Փնտրվում է ռեվոլյուցիոներ
Վարչապետ Կարեն Կարապետյանի գլխավորությամբ կառավարությունում կրկին տեղեկատվության և հեռահաղորդակցության տեխնոլոգիաների (ՏՀՏ) ոլորտի զարգացման վերաբերյալ քննարկումներ են տեղի ունեցել: Խորհրդակցության ընթացքում ներկայացվել են մի շարք ծրագրեր և գաղափարներ՝ մասնավորապես, պետություն-մասնավոր հատված համագործակցության հիման վրա տվյալների մշակման կենտրոնի ստեղծում, էլեկտրոնային հարթակներում գործունեության դաշտի ընդլայնում, մարզերում տեխնոլոգիական կենտրոնների զարգացում (Գյումրու և Վանաձորի օրինակով) և այլն: Կարեն Կարապետյանը նախ լսել է ներկայացված առաջարկները, ապա հանձնարարել տրանսպորտի, կապի և տեղեկատվական տեխնոլոգիաների նախարարին՝ սեղմ ժամկետում քննարկել դրանք շահագրգիռ բոլոր կողմերի հետ, մշակել միջոցառումների ծրագիր: Միևնույն ժամանակ Կարեն Կարեպատյանը ևս մեկ անգամ ընդգծել է, որ ակնկալում է ՏՀՏ բնագավառի որակական փոփոխություններին միտված ծրագրեր, որոնք կարճաժամկետ հեռանկարում տեսանելի արդյունք կտան և կնպաստեն ոլորտի աշխուժացմանը: «Ինչո՞ւ եմ ես հույս կապում ձեր ոլորտի հետ, որպեսզի մենք թռիչք անենք, որակ փոխենք: Նախ և առաջ, հաշվի առնելով զուտ բազիսային հնարավորությունները, երկրորդ՝ ժամանակակից և գիտակից կադրերը, երրորդը, չորրորդը նույնպես այդ պնդումների շուրջ են», - նշել է Կարեն Կարապետյանը: Այս ձևաչափով նախորդ հանդիպումներից մեկի ժամանակ, էլ Կարեն Կարապետյանը հայտարարել էր, որ ՏՏ ոլորտից ակնկալում է ծրագիր, որ կարողանա աշխարհը շուռ տալ: Կարեն Կարեպետյանը, հավանաբար, հասկանալով, որ աշխարհը շուռ տալուն հաջորդող հերթական քայլը կարող է հեղափոխությունը լինել, այս անգամ ՏՏ ոլորտի մասնագետների հետ հենց այդ մասին է խոսել. « Եթե դուք սպասում եք, որ մենք՝ չինովնիկներս, այս ոլորտում հեղափոխություն անենք, մենք՝ չինովնիկներս, ռեվոլյուցիա անող չենք: Բայց որպեսզի կարողանանք աշխատող մարդուն, շահույթի ձգտող մարդուն ոգևորել, մեր բոլոր սուբսիդիաները պետք է ուղղենք հաջողակին: Ես ուզում եմ ձեզնից ծրագրեր՝ ինչպես անենք, որպեսզի ոլորտը փոխենք»,- հնրավորինս պարզ ու անկեղծ բացատրել է վարչապետը: Կարեն Կարապետյանի խոսքում, իսկ խոսքերն, ինչպես հայտնի է, մտքի և սրտի հայելին են, մի շատ կարևոր և սկզբունքային փոփոխություն է կատարվել: Կարեն Կարապետյանը տևական ժամանակ իրեն համարում էր հաջողակ մենեջեր և նախկին բիզնեսմեն: Հիմա, փաստորեն, հասկացել է, որ ինքը չինովնիկ է: Պետական ապարատում, թերևս, այլ կերպ չէր էլ կարող լինել: Ինչ վերաբերում է հեղափոխությանը, եթե խոսքը տեխնոլգիական հեղափոխության մասին է, ապա չինովնիկներն, այո՛, հազիվ թե կարողանան հեղափոխություն անել: Ընդ որում՝ դա չի վերաբերում միայն Հայաստանի չինովնիկներին: Պատմությանը նման դեպք հայտնի չէ, երբ տեխնոլգիական հեղափոխության գյուտը վերագրվել է որևէ երկրի չինովնիկների: Փոխարենը քաղաքական հեղափոխությունների մասով չինովնիկները որոշակի հաջողություն արձանգրել են: Օրինակ, 2003 թվականին մեր հարևան Վրաստանում Միխաիլ Սահակաշվիլուն, ով նաև Վրաստանի նախկին արդարադատության նախարարն է եղել, հաջողվեց հեղափոխություն անել: Պատմությունից հայտնի են նաև բուրժուադեմոկրատական մի քանի հեղափոխությունների դեպքեր: Ժամանակին, հույսը դնելով ԲՀԿ նախկին նախագահ Գագիկ Ծառուկյանի վրա՝ այս թեզը հետևողականորեն առաջ էր տանում առաջին նախագահ Լևոն Տեր-Պետրոսյանը, սակայն որևէ արդյունքի չհասավ: Այնպես որ Տեր-Պետրոսյանի անավարտը գործը Կարեն Կարապետյանը կարող է ավարտին հասցնել: Եթե ոչ տեխնոլոգիական, ապա քաղաքական հեղափոխություն մեկ էլ տեսար ստացվեց: Դավիթ Մանուկյան