Ճտերն աշնանն են հաշվում
Պետական եկամուտների կոմիտեի նախագահ Վարդան Հարությունյանը հայտարարել է, որ ինքը 25 տարի խոշոր բիզնեսների հաջողակ ներկայացուցիչ է եղել, և շատ լավ տիրապետում է բիզնեսի խնդիրներին, և գիտի, թե որ խնդիրները պետք է լուծում ստանան, որպեսզի բիզնեսի դաշտը բացվի: Լրագրողների դիտարկմանը, թե, օրինակ, խոշոր հարկատու Սամվել Ալեքսանյանի «Ալեքս Գրիգ» ընկերությունը 2 միլիարդ դրամով նվազեցրել է հարկերը, դա՞ է ստվերի դեմ պայքարի արդյունքը, ՊԵԿ նախագահը պատասխանել է, թե հնարավոր է՝ շրջանառությունն է իջել: Մեկ այլ հարցի՝ վարչապետի այն հայտարարությունից հետո, թե ով ինչ ապրանք ուզում է, կարող է ներկրել, նոր ներկրողներ եղե՞լ են, Հարությունյանը պատասխանել է, որ ունենք դիզելային վառելիքի և բանանի նոր ներկրողներ: Թե ովքեր են նրանք, ՊԵԿ նախագահը դժվարացել է պատասխանել: Փոխարենը կոչ է արել լրագրողներին օգնել՝ բացահայտելու կոռուպցիոն ռիսկերը: Նա ևս մեկ անգամ հիշեցրել է՝ բոլորն էլ կարող են ամեն ինչ ներկրել Հայաստան։ Վարդան Հարությունյանը չի ժխտել տեղեկությունները, թե ՊԵԿ-ում կադրային փոփոխություններ են սկսվել, և թիմը Վարդան Հարությունյանի մարդկանցով է համալրվել: «Իմ մարդկանցով է համալրվում, համալրվում է պրոֆեսիոնալ մարդկանցով, և էլի են կատարվելու փոփոխություններ: Էն մարդիկ, որոնք իմ կողմից դրված խնդիրները չեն կարողանալու կատարել, միանշանակ լքելու են թիմը: Եկե՛ք, հասկացե՛ք, որ բան է փոխվել: Էսօր խաղի կանոն է փոխվել, և էդ խաղի կանոնը ես եմ ֆիքսում: Ես ունեմ իմ ֆիքսած խաղի կանոնը և պետք է աշխատեմ էն թիմի հետ, որը ես եմ ընտրել: Մենք պետության ներկայացուցիչն ենք յուրաքանչյուր բացված բիզեսի մեջ՝ հարկերի տեսքով: Պետությունը հանդիսանում է փայատեր յուրաքանչյուր բիզնեսում, և այդ փայի ներկայացուցիչը հարկային մարմիններն են: Եթե բիզնեսմենը պարկեշտ և առանց խաբելու պետության փայաբաժինը վճարում է, մենք պետք է ուղղակի խթանենք էդ բիզնեսի զարգացմանը: Իսկ եթե կլինեն բիզնեսմեններ, որոնք կփորձեն թաքցնել, պայքարելու ենք նաև էդ բիզեսմենների դեմ»,- հայտարարել է Վարդան Հարությունյանը՝ շեշտելով, որ պայքարելու է ստվերի դեմ. «Կպայքարեմ, կտեսնեք: Կա′մ պիտի պայքարենք, կա′մ չպիտի պայքարենք: Ես միտված եմ պայքարելու»,- ասել է նա: Թերևս, դժվար է հիշել որևե ՊԵԿ նախագահի, որը չի խոսել ստեվերի դեմ պայքարի ու աշխատակազմի պրոֆեսիոնալիզմի բարձրացման մասին: Կարեն Կարեպատյանի անմիջական թիմակից Վարդան Հարությունյանի կտրուկ հայտարարությունը, սակայն, մի փոքր տարբերվում է նախորդների հրապարակային հայտարարություններից այն իմաստով, որ նա, փաստորեն, չի էլ թաքցնում, որ նախընտրում է սեփական թիմով աշխատել: Ընդհանրապես, պետական կառավարման որևէ կառույց ամբողջությամբ սեփական թիմակիցներով լցնելը արդեն իսկ կոռուպցիոն ռիսկ է պարունակում: Երբ խոսվում է սեփական թիմի՝ իսկ մաքսային համակարգը ո՛չ կուսակցություն է, ո՛չ էլ ֆուտբոլային ակումբ, այլ ոչ թե զուտ պրոֆեսիոնալիզմի և օրենքի շրջանակում աշխատող կադրերի մասին, այդ թիմի գործունեությունը դեռ չսկսված կասկածելի է դառնում: Հայկական իրականության մեջ սեփական թիմ ասվածում կարող է գործել միայն մեկ հստակ խաղի կանոն՝ շեֆն ասում է, մենք անում ենք, որովհետև քանի շեֆը կա, մենք խնդիր չունենք: Իսկ ի՞նչ խնդիր է դրել Վարդան Հարությունյանը ՊԵԿ անձնակազմի առջև, որ չեն կարողացել իրականացնել: Այս մասին Վարդան Հարությունյանը չի խոսել: Բայց նա արդյունքների ապահովման, ինչպես նաև խնդիրների լուծման համար ժամանակ է խնդրել: Ինչպես ասում են՝ ճտերեն աշնան են հաշվում: Կգա նաև արդյունքները հաշվելու ժամանակը, և այն ժամանակ էլ կերևա ներկա և նախկին թիմերի տարբերությունը: Դավիթ Մանուկյան