Ինչու է միակ «լուծումը»` ռազմականը

Ադրբեջանի զինուժը պատրաստվում է մեծամասշտաբ զորավարժությունների: Ադրբեջանի Իլհամ Ալիևի ստորագրած հրամանագրի համաձայն, դրանք կանցկացվեն նոյեմբերի 12-18-ը դաշտային պայմաններում՝ զորքերի և սպառազինության կառավարման համակարգը ստուգելու նպատակով: Ադրբեջանական APA լրատվական գործակալության հաղորդմամբ, վարժանքներին կմասնակցի մինչև 60 հազար զինվորական, ավելի քան 50 ինքնաթիռ ու ուղղաթիռ, 150-ից ավելի տանկ, ինչպես նաև 700 հրթիռահրետանային համակարգ: Սա կարելի է, իհարկե, պատասխան համարել` հայկական կողմից նմանատիպ զորավարժություններ անցկացնելուն: Սակայն, մյուս կողմից սա վկայում է այն մասին, որ Ադրբեջանը պահպանելու է ժամանակ առ ժամանակ սահմանային լարվածությունը թեժացնելու քաղաքականությունը: Նոյեմբերի 2-ին, մասնավորապես շփման գծի հյուսիսային (Թալիշ) ուղղությամբ, բացի հրաձգային զինատեսակներից, ադրբեջանական զինուժը կիրառել է ենթափողային նռնականետ (ԵՆ-25 /4 արկ/), իսկ նոյեմբերի լույս 3-ի գիշերը ժամը 2:15-ի սահմաններում` 60 միլիմետրանոց ականանետ (2 արկ): Ընդհանուր առմամբ, նոյեմբերի 2-ի լույս 3-ի գիշերը Լեռնային Ղարաբաղի և Ադրբեջանի հակամարտ զորքերի շփման գծում հակառակորդի կողմից հրադադարի ռեժիմը խախտվել է շուրջ 30 անգամ, տարբեր տրամաչափի հրաձգային զինատեսակներից հայ դիրքապահների ուղղությամբ արձակվել է ավելի քան 370 կրակոց: Երեկ Լեռնային Ղարաբաղի պաշտպանության նախարարությունը հաղորդագրություն տարածեց, որում ասվում էր, որ Ադրբեջանի պաշտոնական քարոզչությունը շարունակում է ինչպես սեփական, այնպես էլ միջազգային հանրությանը մոլորեցնելու նպատակով ապատեղեկատվության տարածման քաղաքականությունը, այսօր հայտարարել է Լեռնային Ղարաբաղի պաշտպանության նախարարությունը: «Մասնավորապես, նոյեմբերի 2-ին ադրբեջանական ԶԼՄ-ներում և սոցցանցերում տեղեկություն է տարածվել, թե իբր հայերի ականանետերից արձակված արկերն ընկել են Աղդամի շրջանի Չեմենլի և այլ բնակավայրեր: Լեռնային Ղարաբաղի պաշտպանության նախարարությունը հայտարարում է, որ նշված տեղեկատվությունն իրականությանը չի համապատասխանում: Ավելին, նմանաբովանդակ հաղորդագրությունների տարածմամբ հակառակորդ երկիրը փորձում է իրեն ապահովագրել հերթական սադրանքներից», - հայտարարում էր Ղարաբաղի ռազմական գերատեսչությունը՝ շեշտելով, որ Պաշտպանության բանակի առաջապահ ուժերը խստորեն հետևում են ստանձնած պարտավորություններին և երբեք չեն թիրախավորում խաղաղ բնակավայրերը: Փաստացի ԵԱՀԿ Մինսկի խմբի տարածաշրջանային այցը, և ջանքերը` կողմերին բանակցությունների սեղանին նստեցնել և առաջ շարժվել, առայժմ մնում է մշուշոտ: Բանակցություններ` բանակցությունների համար անցկացնելը նախ արդեն պետք չի հայկական կողմին, որովհետև Ալիևի քաղաքականությունը դա փակուղի տանող քաղաքականություն է, նա դեմ է խաղաղ բանակցություններով հանգուցալուծմանն ու զիջումներին, իսկ այս պայմաններում հայկական կողմից ակնկալել ինչ-որ զիջումներ` աբսուրդ է: Ավելին` բանակցություններն են անիմաստ դառնում: Իրականում, եթե փորձենք հասկանալ, թե ինչու Ադրբեջանին պետք չեն բանակցություններ, դրա պատասխանը շատ պարզ է. Ալիևը Լեռնային Ղարաբաղի կարգավիճակի ամրագրումից խուսափում է: Իսկ խաղաղ բանակցությունները դեմ է` տարիներ շարունակ իրականացրած նրա կեղծ քարոզչությանը` թե «Ղարաբաղը վերադարձնելու է»: Ահա, թե ինչու է Ալիևի պատկերացրած միակ «լուծումը»` ռազմականը: Թամար Բագրատունի