Կամավորական ուժերի մոբիլիզացման հայտարարությունը չի արտահայտում ՀՀ ՊՆ-ի դիրքորոշումը. Արծրուն Հովհաննիսյան

Հայաստանի զինված ուժերն ուշադրությամբ հետևում են հակառակորդի գործողություններին և անհրաժեշտության դեպքում մշտապես արձագանքում բոլոր տեսակի մարտահրավերներին: «Արմենպրես»-ի հետ զրույցում այդ մասին նշեց ՀՀ ՊՆ մամուլի խոսնակ Արծրուն Հովհաննիսյանը` անդրադառնալով «Պահեստազորի սպաների համահայկական միության հայտարարությանն այն մասին, որ մոտակա օրերին անհրաժեշտ է մոբիլիզացնել կամավորական բոլոր ուժերը՝ կապված Ադրբեջանում անցկացվելիք խոշոր զորավարժությունների հետ: «Պահեստազորի սպաների համահայկական միության» հայտարարությունում նշվում է, որ պետք է հատկապես նոյեմբերի 11-ից 18-ը պատրաստ լինել իրադարձությունների ցանկացած զարգացման և ապրիլյան պատերազմին մասնակցած աշխարհազորային ջոկատների հրամանատարներին կոչ է արվել հստակ հաշվարկել ու մոբիլիզացնել կամավորական բոլոր ուժերը: Ըստ ՀԿ-ի` առաջիկա օրերին ադրբեջանական բանակի պատմության մեջ թերևս ամենախոշոր զորավարժություններն են անցկացվելու: «Պահեստազորի սպաների համահայկական միության» նախագահի հայտարարությունը չի արտահայտում ՊՆ դիրքորոշումը, հավանաբար այն ուղղված է միայն ազատամարտիկների զգոնության բարձրացմանը: Հավաստիացնում ենք, որ  անհանգստանալու որևէ առիթ չկա, և դա բացառապես Վարդան Ավետիսյանի և իր ղեկավարած ՀԿ-ի՝ «Պահեստազորի սպաների համահայկական միության» կարծիքն է»,- ընդգծեց Հովհաննիսյանը: Հովհաննիսյանի խոսքով` ՊՆ-ն ֆեյսբուքյան իր էջում նյութով կիսվել էր, քանի որ անվտանգության հետ կապված շատ թեմաներով են կիսվում և սկզբում այդ նյութն այլ կերպ ընկալվեց, իսկ հետո արդեն հեռացվել է, քանի որ թյուրըմբռնում է եղել: