Պայթյուններ, անկայունություն, փախուստ երկրից

Թուրքիայում իսկական խառնաշփոթ է տիրում... Այդ երկիրը թևակփոխել է անկայունության ու անկանխատեսելիության փուլ: Նոյեմբերի 4-ի առավոտյան Դիարբեքիրում այնտեղ պայթեցվել է պայթուցիկով լեցուն բեռնատար, որի հետևանքով զոհվել է 9 մարդ, այդ թվում նաև 2 ոստիկան։ Հիվանդանոցում հայտնվել է ավելի քան 100 մարդ։ Քուրդ զինյալները պայթյունի համար օգտագործել են ավելի քան մեկ տոննա պայթուցիկ։ Պայթյունի հետևանքով լուրջ վնաս են կրել հարակից շենքերը։ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալները ստանձնել են Դիարբեքիրի նահանգում անվտանգության ուժերի վարչության շենքի մոտ հնչած պայթյունի պատասխանատվությունը։ ԴԱԻՇ ահաբեկչական խմբավորումը ստանձնել է Դիարբեքիրի Բաղլար շրջանում նոյեմբերի 4-ին իրականացված պայթյունի պատասխանատվությունը: Թուրքիայի վարչապետ Բինալի Յըլդըրըմը կատարվածի պատասխանատու էր ճանաչել Քրդական աշխատավորական կուսակցությանը (PKK): Մյուս կողմից Թուրքիայում շարունակվում են բռնաճնշումները: Թուրքիայի ընդդիմադիր «Ջումհուրիեթ» պարբերականի ձերբակալված ինը աշխատակցի վերաբերյալ դատարանը կալանավորելու որոշում է կայացրել։ Կալանավորվածների շարքում է «Ջումհուրիեթ»-ի գլխավոր խմբագիր Մուրաթ Սաբունջուն: Ընդդիմադիր պարբերականի լրագրողները կալանավորվել են «ահաբեկչական խմբավորման անդամ չլինելով՝ խմբավորման անունից գործողություն ծավալելու» համար: Հուլիսին` ռազմական հեղաշրջումից հետո իրականացրած տասնյակ հազարավոր ձերբակալությունների արդյունքում այդ երկրի քաղաքացիները ապաստան են խնդրում հիմնականում Գերմանիայից: Թուրքիայի քաղաքացիների թիվը, որոնք ապաստան են խնդրել` 2016-ին զգալիորեն ավելացել է: Ըստ գերմանական Bild պարբերականի` Գերմանական կառավարության տվյալներով` մինչև 2016թ. սեպտեմբեր ապաստան ստանալու խնդրանքով իրենց է դիմել Թուրքիայի 3 հազար 973 քաղաքացի: Սա կրկնակի ավելի է 2015-ին Գերմանիային դիմած Թուրքիայի քաղաքացիների ընդհանուր թվից: Bild-ը գրում է, որ դիմումների կտրուկ աճը գրանցվել է Թուրքիայում հուլիսի 15-ի ռազմական հեղաշրջման փորձից հետո: Իսկ Ստամբուլում նախօրեին ոստիկանությունն արցունքաբեր գազ և ջրցան մեքենաներ է կիրառել ցուցարարներին ցրելու համար: Ոստիկանությունն այդպես փորձել է արգելափակել ցուցարարների ճանապարհը դեպի ընդդիմադիր Cumhuriyet թերթի գրասենյակ, որի աշխատակիցները ձերբակալվել էին: Ականատեսները գործակալությանը հայտնել են, որ գազը Շիշլի շրջանի ամբողջ փողոցներ է լցրել: Հաղորդվում է նաև, որ քաղաքի երկնքում ոստիկանական ուղղաթիռներ էին թռչում: Թուրքիայի վարչապետ Բինալի Յըլդըրըմը մեղադրել է քրդամետ ընդդիմադիր Ժողովուրդների դեմոկրատական կուսակցությանն ահաբեկչության ֆինանսավորման մեջ։ Յըլդըրըմը հայտարարել է, որ կուսակցության ղեկավարությունը երկար տարիների հատկացրել է իրեն տրամադրվող պետական միջոցները ահաբեկչության ֆինանսավորմանը, ինչպես նաև մեղադրել կուսակցությանը Թուրքիայում արգելված Քրդստանի աշխատավորական կուսակցության հետ կապերի մեջ։ Նկատենք, որ Թուրքիայի քրդամետ ընդդիմադիր Ժողովուրդների դեմոկրատական կուսակցությունը դադարեցրել է իր աշխատանքը երկրի խորհրդարանում։ «Մեր խորհրդարանական խմբակցությունն ու կուսակցության ղեկավարությունը որոշում են ընդունել դադարեցնելու աշխատանքն օրենսդիր մարմիններում»,- ասել է կուսակցության ներկայացուցիչ Այխան Բիլգենը։ Մետաքսյա Շալունց