին վարչապետ Հովիկ Աբրահամյանի նախաձեռնությամբ՝ անցած տարվա փետրվարին։ Կառավարությունը հաստատել է նաեւ խորհրդի կազմը, խորհուրդն ըստ այդմ պետք է գլխավորի վարչապետը, իսկ կազմում ընդգրկված են կառավարության աշխատակազմի ղեկավար-նախարարը,արդարադատության, ֆինանսների նախարարները, Գլխավոր դատախազը, բարձրաստիճան պաշտոնատար անձանց էթիկայի հանձնաժողովի նախագահ, քաղհասարակության ներկայացուցիչներ եւ խորհրդարանական ընդդիմադիր խմբակցություններից մեկական ներկայացուցիչ, թեպետ միայն ԲՀԿ-ն էր հանձն առել մասնակցելու խորհրդի նիստին, մյուսները բոյկոտել էին՝ համարելով պարապ զբաղմունք։ Հակակոռուպցիոն խորհրդի ձեւավորումը քաղաքական ու հասարակական որոշ շրջանակներ կողմից իսկզբանե բնորոշվեց իբրեւ ցինիկության գագաթնակետ եւ ծաղր՝ ուղղված հասարակությանը։ Եթե իշխանական շրջանակներում լիահույս էին, որ Հայաստանի ամենահարուստ մարդկանցից մեկը, մասնավորապես նախկին ֆինանսների նախարար Գագիկ Խաչատրյանը, կամ հենց ինքը՝ Հովիկ Աբրահամյանը պետք է արդար քննության ենթարկեին իրենց հարցը ու կատարեին խորհրդի առաքելությունը՝ բացահայտելով կոռուպցիոն երեւույթները, ապա հասարակությունն իրեն չէր ցանկանում եփած հավի տեղ դնել։ Եւ իսկապես, եթե փորձենք հիշել, թե ինչ աղմկոտ բացահայտումներ է արել այս կառույցը գոյության մեկից ավելի տարվա ընթացքում, ապա կդժվարանանք ։ Օրինակ չկա՞ր գեթ մեկ պաշտոնյա, որը պետական միջոցները փոշիացնելու մեղադրանքով ենթարկվեր քրեական պատասխանատվության։ Այդ խորհրդի աշխատանքի վերաբերյալ մի քանի նիստերն ու հայտարարություններն ընդամենը թատրոն էին հիշեցնում։ Օրինակ, երկար ժամանակ նախկին վարչապետն ու նախարարները փորձում էին պարզել, թե արդյոք Հայաստանում մենաշնորհներ կան: Որքան ժամանակ է՝ խորհուրդը գոյություն ունի, բայց ո՞վ կարող է հիշել գոնե մեկ արդյունք, առարկայական ձեռքբերում, տեսանելի տեղաշարժ, իհարկե՝ ոչ ոք։ Դեռևս 2003-ի վերջին կառավարության որոշմամբ հաստատվել էր ՀՀ հակակոռուպցիոն ռազմավարությունը և դրա իրականացման միջոցառումների 2003-2007թթ. ծրագիրը, որը սահմանում էր կոռուպցիայի դեմ պայքարի քաղաքականությունը։ 2004-ին ՀՀ նախագահի հրամանագրով ստեղծվել էր Կոռուպցիայի դեմ պայքարի խորհուրդը, որը գլխավորում էր ՀՀ վարչապետը։ Հետո հաստատվեց նաև ՀՀ հակակոռուպցիոն ռազմավարությունը և դրա իրականացման 2009-2012թթ. միջոցառումների ծրագիրը, որով որպես հակակոռուպցիոն ռազմավարության հիմնական նպատակ և ակնկալվող վերջնական արդյունք էր սահմանվել կոռուպցիայի էական կրճատումը։ Արդյոք այս տարիների ընթացքում կրճատվել է կոռուպցիայի մակարդակը, անշուշտ՝ ոչ։ Կարելի էր կարծել, որ փոփոխությունների սիմվոլ հռչակված Կարեն Կարապետյանը կհրաժարվի կոռուպցիայի դեմ պայքարի իմիտացիոն ծրագրից եւ ծաղրի չի ենթարկի իր կառավարությունը, մանավանդ, որ այդ կառավարության ներկայացուցիչներից շատերը իրենց խոստովանությամբ միլիոնատերեր են ու մեղմ ասած՝ հակակոռուպցիոն խորհրդի պոտենցիալ «մատերիալ», սակայն այդպես չեղավ։ Նա էլ է որոշել զբաղվել զուր գործով, եւ ուրեմն սպասենք հակակոռուպցիոն նոր սերիալի։ Անի Սահակյան