Հայրենիքի համար կյանք նվիրաբերելը վաղեմության ժամկետ չունի

  Պաշտպանության  նախարար  Վիգեն Սարգսյանը նախագահ Սերժ Սարգսյանին է ներկայացրել մի հիմնարար ծրագիր, որի անհրաժեշտությունը մեր իրականության մեջ վաղուց կար: Ավելին, այն ազգային և բարոյական պարտքի  ծանր բեռ էր մեր հասարակության և պետության համար, ուստի այս խնդրին  պետք էր ավելի վաղ  անդրադառնալ: Պաշտպանության նախարարը  նախագահին զեկուցել է մարտական գործողությունների ընթացքում և մարտական հերթապահություն իրականացնող զինծառայողների զոհվելու կամ հաշմանդամություն ստանալու դեպքում պետական ապահովագրական վճարը (ինչպես միանվագ վճարումն, այնպես էլ ամսական վճարները) կտրուկ ավելացնելու  նոր պետական ծրագիրը, որը մշակվել է  Վիգեն Սարգսյանի առաջ քաշած ազգ-բանակ հայեցակարգի շրջանակում: Վիգեն Սարգսյանը նշել է, որ աշխատանքի արդյունքում հնարավոր դարձավ գտնել բանաձև, որով 2017թ. հունվարի 28-ից՝ մեր բանակի 25-րդ տարեդարձի օրվանից ծագող դեպքերի համար կնախատեսվեն նոր, զգալիորեն ավելացված վճարներ: Զոհված և առաջին կարգի հաշմանդամություն ստացած զինծառայողի ընտանիքները կստանան միանվագ 10 մլն. դրամ ապահովագրական վճար: 2-րդ կարգի հաշմանդամություն ստացած զինծառայողին կհատկացվի միանվագ 5 մլն. դրամ ապահովագրական վճար: Զոհվելու կամ առաջին կարգի հաշմանդամություն ստանալու դեպքում ամսական ապահովագրական վճարները կկազմեն` 300 հազար դրամ սպայական անձնակազմի, 250 հազար դրամ ենթասպաների և 200 հազար դրամ շարքայինների դեպքում: Երկրորդ կարգի հաշմանդամների դեպքում այդ վճարները համապատասխանաբար կկազմեն 250, 200 և 150 հազար դրամ: Այդ գումարը, որպես ապահովագրական վճար, կվճարվի 20 տարի շարունակ՝ կազմելով սպայական անձնակազմի համար 82 մլն. դրամ, ենթասպայական անձնակազմի պարագայում՝ 70 մլն. դրամ և շարքայինների դեպքում՝ 48 մլն. դրամ: Այս վճարումները կատարվելու են նոր ստեղծվելիք  հիմնադրամի միջոցով, որին յուրաքանչյուր աշխատող քաղաքացի  պետք է փոխանցի ամսական 1000 դրամ գումար: Բացի ՀՀ-ում աշխատող քաղաքացիներից կամավրության  հիմունքներով  հիմնադրամը հավաքագրելու է նաև մասնավոր  նվիրաբերություններ: Գումարը ծախսվելու է, բացառապես,  ապահովագրական վճարները վճարելու նպատակով: : Ինչպես տեղակացնում է  նախագահի լրատվական ծառայությունը՝ ձևավորվելու է ծրագրի խորհուրդ` հասարակության հարգանքն ու վստահությունը վայելող անձանցից, որը վերահսկելու է հասարակության համար ևս ամբողջությամբ թափանցիկ և հրապարակային այդ գործընթացը: Ինչպես ասում են,  լավ է ուշ, քան՝  երբեք: Ամսական 1000 դրամը նույնիսկ ամենածանր սոցիալական վիճակում գտնվող, նվազագույն աշխատավարձով վարձատրվող ՀՀ քաղաքացու  համար իրատեսական վճարում է, որը չի կարող դիտարկվել իբրև լրացուցիչ բեռ: Ապրիլյան պատերազմի օրերին  ակնհայտ էր, որ  ազգովի պատրաստ ենք  անմնացորդ աջակցելու սահամանը պահող զինվորին ու նրա ընտանիքին: Ավելի բարձր վարձատրվողները կարող են 1000-ի փոխարեն, օրինակ, 5000 դրամ վճարել: Գլխավոր խնդիրն այստեղ վստահությունն է: Շատ կարևոր է, որ կասկածի նշույլ անգամ չընկնի  այս կարևոր նախաձեռնության նպատակով արված համազգային հանգանակության և դրա հիմքում դրված գաղափարի վրա: Անշուշտ, այստեղ պետությունը ակնկալում է նաև արտերկրում աշխատող և ապրող մեր հայրենակիցների նվիրատվությունները, որը ևս վստահության մթնոլորտ  ապահովելու պարագայում անպայման լինելու է: Հիմնական  և ամենկարևոր խնդիրը թերևս այն է, որ ծրագիրը գործելու է  2017 թվականի հունվարի 28-ից     հետո  և տարածվելու է նշված ժամկետից հետո առաջացած դեպքերի վրա:  Այսինքն մինչ այդ պահը  զոհված զինվորականների ընտանիքները և հաշմանդումություն ստացած զինվորականները  հիմնադրամի ապհովագրական վճարներից չեն օգտվելու: Սերժ Սարգսյանը հանձնարարել է զուգահեռաբար աշխատել Ֆինանսների նախարարության, Կառավարության հետ. «Տեսնենք, թե որքանո՞վ կարող ենք բարելավել նաև նախկինում զոհված զինվորների, սպաների ընտանիքների վիճակը. այսինքն, ունե՞նք, արդյոք հնարավորություններ, ոչ այս չափով, որ հիմա է լինելու, ինչ-որ չափով բարձրացնելու վճարները»,- ասել է նախագահը: Առկա հաշվարկները այս  պահին, հավանաբար,  հնարավորություն չեն ընձեռում  նախկին զոհվածների և վիրավորների  համար  ևս նման վճարներ հատկացնել, բայց հիմնադրամի գործարկումից  հետո իրավիճակը կարող է փոխվել:  Հայակական էլիտան այստեղ լուրջ անելիք ունի, միջոցներ պետք  է գտնել բոլորի համար՝ առաջին փուլում, թերևս, սահմանելով որոշակի  առաջնահերթություն: Հայրենիքի համար կյանք նվիրաբերելը  վաղեմության ժամկետ չունի   և մենք՝  բոլորս,  քանի դեռ ապրում ենք և ունենք պետություն,  այդ պարտավորությունից ազատված չենք:   Կարինե Սարիբեկյան