Նոր առեւտուր կամ ծննդյան նվեր իշխանությունից
Հայկական վերածնունդ, նախկին ՕԵԿ կուսակցության նախագահ Արթուր Բաղդասարյանն իր ծննդյան 48-րդ տարեդարձի առիթով հանդես է եկել ուշագրավ հայտարարությամբ։ Սկսելով անցյալից, Արթուր Բաղդասարյանը հասնում է ներկա ու վստահեցնում, որ չի փոշմանել, ինչ արել է ճիշտ է արել։Նա անդրադառնում է Մարտի 1-ից ժամեր առաջ Սերժ Սարգսյանի հետ կոալիցիային, իշխանության հետ համատեղ տարիներին, իշխանության կազմում իրականացրած ծրագրերին, հետո հավաստիացնում, որ Հայկական վերածնունդը ընդդիմություն է, բայց ոչ ծայրահեղ: «Կազմել եմ, որպեսզի չհոսի մեր հայրենակիցների արյունը, կազմել եմ, որ երկիրս չդառնա արտաքին ագրեսիայի թիրախ, կազմել եմ իմ հայրենիքը բազմաթիվ ներքին ու արտաքին ցնցումներից զերծ պահելու համար: Իրենց կողմից համանման որոշում ժամանակին կայացրել են նաև հանրության կողմից հարգված ու հեղինակություն վայելող այնպիսի գործիչներ, ինչպիսիք են՝ Կարեն Դեմիրճյանը, Լևոն Տեր-Պետրոսյանը, Գագիկ Ծառուկյանը: Ի վերջո, ցանկացել եմ իմ ծրագրերն ու իմ քաղաքական թիմի երազանքները կյանքի կոչել, քանի որ հենց իշխանությունն է հնարավորություն տալիս կյանքի կոչել ցանկացած կուսակցության ծրարգրերը», իշխանության հետ կոալիցիայի առիթով նորից ու կրկին սրտաճմլիկ արդարացումներ է ներկայացրել Արթուր Բաղդասարյանը: Բայց հայտարարության առանցքում անկասկած վանաձորյան խնդրահարուկց թեման է։ Վանաձորում ինչպես գիտենք ստեղծվել է հետաքրքիր իրավիճակ: Քաղաքապետն ընտրվել է ընդդիմադիր դաշտի չորս «դավաճանների» աջակցությամբ, բայց փաստացի քաղաքը ղեկավարել չի կարողանում, որովհետեւ ավագանու նիստի համար քվորումի ապահովման խնդիր կա, իսկ «դավաճանները» չեն ցանկանում բացահայտվել։ «Լուսավոր Հայաստանը» ընտրել է նիստը բոյկոտելու ճանապարհը, նրան են միացել ՀՎԿ-ն ու ԲՀԿ-ն։ Արթուր Բաղդասարյանը անդրադառնում է Վանաձորի քաղաքապետի ընտրությանը, «Լուսավոր Հայաստանի» հետ համաձայնությանը, հավաստիացնում, որ այն պահել են, բայց միաժամանակ խոսում Լուսավոր Հայաստանի հետ պայմանավորված հետընտրական բոյկոտը վերանայելու հարցը քննարկելու մասին: «« Հայկական վերածնունդը» հստակ պահել է իր պայմանավորվածություները» հուշագրի ոգուն համապատասխան և քվեարկել Քրիստ Մարուքյանի օգտին: Չնայած դրան շանտաժով և քաղաքական կեղտոտ տեխնոլոգիաներով փորձում են վարկաբեկել մեր ավագանու անդամենրին՝ կեղծ լուրեր տարածելով, թե «Հայկական վերանծնունդ» կուսակցության անդամները չեն պահել քաղաքական հուշագրի կանոնները: Եվ ըստ, որում սա արվում է համառ հետևողականությամբ: Այսօր «Հայկական վերածնունդը» Վանաձորում կարող է դառնել այն քաղաքական ուժը, որ կազմելով իշխանություն կարող է իրական ազդեցություն ունենալ Վանաձոր քաղաքի կառավարման մեջ՝ ելնելոնվ մեր ստացած քվեներից: Հռետորական հարց է առաջանում՝ ավելի լավ է շարունակ շանտաժի մեջ գտնվել և ամեն օր կոկորդ պատռելով հերքել, որ դու շիտակ ես, թե՞ իսկապես բոլոր ուժերով կազմել կոալիցիա և իրական ազդեցություն ունենալ Վանաձորի կառավարման գործընթացի վրա` ստեղծելով ազգային համաձայնության վանաձորյան փոքրիկ մի մոդել: Անկեղծորեն ես այս հարցի հստակ պատասխանը չունեմ, բայց թիմով մտածել թերևս արժե»,- ասել է Բաղդասարյանը ճանապարհ բացելով իշխանության հետ հերթական գործարքի համար։ Այսօրվա մամուլում տեղեկություն կար, որ Սերժ Սարգսյանը ՀՀԿ խմբակցության ղեկավար, վանաձորցի Վահրամ Բաղդասարյանին տվել է մեկ շաբաթ ժամանակ` հարցը լուծելու համար: Լուծել հնարավոր է ընդդիմադիր քվեներով քվորում ապահովելով միայն: Դրա համար պետք է լինի բաց քվեարկություն եւ ըստ այդմ կարող է պարզ դառնալ, թե ովքեր են քվեարկել ՀՀԿ թեկնածուի օգտին։ Պատահական չէ, որ այս պահին Արթուր Բաղդասարյանը հանդես է գալիս բոյկոտը դադարեցնելու ակնարկով:Կարելի է չկասկածել, որ Արթուր Բաղդասարյանը շուտով կգնա իշխանության հետ հերթական գործարքին ու կներկայացնի այն «հանուն վանաձորցիների», բայց ծննդյան օրով նման հայտարարության համար հաստատ ավելի մեծ պատճառներ նա կունենա։ Օրինակ իշխանության հետ ընտրություններից առաջ պայմանավորվածությունը խորհրդարանում մի քանի մանդատի համար։ Արթուր Բաղդասարյանը կարելի է ասել ինքն իրեն նվեր է անում ու հստակեցնում ապագայի հարցերը իշխանության հետ։ Անի Սահակյան
Հետևեք մեզ Viber-ում
