ՌԴ ՊՆ. Սիրիայում և Իրաքում ԱՄՆ-ի ավիահարվածների հետևանքով հազարավոր խաղաղ բնակիչներ են զոհվել

 Սիրիայում և Իրաքում վերջին մեկ տարվա ընթացքում ԱՄՆ-ի հասցրած ավիահարվածներին զոհ են գնացել հազարավոր խաղաղ բնակիչներ: Այս մասին հայտնում է «Ռիա նովոստի»-ն՝ հղում կատարելով ՌԴ պաշտպանության նախարարության աղբյուրին: Նշվում է, որ այս հայտարարությամբ ՌԴ ՊՆ-ն պատասխանել է ԱՄՆ զինված ուժերի կենտրոնական հրամանատարության պաշտոնական ներկայացուցիչ Ջոն Թոմասի այն հայտարարությանը, թե անցած տարվա նոյեմբերից մինչև այս տարվա սեպտեմբեր Իրաքում և Սիրիայում ԱՄՆ ռազմաօդային ուժերի իրականացրած ավիահարվածներին զոհ է գնացել ընդամենը 64 խաղաղ բնակիչ, վիրավորվել՝ 8-ը: «Լսելով նման հայտարարություն ԱՄՆ զինված ուժերի կենտրոնական հրամանատարության ներկայացուցչից՝ տպավորություն է ստեղծվում, որ մյուս սիրիացի և իրաքցի հազարավոր սպանվածներին մարդու տեղ չեն դնում: Սակայն ամերիկացի գործընկերների նման ծայրահեղ անամոթությունն ու ցինիզմն էլ պետք է սահմաններ ունենա»,- ասել է աղբյուրը: Նա նշել է, որ ամերիկական ավիացիան Սիրիայում և Իրաքում օրական 20 ավիահարված է հասցնում, իսկ ընթացիկ տարվա ընթացքում՝ 7300: