Կարեն Կարապետյանն ուժեղացնում է յուրայիններին և թուլացնում նախկիններին

Կառավարության  նիստում վարչապետ Կարեն Կարապետյանը հանձնարարական է տվել արդարադատության նախարար Արփինե Հովհաննիսյանին կրճատել համակարգի մի քանի կառույցներ: Վարչապետը հանձնարարել է Արփինե Հովհաննիսյանին երկշաբաթյա ժամկետում կառավարության քննարկմանը  ներկայացնել նախագծերի փաթեթ, որոնց համաձայն դադարեցվելու է ԱՆ աշխատակազմի օրինականության վերահսկողության տեսչության գործունեությունը, վերացվելու են ԱՆ կողմից իրականացվող արհեստակցական, կրոնական կազմակերպությունների և կուսակցությունների գործունեության տեսչական գործառույթները: «Իսկ մնացած տեսչական կազմակերպությունների ոչ առևտրային կազմակերպությունների գործունեության վերահսկողության, այդ թվում՝ ստուգումների անցկացման գործառույթը վերապահվում է ՀՀ կառավարությանն առընթեր Պետական եկամուտների կոմիտեին»,- հայտարարել է Կարեն Կարապետյանը: Իսկ բուն արդարադատության նախարարության ներքին խնդիրների պատշաճ իրականացման համար անհրաժեշտ վերահսկողության գործառույթները վերապահվել են  Արդարադատության նախարարության վերակազմակերպված վերահսկողության ծառայությանը: Կարեն Կարեպետյանի այս որոշումը ուշագրավ է այն առումով, որ նախ ուղղակիորեն թուլացնում է արդարադատության նախարար Արփինե Հովհաննիսյանի դիրքերը: Արդարադատության նախարարության օրինականության վերահսկողության տեսչությունը, որը  վարչապետը պատրաստվում է լուծարել, փաստացի զբաղվում է նոտարների  գործուենության վերահսկողությամբ, որը նրա գործառույթներից թերևս ամենակարևորն է: Տեսչությունը, ինչպես նշվում է  այդ մարմնի պաշտոնական կայքում,  օրենքով սահմանված կարգով և դեպքերում ուսումնասիրում, ստուգում և ամփոփում է նոտարների գործունեությունը, նախարարին միջնորդում է կասեցնելու նոտարի գործունեությունը, վերահսկում է նոտարական պալատի կողմից օրենքների և այլ իրավական ակտերի ու նոտարական պալատի կանոնադրական պահանջների պահպանումը: Տեսչությունը, իրականացնում է  նաև ոչ առևտրային կազմակերպությունների և իրավաբանական անաձանց,  քաղաքացիական կացության ակտերի գրանցման մարմինների, դատական ակտերի հարկադիր կատարման ծառայության՝  ԴԱՀԿ և քրեակատարողական ծառայության գործունեության վերահսկողություն. նրանց  նախազգուշացնում է օրենքների պահանջների հայտնաբերված խախտումների մասին,  առաջարկում է հայտնաբերված խախտումների վերացման կարգ և ժամկետներ,  անցկացնում է ծառայողական քննություններ:  Տեսչությունը անգամ լիազորություն ունի դատավորի նկատմամբ նախապատրաստել  կարգապահական վարույթի նյութեր: Հիմա փաստորեն  թվարկված բոլոր գործառույթներից Արդարադատության նախարարի ու նախարության իրավասության ներքո մնում է միայն նախարարության ներքին ստորաբաժանումների հսկողության գործառույթը, որը քաղաքական առումով  լուրջ նշանակություն չունի: Ամենկարևոր   մարմինները՝ ԴԱՀԿ, նոտարական համակարգ, քրեակատորաղական հիմնարկներ և դատավորներ դուրս են գալիս  արդարադատության նախարարության վերահսկողության դաշտից, դրանցից որոշները անցնում են ՊԵԿ-ին, որոշներն էլ դեռ պարզ չէ, թե ում կտրվի: Կարեն Կարապետյանը փաստացի հետևողականորեն առաջ է տանում կառավարական բուրգում սեփական թիմի դիրքերի ամրապնդումը և հնից ստացված ժառանգության վերափոխումը:   Դավիթ Մանուկյան