Քաղաքականության մեջ, ինչպես մոդայում
Անցած հանգստյան օրերին նախագահ Սերժ Սարգսյանը հանդիպում է ունեցել ՀՀԿ կանանց հետ, և զեկույց կարդացել նրանց դերի ու հանրային առքելության մասին: Սերժ Սարգսյանի ելույթի շեշտադրումներում զգալի է եղել ապահով Հայաստանի գաղափարը, որը վերջին նախագահական ընտրությունների ժամանակ գլխավոր լոզունգն էր: «Մեր երկրի Սահմանադրությունը և օրենսդրությունը երաշխավորում են կանանց և տղամարդկանց լիարժեք իրավահավասարությունը: Ուստի, պետք է հետևողականորեն իրագործենք արդեն իսկ մշակված օրենքի դրույթները, մասնավորապես՝ շարունակենք ընդլայնել կանանց ներգրավվածությունը քաղաքական կյանքում և որոշումներ կայացնելու գործընթացներում: Այս համատեքստում շատ կարևոր է լիարժեքորեն ներգրավել կանանց մեր երկրի Սահմանադրության բարեփոխումներն արդյունավետորեն իրականացնելու գործում: 2015 թվականի դեկտեմբերի 6-ին տեղի ունեցած հանրաքվեն ոչ թե ավարտեց, այլ սկիզբ դրեց մի շատ կարևոր գործընթացի: Սահմանադրության բարեփոխմամբ մենք քայլ ենք կատարում դեպի մեր հասարակության կառավարման ավելի ժողովրդավարական համակարգ և դեպի ավելի ուժեղ Հայաստան: Այսօր երկրում լուրջ բարեփոխումներ են ընթանում: Առջևում նոր, մեծ և կարևոր փոփոխություններ են: Այդ փոփոխությունները չեն սահմանափակվելու զուտ անուններով ու դեմքերով: Փոփոխությունները լինելու են լայնածավալ և համակարգային, որոնց արդյունքները չպետք է իրենց երկար սպասեցնել տան: Ավելին, դրանք պետք է լինեն զգալի և շոշափելի Հայաստանի յուրաքանչյուր քաղաքացու կյանքում: Նմանօրինակ ընդգրկուն և համապարփակ բարեփոխումները կարող են իրագործվել միայն և միայն հանրության լայն ու զանգվածային աջակցության պարագայում: Այստեղ խիստ կարևոր է լինելու կանանց ակտիվ ներգրավումը և մասնակցությունը: Գալիք երկու-երեք տարիները լինելու են բեկումնային: Վստահ եմ, որ մեր երկրի կանայք ասելիք և անելիք ունեն այստեղ»,- իր խոսքում շեշտել է նախագահը: Սերժ Սարգսյանի ելույթում թերևս ուշագրավ էր բեկումնային երկու-երեք տարիների իրողությունը: Եթե կառավարման բուրգում իր վերարտադրության հարցի լուծման համար անհրաժեշտ է ընդամնենը մի քանի ամիս՝ մինչև 2017-ի փետրվարյան ընտրությունենրը, ապա մյուս ծրագրերի համար Սերժ Սարգսյանը 2-3 տարվա ժամկետ է նախանշում: Գործող Սահմանադրությամբ երկրի ներկա նախագահը մինչև 2018 թվականը դեռևս պահպանում է իր լծակները, նոր սահմադրությունն ամբողջությամբ ուժի մեջ է մտնում 2018 թվականի ապրիլից հետո: Բեկումնային փոփոխությունների և նոր դեմքերի մասին խոսելիս ո՞ւմ և ի՞նչ նկատի ունի Սերժ Սարգսյանը, թերևս միայն իրեն է հայտնի: ՀՀԿ կանանց խորհրդի նախագահ Հերմինե Նաղդալյանը 1in.am-ի հետ զրույցում նշել է, որ փոփոխությունները, որոնց մասին խոսել է Սերժ Սարգսյանը ոչ այնքան անձերին, որքան համակարգին է վերաբերում. «Կարծում եմ այնքան էլ հետաքրքիր չէ՝ ով կգա, ով կգնա, ով որտեղ կլինի»,- ասել է Նաղդալյանը: Հարցին, թե մտավախություն չունի՞, որ նախագահը պատրաստվում է փոխել ՀՀԿ-ի հին դեմքերին, Նաղդալյանը ուղիղ պատասխան չի տվել: Իրականում սակայն ամենահետաքրքիրն հենց այն է, թե ով ուր կգնա և ով երբ կփոխվի: Ու թեպետ Գագիկ Ծառուկյանի քաղաքականություն վերադառնալու առիթով իր մեկնաբանության մեջ ավելի վաղ Նաղդակյանը կարծիք էր հայտնել, թե ԲՀԿ նախկին առաջնորդը պետք է հաշվի առնի քաղաքական դաշտի պահանջը, իրեն վերաբերող հարցում կարծես թե այլ կերպ է մտածում: Գուցե Հերմինե Նաղդալյանն հույս ունի, որ կանանց պարագայում քաղաքականության մեջ, ինչպես մոդայում, ամեն մի նորը վաղուց մոռացված հինն է: Սերժ Սարգսյանը Կարեն Կարապետյանին վարչապետի պաշտոնում առաջադրելու ժամանակ հայտարարեց, որ ի թիվս այլ խնդիրների, ինքը Կարապետյանից ակնկալում է նաև ՀՀԿ-ին նոր ոգի հաղորդելու գործը: Ինչ ընդհանրություններ ունեն ՀՀԿ-ի նոր ոգին, Հերմինե Նաղդալյանի ու նրա հետևից քայլող կուսակցական տիկնանց քաղաքական կերպարները կերևա կարճ ժամանակ անց, հնարավոր է նաև մինչև խորհրդարնական ընտրությունները՝ ՀՀԿ առաջիկա համագումարում: Դավիթ Մանուկյան