Քանի դեռ անցյալը բացահայտված չէ, ներկան հուսադրող չէ.Լ.Սարգսյան

ՀԱԿ խմբակցությա պատգամավոր Լյուդմիլա Սարգսյանը ԱԺ-ում հաջորդ տարվա բյուջեի նախագծի քննարկումների ժամանակ  հայտարարեց,որ  պետպատվերի համակարգում կոռուպցիոն ռիսկեր կան: Նա հիշեցրեց, որ տարիներ առաջ թե ինքը և թե’ այն ժամանակ նախարար Դերենիկ Դումանյանը դիմել էին դատախազություն: Իր պահանջն էր` ստուգել նախարարություն-հիվանդանոցներ կապը. «Անցել է 3 տարի, դատախազությունից ինձ ասել են, թե զբաղվում են, բայց որևէ տեղեկություն չկա: Ես Ձեզ չէի դիմի, եթե Դուք արդեն 1-2 տարի աշխատած լինեիք, բայց այժմ ուզում եմ հավատալ, որ Դուք խնդիր ունեք վերականգնելու հասարակության վստահությունը»: Առողջապահության նախարարը Լևոն Ալթունյանը հայտնեց իր զորակցությունը պատգամավորին` միաժամանակ հորդորելով թողնել անցյալը բացահայտելու փորձերը և նշելով, որ նախարարության գործառույթը այլ որակի հասնելն է: «Քանի դեռ անցյալը բացահայտված չէ, ներկան հուսադրող չէ,- չհամաձայնեց Լ.Սարգսյանը,- Ընդամենը, քանի որ նախկին նախարարը դիմել է դատախազություն, Դուք էլ նրա իրավահաջորդն եք, տեղեկանք պահանջեք դատախազությունից, թե ինչ է արվել այդ ուղղությամբ»: