Թրամփի Ամերիկա. շոկ ամերիկյան ընտրություններում
Ահա, և վերջ: ԱՄՆ 45-րդ նախագահն է` Դոնալդ Թրամփը... «Երկրաշարժ», այսպես են բնութագրում լրատվամիջոցները ԱՄՆ-ում այսօր կայացած նախագահական ընտրությունների արդյունքները: Անսպասելիորեն` Թրամփն առաջ անցավ Քլինթոնից: Այս պահին ԱՄՆ-ում փակվել են բոլոր ընտրատեղամասերը: Արդեն իսկ հայտնի են ընտրությունների վերջնական արդյունքները: Միացյալ Նահանգներում այսօր անցկացված նախագահական ընտրությունների՝ այս պահի արդյունքներով, առաջատարը Հանրապետական կուսակցության թեկնածու Դոնալդ Թրամփն է: Մեծահարուստ գործարարը ստացել է 276, իսկ Դեմոկրատական կուսակցության թեկնածու, ԱՄՆ նախկին պետքարտուղար և սենատոր, նախկին առաջին տիկին Հիլարի Քլինթոնը՝ 218 ընտրիչների ձայները: Հիշեցնենք՝ ԱՄՆ նախագահ ընտրվելու համար պահանջվում էր ստանալ Ընտրական կոլեգիայի 538 ընտրիչներից առնվազն 270-ի ձայները: Դոնալդ Թրամփը այս պահին առջևում է նաև համաժողովրդական քվեարկության արդյունքներով՝ նրա ստացած ձայները ավելի քան մեկ միլիոնով գերազանցում են Հիլարի Քլինթոնին տրված քվեների թիվը: Թրամփի հաղթանակի մասին լուրերի ֆոնին ամերիկյան դոլարի փոխարժեքը եվրոյի և իենի նկատմամբ ընկել է: Ավարտվեց ամերիկյան ամենասկանդալային, ամենակոմպրոմատային և ամենակոշտ քարոզարշավը: Սակայն նաև ակնհայտ էր, որ ԱՄՆ-ում Օբամայից հիասթափությունն, ի վերջո հանգեցրեց նրան, որ հասարակության ընտրեց Հանրապետական կուսակցության թեկնածուին: Մինչև կանխատեսումներ անելը, թե ինչպիսի ներքին և արտաքին քաղաքականություն կվարի Թրամփը, պետք է արձանագրել, որ ԱՄՆ-ն որպես ժողովրդավարության բնօրրան` կրկին ապացուցեց, որ հասարակության ձայնը տեղ է հասնում: Ի՞նչ փոփոխություններ կարելի է ակնկալել Թրամփի ամերիկյան քաղաքականության մեջ Թրամփի ընտրվելուց հետո: Իհարկե, այս հարցին այսօր շատերը կդժվարանան պատասխանել, սակայն պարզ է, որ նույնիսկ նկատելի փոփոխությունների առկայության պայմաններում նույնիսկ Թրամփը չի կարող փոխել ամերիկյան «մեքենան»: Դա համակարգ է, որն աշխատում է և երբեք մեծապես կախված չի եղել անձերի որոշումներից եւ ցանկություններից: Մետաքսյա Շալունց