Ինչի՞ց էր այդքան գոհ Կարեն Կարապետյանը

Կառավարության վերջին նիստում պաշտոնապես տրվեց պետական համակարգի կրճատումների մեկնարկը: Ինչպես և ենթադրվում էր գործընթացը մեկնարկեց ԾԻԳ-երի  լուծարումից և ՊՈԱԿ-ների վերակազմավորումից: Ի կատարումն վարչապետի՝ ՊՈԱԿ-ների, ԾԻԳ-երի գործունեության նպատակահարմարությունը վերանայելու  հանձնարարականի՝ կառավարության   մի շարք որոշումներով լուծարեցին թվով 5 ծրագրերի իրականացման գրասենյակներ և վերամիավորվեցին երկու ՊՈԱԿ-ներ: Երբ Կառավարության նիստում արտակարգ իրավիճակների նախարար Արմեն Երիցյանը ներկայացնում էր  լուծարումների մաիսն որոշումները վարչապետ Կարեն Կարապետյանը չդիմացավ և տեղից արձագանքեց. «Ինձ շատ դուր է գալիս այս որոշումը»: Եվ այսպես՝ այդ ինչն է՝ այդպես ոգևորել վարչապետին: Համաձայն կառավարության պաշտոնական հաղորդագրության՝ լուծարվել է ՀՀ արտակարգ իրավիճակների նախարարության «Արտակարգ իրավիճակների բնագավառում ծրագրերի իրականացման գրասենյակ», որի արդյունքում կտնտեսվի 65,5 մլն դրամ, ՀՀ մշակույթի նախարարության «Մշակութային ծրագրերի իրականացման գրասենյակ» (արդյունքում կտնտեսվի 66,5 մլն դրամ), ՀՀ սպորտի և երիտասարդության հարցերի նախարարության «Սպորտի և երիտասարդական ծրագրերի իրականացման գրասենյակ»՝ արդյունքում կտնտեսվի 61 մլն դրամ: «Գործադիրի որոշմամբ կլուծարվի նաև ՀՀ էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի «Արփա-Սևան» թունելի վերականգնման ծրագրերի իրականացման գրասենյակը՝ ՀՀ կառավարության և «Աբու-Դաբի» զարգացման հիմնադրամի միջև «Արփա-Սևան» թունելի վերականգնման ծրագրի ֆինանսավորման վարկային համաձայնագրով իրականացվող հիմնանորոգման աշխատանքների պետական գնման պայմանագրով նախատեսված աշխատանքների կատարման ժամկետի ավարտմամբ պայմանավորված: Մեկ այլ որոշմամբ էլ միավորման ձևով կվերակազմակերպվեն ՀՀ էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի «Ախուրյան-Արաքս-ջրառ»և «Սևան-Հրազդան-ջրառ» փակ բաժնետիրական ընկերություններ»: «Արդյունքում՝ զգալիորեն կկրճատվեն ծախսերը, կբարձրանա կառավարման արդյունավետությունը»,- նշվում է կառավարության տարածած հաղորդագրության մեջ: Փաստորեն այս լուծարումների արդյունքում պետական բյուջեն տնտեսել է  մոտ 190 մլն դրամ գումար՝ ԾիԳ-երի մասով, որոշակի միջոցներ էլ տնտեսվել են  ՊՈԱԿ-ների տնտեսման արդյունքում: Մեր տեղեկություններով լուծարված  ԾԻԳ-երի հետևանքով, որոնք 20-25 հոգիանոց աշխատակազմ ունեն, մոտ 100-120 մարդ դարձել են գործազուրկ: Մոտավորոպես 20-25 մարդ էլ գործազուրկ կդառնա վերը նշված երկու ՊՈԱԿ-ների միավորման հետևանքով: Վարչապետի հրճվանքը, հավանաբար պայմանավորված էր գումարներ տնտեսելու հանգամանքով, ինչը բյուջեի միջոցների տնտեսման առումով  թերևես հասկանալի է: Իսկ Կարեն Կարապետյանը ունի՞ այն հարցի պատասխանը, թե գործազուրկ դարձած այս մարդիկ, ինչպես են պահելու իրենց ընտանիքները, որտե՞ղ  են կառավարության ստեղծած նոր աշխատատեղերը կամ փոքր ու միջին բիզնեսի զարգացման երաշխիքները, որ այս կրճատված 100-120  մարդու համար ընտանիք պահելու հնրավորություն ապահովվի: Ստացվում է, որ վարչապետը անչափ ուրեխ և գոհ է գործազուրկների բանակը մեծացնելո՞ւ համար: ԾԻԳ-երը անշուշտ ուռճացված են եղել, բայց վստահաբար այդ կառույցներում կան նաև իրական պրոֆեսիանալ կադրեր: Այս տեսանկյունից ուրախությունն արտահայտելուն զուգահեռ Կարեն Կարապետյանը կարող էր հանձնարարել կամ էլ գոնե հույս հայտնել, որ լուծարված հիմնարկների կարող ուժերրը կօգտագործվեն այլ ասպարեզում:  Չնայած ժողովրդական իմաստնությունն ասում է՝ տաշած քարը գետնին չի մնա և իրական պրոֆեսիոնալները աշխատանք անպայման կգտնեն:   Դավիթ Մանուկյան