Արդյոք ՀԲ-ն Ադրբեջանին վարկ կտա

20:14 - 1/փետրվարի/2016

Ադրբեջանի ղեկավարության՝ միջազգային ֆինանսական կառույցների հետ տարվող բանակցություններն անցել են շատ դժվար եւ արդյունք չեն տվել:

Ոչ պաշտոնական աղբյուրներից «Թուրան»-ին հասած տեղեկություններով` վարկեր տրամադրելու մասին Ադրբեջանի ղեկավարության խնդրանքին Արժույթի միջազգային հիմնադրամը եւ Համաշախարհային բանկը 5 պահանջ են առաջադրել պաշտոնական Բաքվին. լայն մասնավորեցում, պետապարատի կրճատում, իրական դատական բարեփոխումներ, աշխատավարձերի, թոշակների եւ պետական ծախսերի սառեցում, մուտք Առեւտրի համաշխարհային կազմակերպություն:

Նույն աղբյուրի համաձայն` այդ 5 պայմանից Ադրբեջանի կառավարությունը համաձայնել է միայն առաջին երկուսին, ինչի հետեւանքով միջազգային կառույցներն անհնարին են համարում վարկերի տրամադրումը: Ըստ «Թուրան»-ի` դա հիմք է տալիս համարելու, որ Ադրբեջանի կառավարությունը պատրաստ չէ լուրջ հակաճգնաժամային բարեփոխումներ իրականացնել: Բրիտանական Financial Times թերթի համաձայն` Ադրբեջանի իշխանութունները ծրագրել էին ԱՄՀ-ից եւ ՀԲ-ից 4 մլրդ դոլար վարկ ստանալ: Սակայն այն բանից հետո, երբ բանակցություններն, ինչպես երեւում է, տապալվել են, նախագահ Իլհամ Ալիեւը եւ ֆինանսների նախարար Սամիր Շարիֆովը հերքել են միջազգային ֆինանսական կառույցներից վարկ խնդրելու մասին լուրերը` անվանելով դրանք «հակաադրբեջանական ուժերի սուտ» եւ հավելել, թե «Ադրբեջանը արտասահմանյան ֆինանսական օգնության կարիք չունի»: