Բեգլարյանին «պրծացրի՞ն», իսկ ծրագիրը

2017 թվականի բյուջեով Տրանսպորտի կապի և տեղեկատվական տեխնոլոգիաների նախարարությանը տրամադրվող միջոցները կնվազեն շուրջ 10 մլրդ դրամով, խորհրդրարանում ընթացող 2017-ի բյուջեի քննարկման ժամանակ այս մասին հայտնեց ՀՀ ֆինանսների նախարարի տեղակալ Ատոմ Ջանջուղազյանը: Վերջինս ընդգծեց, որ սահմանափակումները կազդեն նաև Հյուսիս-Հարավ մայրուղու կառուցման աշխատանքների վրա, որովհետև մայրուղու կառուցման համար ակնկալվող միջոցների ստացման մասով ևս նվազումներ են նախատեսված։ Այսպիսով, կարելի է ասել, որ վերոնշյալ չարչրկված ծրագի հարցը կրկին մնում է օդում կախված եւ անհայտ են մնում ժամկետները, թե երբ կավարտվի այդ ծրագիրը:Թեպետ Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը իր հերթին սփոփեց ասելով, որ կրճատումների հետեւանքով մայրուղու ճակատագիրը վտանգի տակ չէ և հիմա այդ հարցը քննարկվում է մասնավոր ներդրողների հետ, սակայն նա դժվարանալով պատասխանել, թե հնարավոր կլինի ավարտել մայրուղու շինարարությունը մինչև 2020 թվականը, որը նախանշված է ծրագրով:Նախարարը դժվարացավ նաեւ պատասխանել հարցին, թե ում կողմից են չարաշահումներ եղել՝ Հյուսիս-Հարավ մայրուղու կառուցման թերացումների հետ կապված։ «Եկեք, գնահատենք՝ ընդհանրապես չարաշահումն ում կողմից է արվել: Դա ես չէ, որ միայն պետք է գնահատեմ»,-ԱԺ-ում լրագրողների հետ զրույցում ասաց նախարարը։Դիտարկմանը, թե չկա՞ նախկին նախարար Գագիկ Բեգլարյանի մեղքը, Վ. Մարտիրոսյանն ընդգծեց. «Ոչ մի այդպիսի խոսք չկա: Նախկին նախարարն իր գործն արել է և արել է բարեխիղճ: Եքե կոնկրետ դեպքի ծանոթ եք, ներկայացրեք»:Հարկ է նշել, որ վերջին շաբաթների մամուլը գրեց, թե իշխանությունները նախկին նախարար Գագիկ Բեգլարյանի դեմ նյութեր են նախապատրաստում:Հիշեցնենք, որ վերջերս հարկային մարմինները հաղորդագրություն հրապարակեցին, թե Հյուսիս-հարավ մայրուղու հատվածներից մեկը կառուցող «Կորսան-կորվիամ կոնստրուկցիոն» ընկերությունում 2,6 մլրդ դրամի ակտ Է գրվել և հօգուտ պետբյուջեի 1 մլրդ դրամ հարկային պարտավորություն առաջադրվել։ Մամուլի հրապարակումների համաձայն՝ այս շինարարության մեջ իր բաժինն ունի նաև Գագիկ Բեգլարյանը։ Սակայն տեւական ժամանակ է անցել, բայց դեռ որեւէ տեղաշարժ չկա: Շատ կարեւոր է հիշեցնել, որ այս լուրերը սպրդվեցին Բեգլարյանի պաշտոնանկությունից շաբաթներ անց, երբ զուգահեռաբար լուրեր կային, որ նա նեղացել է իշխանություններից եւ <տակից> խաղեր է տալու նրա դեմ: Բեգլարյանի նեղացվածությունն ակնհայտ էր, նա չէր հաճախում ՀՀԿ ԳՄ նիստերին, մի կողմ էր քաշվել կուսակցական աշխատանքներից:Բեգլարյանը հիմա որպես պարտաճանաչ կուսակցական գտնվում է այնտեղ, որտեղ պետք է:Հիմա անգամ նոր նախարարը անուններ չի մատնանշում: Փոխարենը էլ ավելի անորոշ է դարձել Հյուսիս-հարավի ճակատագիրը, ո՞վ պետք է վերադարձնի մսխված գումարները, որոնց մասին մամուլը բազմիցս է գրել, ինչո՞ւ չի երեւում մայրուղու կառուցման վերջը . կիսակառույց մայրուղին եւ պատասխանատուների անփութությունը դարձել է պատահարների պատճառ: Այս հարցը ԱԺ-ում բարձրացրեց նաեւ ՀԱԿ պատգամավոր Արամ Մանուկյանը: Վահան Մարտիրոսյանը պատասխանեց, որ Երեւան-Աշտարակ, Երեւան-Արտաշատ ճանապարհահատվածներում կամուրջներ են գործարկել, հետո փակել եւ այդ պատճառով եղել են մահվան ելքով ավտովթարներ. «Իհարկե, եղել են թերացումներ, որեւէ մեկը չի ժխտում, բայց որ ասում եք՝ ճանապարհը վնասվել է, ճանապարհը վնասված չի: Ինչ վերաբերում է ճանապարհի բացմանը եւ փակմանը, 2017-ի վերջին է նախատեսվում, բայց քննարկումներ արեցինք, որ ընդհանուր ամբողջ ճանապարհը երեւի կբացվի մինչեւ մայիսը, կամուրջները կվերանորոգեն վերեւից, արդեն չի խանգարի երթեւեկությանը»: Մահվան ելքով վթարների հետ կապված նախարարն ասաց, որ հետաքննություն է գնում, սպասենք արդյունքներին, մինչ այդ չենք կարող ասել, որ այդ ճանապարհի պատճառով է եղել վթարը, կարող է խմած է եղել: Արամ Մանուկյանն արձագանքեց, որ հարվածից է եղել, բախվել է ճանապարհին՝ Վարդան Այվազյանը սկսեց միջամտել, թե՝ արդեն ճանապարհային երթեւեկությանն անցար, թեմայի մեջ խոսիր: «Հանգիստ»,- ասաց Արամ Մանուկյանը՝ Վարդան Այվազյանին: Վերջինս էլ հանգստանալու փոխարեն բորբոքվեց, թե հանձնաժողովի նախագահը ինքն է, ինքն է նիստին հետեւում. «Ես հանգիստ եմ, դո՛ւ հանգստացի»: Անի Սահակյան