Կանադահայերը խորը մտահոգություն են հայտնել HDP առաջնորդներին ձերբակալելու առթիվ
Հայ դատի Կանադայի հանձնախումբը խորը մտահոգություն է հայտնել Թուրքիայում Ազգերի ժողովրդավարական կուսակցության համանախագահներ Սելահաթթին Դեմիրտաշի, Ֆիգեն Յուկսեկդագի ձերբակալությունների ու կալանավորումների կապակցությամբ։ Կազմակերպության նախագահ Շահեն Միրաքյանը Կանադայի ԱԳ նախարար Ստեֆան Դիոնին հասցեագրված նամակում գրել է, որ հայկական համայնքը վճռականորեն դատապարտում է Էրդողանի վարչակարգի նման գործողությունները, որոնք «բացահայտ խաթարում են ժողովրդավարական կառույցները, արժեքները ու ժողովրդի անքակտելի իրավունքները»։ Հայտարարության մեջ ասվում է, որ Ազգերի ժողովրդավարական կուսակցությունը Թուրքիայում միակ քաղաքական կուսակցությունն է, որը հրապարակավ ճանաչել է Հայոց ցեղասպանությունը։ «Մենք կոչ ենք անում Կանադայի կառավարությանը անհապաղ դատապարտել Թուրքիայի կառավարության գործողությունները ու անհրաժեշտ քաղաքական ճնշում գործադրել իշխանությունների վրա ՝ անհիմն ու շինծու մեղադրանքներով կալանավորված խորհրդարանականներին ազատ արձակելու համար»,- հայտնել է Միրաքյանը։
Հետևեք մեզ Viber-ում
