Սա Հայաստանն է, այստեղ ամեն ինչ հնարավոր է

2017-ի բյուջեի քննարկումները գյուղնախարար Իգնատի Առաքելյանի համար անհաջող բենեֆիս դարձավ։ Նորանշանակ նախարարը չէր թաքցնում իր անտեղյակությունը ու պատգամավորների հարցերին անկեղծորեն պատասխանում էր՝ «տեղյակ չեմ»։ Օրինակ Արամ Մանուկյանը հետաքրքրվում էր՝ ի՞նչ միջոցներով է սուբսիդավորվելու ջերմատների համար գազի գնի 17 տոկոս իջեցումը։ «Ինձ հետաքրքրում է, որ գինը նվազել է, մնացածն այս պահին չի հետաքրքրում»,-պատասխանեց նախարարը։ Մանուկյանը նաև հարցրեց, թե Արագածոտնի գյուղերում ամռանը կարկուտի հետևանքով բերքի գրեթե ամբողջությամբ ոչնչացումից հետո նախկին վարչապետ Հովիկ Աբրահամյանը խոստացել էր դիմել Կենտրոնական բանկ, որ սառեցվեն այդ շրջանի գյուղացիների վարկերը, ի՞նչ է արվել: Սակայն նախարարը տեղյակ չէր, խոստացավ ճշտել: «Գյուղացին մենակ է մնացել բնական աղետների հետ»,- նկատեց նախարարը: Ա.Մանուկյանի մյուս հարցին, թե նախարարը տեղյա՞կ է արդյոք լոլիկի էպոպեային, որ 2015 թվականին անգամ 1000 տոննա արտահանում չի եղել Հայաստանից, իսկ այս տարի պաշտոնական տվյալներով 40 անգամ ավելի է արտահանումը. «Տասնյակ հազարով տոննաներ լոլիկ է արտահանվել: Սա պետական մակարդակի խաբեություն է, իրականությունը խեղաթյուրող»,- ասաց նա: Ի.Առաքելյանը նշեց, թե լոլիկի արտահանման հետ կապված դետալներին նույնպես տեղյակ չէ. «Գիտեմ, որ հատուկ հանձնաժողով է ստեղծվել, եկել-ուսումնասիրել է, պարզել են` կարո՞ղ է արտահանումն ավելանալ»: Ա.Մանուկյանը հայտարարեց, որ թուրքական լոլիկը բերվում է, վրան գրվում` Made in Armenia, և արտահանվում. «Սա քրեական հանցագործություն է»։ Իգնատի Առաքելյանը չէր տիրապետում նաեւ գյուղացուն տրվող դիզվառելիքի էպոպեային, որի մասին հայկական մամուլը արդեն գրում է տարիներ շարունակ։ Ուստի նա անկեղծորեն չբացառեց նաեւ, որ Հայաստանում գյուղացիների համար նախատեսված մատչելի պարարատանյութի ու դիզվառելիքի ծրագրից օգտվել են նաև խոշոր հողատերերն ու թույլ տվել չարաշահումներ: Առաքելյանն ասաց, որ վերջին երեք-չորս տարիներին 1.1 մլրդ դրամ պարտքեր են կուտակվել այս ծրագրով, որոնք գյուղացիները չեն վճարել այդ ապրանքների դիմաց: «Մենք պետք է որոշենք, թե այդ պարտքերի հետ ինչ ենք անում: Որոշ դեպքերում, երբ համոզված ենք, որ եղել են չարաշահումներ, դիմել ենք դատարան: Մնացածի հետ կապված հիմա ճշտում ենք անվանական: Այսօր մենք չենք կարող մեկ ստորագրությամբ դիմել դատարան»,- ասաց նա: Հարցին, թե ի՞նչ չարաշահումներ են եղել, նախարարն ասաց, որ խոսակցությունների մակարդակի դեպքեր կան, որ պարարատանյութն ու դիզվառելիքը վերցրել են, չեն օգտագործել ու վերավաճառել են: Չարաշահումների հարցերը, նրա խոսքով, հիմնականում խոշոր հողատերերի հետ են կապվում: Նախկինում շրջանառվում էր Հովիկ Աբրահամյանի եղբոր անունը: «Նախկին դեպքերի համար ես չեմ կարող մեկնաբանել, էն ժամանակ ես չէի հետևում էդ դեպքերին: Հիմա եմ հետևում, չեմ կարող ասել, բայց ցանկացած բան կարող է լինել Հայաստանում: Դրա համար էլ ասում եմ՝ անվանական ուսումնասիրում ենք ցուցակները, հասկանանք, թե ով է պարտք»,- սենսացիոն խոստովանություն արեց նախարարը՝ վստահեցնելով, որ եթե վերջնական բացահայտվի, որ խոշոր հողատերերի անուններն են կապված այդ չարաշահումների հետ իրենք օրենքի համաձայն կգործեն: Իհարկե, Հայաստանում ամեն ինչ հնարավոր է. հնարավոր է, որ կարեւորագույն ոլորտներից մեկը տան մի մարդու ձեռքը, որը բոլորովին չի տիրապետում այն, բայց գործող վարչապետի մտերիմն է ու դրանով ամեն հարց փակված է, հնարավոր է, այո, որ մարդը կարող է թողնել իր բարձր աշխատավարձը ու ստանձնել նախարարի պաշտոնը ոչ այնքան բարձր աշխատավարձով։ Անի Սահակյան